Header Ads

ລາວ ຈະສົ່ງນັກແຂ່ງຂັນສີມືແຮງງານ ເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ XII ທີ່ປະເທດໄທ



ສປປ ລາວ ຈະສົ່ງນັກແຂ່ງຂັນສີມືແຮງງານ ຈຳນວນ 13 ຄົນ ພ້ອມດ້ວຍຄູຝຶກ 13 ຄົນ ໄປຮ່ວມແຂ່ງຂັນສີມືແຮງງານອາຊຽນ ຄັ້ງທີ XII ເຊິ່ງຈະຈັດຂຶ້ນ ໃນລະຫວ່າງວັນທີ 26 ສິງຫາ ຫາວັນທີ 5 ກັນຍາ 2018. ທີ່ຈະມາເຖິງນີ້ ຢູ່ ປະເທດໄທ ເຊິ່ງມີຄວາມຕ້ອງການທຶນຈຳນວນໜຶ່ງ ເພື່ອນຳໃຊ້ເຂົ້າໃນການຝຶກຊ້ອມ ແລະ ສົ່ງນັກກິລາ ເຂົ້າຮ່ວມແຂ່ງຂັນດັ່ງກ່າວ. 

ເຊີນຊວນ ບັນດາຫ້າງຮ້ານ, ບໍລິສັດ, ຜູ້ປະກອບການ ທັງພາຍໃນ ແລະ ຕ່າງປະເທດ ຮ່ວມສົມທົບທຶນ ເຂົ້າໃນການແຂ່ງຂັນໃນຄັ້ງນີ້ ຖ້າທ່ານໃດຫາກມີຄວາມສົນໃຈ ສາມາດ ເຂົ້າໄປຕິດຕໍ່ໂດຍກົງກັບກະຊວງແຮງງານ ແລະ ສະຫວັດດີການສັງຄົມ ຫລື ສາມາດຕິດຕໍ່ໄດ້ທີ່ເບີ 021 213003, 021 213013. ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານໃຫ້ຮູ້ ໃນພິທີຖະແຫລງຂ່າວ ເພື່ອລະດົມທຶນ ເຂົ້າໃນການຝຶກຊ້ອມ ແລະ ເດີນທາງເຂົ້າຮ່ວມແຂ່ງຂັນ ດັ່ງກ່າວ ຂອງທິມຊາດລາວ ໃນວັນທີ 18 ກໍລະກົດ 2018 ນີ້ວ່າ: ໃນການເຂົ້າຮ່ວມແຂ່ງຂັນໃນຄັ້ງນີ້, ເປັນຄັ້ງທີ 10 ຂອງ ສປປ ລາວ ເຊິ່ງໄດ້ກຳນົດເອົາ 7 ສາຂາຊ່າງເຂົ້າຮ່ວມແຂ່ງຂັນ ຄື: ຊ່າງກໍ່, ຊ່າງປຸງແຕ່ງອາຫານ, ຊ່າງຕິດຕັ້ງໄຟຟ້າໃນອາຄານ, ຊ່າງຈອດໂລຫະ, ຊ່າງຕັດຫຍິບເຄື່ອງນຸ່ງ, ຊ່າງອອກແບບກຣາຟິກ ແລະ ຊ່າງໄມ້ເຄື່ອງເຮືອນ. 

ປັດຈຸບັນ ການກະກຽມຄວາມພ້ອມ ຂອງນັກແຂ່ງຂັນທີມຊາດລາວ ບາງສາຂາຊ່າງ ພວມດຳເນີນການຝຶກຊ້ອມໃຫ້ແກ່ນັກກິລາຂອງຕົນ ໂດຍອິງໃສ່ຂໍ້ສະດວກພື້ນຖານ ແລະ ງົບປະມານສ່ວນໜຶ່ງຂອງເຂົາເຈົ້າເອງ ເຊິ່ງງົບປະມານທີ່ຕ້ອງການເພື່ອເຂົ້າຮ່ວມການແຂ່ງຂັນສີມືແຮງງານອາຊຽນ ຄັ້ງທີ 12 ຈຳນວນ 590 ລ້ານກວ່າກີບ ແຕ່ງົບປະມານຈາກການລົງທຶນຂອງລັດໃນວຽກງານແຂ່ງຂັນສີມືແຮງງານ ມີພຽງ 260 ລ້ານກີບ ເຊິ່ງໄດ້ກຳນົດການນຳໃຊ້ໃນ 2 ກິດຈະກຳຄື: ສົ່ງຄະນະຄູຝຶກ ແລະ ນັກແຂ່ງຂັນທີມຊາດລາວ ຈຳນວນ 6 ສາຂາວິຊາຊ່າງ ໄປຝຶກຊ້ອມທີ່ປະເທດຫວຽດນາມ ຈຳນວນ 137 ລ້ານກວ່າກີບ ແລະ ການຝຶກຊ້ອມເຂັ້ມພາຍໃນປະເທດ ພາຍຫລັງຄະນະດັ່ງກ່າວກັບຈາກ ສສ ຫວຽດນາມ ຈຳນວນ 122 ລ້ານກວ່າກີບ. ທ່ານ ຄຳແພງ ໄຊສົມແພງ ໃຫ້ຮູ້ອີກວ່າ: ການແຂ່ງຂັນສີມືແຮງງານອາຊຽນໄດ້ເລີ່ມຄັ້ງທີ 1 ໃນປີ 1995 ທີ່ປະເທດມາເລເຊຍ. ສຳລັບ ສປປ ລາວ ໄດ້ເຂົ້າຮ່ວມການແຂ່ງຂັນສີມືແຮງງານອາຊຽນ ໃນປີ 2001 ທີ່ບາງກອກ ປະເທດໄທ ເຊິ່ງເປັນຄັ້ງທີ 3 ຂອງອາຊຽນ ແລະ ເປັນປີທຳອິດຂອງ ສປປ ລາວ ນັບແຕ່ນັ້ນມາ ໄດ້ເຂົ້າຮ່ວມການແຂ່ງຂັນສີມືແຮງງານອາຊຽນ ໂດຍຕະຫລອດ ເຊິ່ງຈັດຂຶ້ນທຸກໆ 2 ປີ. 

ການແຂ່ງຂັນສີມືແຮງງານ ມີຈຸດປະສົງເພື່ອສົ່ງເສີມການພັດທະນາຄຸນນະພາບຂອງກຳລັງແຮງງານ ແລະ ການຮ່ວມມືກັນໃນວຽກງານພັດທະນາຊັບພະຍາກອນມະນຸດ. ຜ່ານມາ ການເຂົ້າຮ່ວມແຂ່ງຂັນໃນລະດັບອາຊຽນ ຂອງ ສປປ ລາວ ສາມາຍາດໄດ້ບົດຮຽນ ແລະ ປະສົບການ ເຊິ່ງສາມາດນຳມາຖ່າຍທອດ ແລະ ຜັນຂະຫຍາຍເຂົ້າໃນວຽກງານພັດທະນາສີມືແຮງງານ ເປັນແຕ່ລະໄລຍະ. ສຳລັບປີ 2014 ສປປ ລາວ ສາມາດຍາດໄດ້ 1 ຫລຽນເງິນ ຂອງສາຂາຊ່າງໄຟຟ້າ ໃນການແຂ່ງຂັນສີມືແຮງງານ ອາຊຽນ ຄັ້ງທີ 10 ຢູ່ ສສ ຫວຽດນາມ ເຊິ່ງເປັນຫລຽນປະຫວັດສາດ ໃນການເຂົ້າຮ່ວມແຂ່ງຂັນ ໃນເວທີອາຊຽນ./

ພາບ-ຂ່າວ ຮສສ : ເພັດສະໃໝ 
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.