Header Ads

ເມືອງຊຽງເງິນ ຫລວງພະບາງຖືກຜົນກະທົບຈາກພະຍຸລະດູຝົນມີຜູ້ເສຍຊີວິດ 1 ຄົນ



ສະພາບຝົນຕົກໜັກຕະຫຼອດວັນຕະຫຼອດຄືນ ແກ່ຍາວຫຼາຍມື້ຢູ່ເມືອງຊຽງເງິນ,ແຕ່ຄືນວັນທີ 18 ຫາ 22 ກໍລະກົດ 2018ນີ້,ໄດ້ພາໃຫ້ເກີດມີນ້ຳປ່າໄຫຼຊຸ,ດິນເຈື່ອນ,ເກີດມີນ້ຳຖ້ວມອັ່ງ-ຖ້ວມຂັງຢູ່ຫຼາຍໆທ້ອງຖິ່ນ ອັນໄດ້ສົ່ງຜົນກະທົບເຖີງຊີວິດການເປັນຢູ່ຂອງປະຊາຊົນຫຼາຍສົມຄວນ,ທັງເກີດເຫດການເສົ້າສະຫຼົດໃຈຂອງຜູ້ປົກຄອງເດັກ ທີ່ຖືກນ້ຳປ່າໄຫຼຊຸຈົນເສຍຊີວິດ.ໂດຍສະເພາະກໍ່ແມ່ນຄອບຄົວ ທ້າວ ແຂມ ແລະ ນາງ ຕຸ້ມ ຢູ່ບ້ານກີ່ວຈະລວງ ກຸ່ມບ້ານກີ່ວຫຍ້າ ເມືອງຊຽງເງິນ,ທີ່ຖືກສູນເສຍລູກຊາຍ ຊື່ວ່າ ທ້າວ ກອນ ອາຍຸ13 ປີ,ຖືກນ້ຳຫ້ວຍໄຫຼນອງຊຸຖັ່ງເອົາຖຽງສວນລ້ຽງສັດໄປແບບກະທັນຫັນ ໃນຂະນະທີ່ທ້າວ ກອນ ຢູ່ໃນຖຽງສວນຢູ່,ເຮັດໃຫ້ຜູ້ກ່ຽວບໍ່ສາມາດຫຼົບໜີທັນ ຈື່ງເສຍຊີວິດ,ເຫດການດັ່ງກ່າວເກີດຂຶ້ນໃນຕອນແລງຂອງມື້ວັນທີ 19 ກໍລະກົດ.



ຕໍ່ກັບເຫດການທີ່ເກີດຂຶ້ນຄັ້ງນີ້ ມາໃນຕອນບ່າຍວັນທີ 20 ກໍລະກົດ ,ອົງການປົກຄອງເມືອງຊຽງເງິນ ນຳໂດຍທ່ານຫຸມພັນ ພຸດທະວົງ ສະມາຊິກສະພາປະຊາຊົນແຂວງຫຼວງພະບາງປະຈຳເມືອງຊຽງເງິນ,ໄດ້ລົງພົບປະຢ້ຽມຢາມ,ພ້ອມທັງມອບວັດຖຸປັດໄຈ ແລະ ເງິນສົດຈຳນວນໜື່ງ ໃຫ້ແກ່ຄອບຄົວທີ່ຖືກເສຍຫາຍດັ່ງກ່າວ,ເພື່ອເປັນຂັວນກຳລັງໃຈ ແບ່ງເບົາຄວາມທຸກໂສກຂອງຜູ້ປົກຄອງເດັກ.




ຂ່າວແຈ້ງໃຫ້ຮູ້ຕື່ມວ່າ: ວັນທີ 22 ກໍລະກົດ ນີ້,ການນຳເມືອງຊຽງເງິນນຳໂດຍທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ,ກໍ່ໄດ້ລົງເຄື່ອນໄຫວຕິດຕາມກວດກາ ສະພາບຜົນກະທົບ ຈາກໄພພິບັດນ້ຳຖ້ວມ,ຢູ່ທ້ອງຖິ່ນຕ່າງໆ ເປັນຕົ້ນແມ່ນ: ແຫຼ່ງທ່ອງທ່ຽວນ້ຳຕົກຕາດແສ້ ; ຜົນກະທົບເສັ້ນທາງເຂົ້າບ້ານແອນສະຫຼວັນ ແລະບ້ານໂພນຊຽງ ; ເຂດສວນໄມ້ໃຫ້ໝາກຂອງຊາວກະສິກອນບ້ານລ້ອງອໍ້ ; ຢ້ຽມຢາມຜູ້ຖືກບາດເຈັບຢູ່ບ້ານສວນຫຼວງ ; ເບີ່ງສະພາບນ້ຳຖ້ວມນາຂອງຊາວກະສິກອນບ້ານຫ້ວຍໂຄດ,ໂພນສະຫວ່າງ,ໂພນໄຊ,ຖິ່ນແກ້ວ,ເບີສິບ ແລະ ບ້ານຕາດກະຈຳ,ທັງນີ້ກໍ່ເພື່ອຕິດຕາມເບີ່ງສະພາບຕົວຈີງຜົນກະທົບຈາກໄພພີບັດນ້ຳຖ້ວມ ເພື່ອຄົ້ນຄວ້າຊອກວິທີທາງແກ້ໄຂ. ຈາກສະພາບຝົນຕົກໜັກແກ່ຍາວຫຼາຍມື້ ໄດ້ພາໃຫ້ມີຜົນກະທົບທາງດ້ານພື້ນຖານໂຄງລ່າງ ເຊັ່ນ: ດິນເຈື່ອນຖົມທາງ-ໜ້າທາງເຈື່ອນ ເກີດມີອຸປະຕິເຫດ,ເສົາໄຟຟ້າລົ້ມ,ທໍ່ນ້ຳຂາດ ປະຊາຊົນຂາດນ້ຳໃຊ້ເປັນເວລາຫຼາຍວັນ,ດິນເຈື່ອນກະທົບເຮືອນຢູ່ຂອງປະຊາຊົນ,ນ້ຳຖ້ວມອັ່ງພື້ນທີ່ສວນໄມ້ໃຫ້ໝາກ,ຖ້ວມນາທີ່ສຳເລັດປັກດຳແລ້ວຫຼາຍຈຸດ.



ພາບ-ຂ່າວ: ເຫຼັກໄຊ ຄົດໄຊໂຍ ຂ່າວສານຫຼວງພະບາງ
© ໂຕະນໍ້າຊາ  | www.tonamcha.com | www.tonamchanews.com
_______

No comments

Powered by Blogger.