Header Ads

ເມືອງໄຊບູລີ ແຂວງສະຫວັນນະເຂດ ເລັ່ງຍົກຍ້າຍປະຊາຊົນ ອອກຈາກເຂດນໍ້າຖ້ວມໄປຢູ່ບ່ອນປອດໄພແລ້ວ




ການນຳຂອງເມືອງໄຊບູລີ ເລັ່ງຍົກຍ້າຍປະຊາຊົນ ທີ່ຢູ່ລຽບຕາມສາຍເຊບັ້ງໄຟບ່ອນທີ່ຖືກນໍ້າຖ້ວມຂັງໄປຢູ່ບ່ອນທີ່ສຸງ ແລະ ມີຄວາມປອດໄພແລ້ວບາງບ້ານ ແລະ ຍັງສຶບຕໍ່ຍົກຍ້າຍບ້ານທີ່ຢູ່ໃນຂັ້ນອັນຕະລາຍຕື່ມອີກ,ຖ້າຫາກວ່ານໍ້າມັນຍັງສູງຂື້ນ. ທ່ານ ອ່ອນລະພັນ ບົວສີແກ້ວ ຮອງເຈົ້າເມືອງໄຊບູລີ ໄດ້ໃຫ້ສຳພາດຕໍ່ນັກຂ່າວວິທະຍຸກະຈາຍສຽງແຂວງຂອງພວກເຮົາວ່າ: ການຍົກຍ້າຍປະຊາຊົນໄປຢູ່ຈຸດທີ່ປອດໄພນັ້ນ,ທາງການນຳຂອງເມືອງແມ່ນໄດ້ລະດົມທຸກພາກສ່ວນໃນເມືອງ,ໂດຍສະເພາະ ກໍ່ແມ່ນກຳລັງທະຫານຂອງເມືອງ,ຝ່າຍປົກຄອງ,ເລັ່ງຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບຈາກນໍ້າຖ້ວມຄື: ບ້ານຊຽງໄຄ,ປ່າໄລ່,ແກ້ງແວງ ແລະ ບ້ານດົງໝາກໄພ,ທັງສີ່ບ້ານນີ້ແມ່ນຖືກນໍ້າຖ້ວມທັງເຮືອນຊານ,ຮົ້ວສວນ,ໄຮ່ນາ,ເຊິ່ງມີຄອບຄົວທີ່ໄດ້ຮັບຜົນກະທົບ ກໍ່ຄືຖືກນໍ້າຖວ້ມຄັ້ງນີ້ມີທັງໝົດ 60 ຄອບຄົວ



ທ່ານ ອ່ອນລະພັນ ບົວສີແກ້ວ ຍັງເວົ້າອີກວ່າ: ສະເພາະສູນທີ່ທາງເມືອງໄດ້ກຳນົດໄວ້ຮອງຮັບຜູ້ທີ່ຍົກຍ້າຍຈາກນໍ້າຖວ້ມມີທັງໝົດ 04 ສູນຄື້ ສູນບ້ານຕົ້ນແຫນ,ສູນບ້ານດ້າງສະຫວັນ,ສູນບ້ານສົມສະອາດ ແລະ ສູນໂຮງຮຽນມ/ສ ໝາກນາວ
ສ່ວນທາງດ້ານກອງບັນຊາການທະຫານເມືອງໄຊບູລີ ກໍ່ໄດ້ລະດົມກຳລັງຂອງຕົນເພື່ອລົງຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບຄັ້ງນີ້ຢ່າງເຕັມສ່ວນ,ໂດຍໄດ້ນຳເອົາເຮືອຂະໜາດນ້ອຍ ແລະ ກາງ ລົງໃຫ້ຄວາມຊ່ວຍເຫຼືອໃນການຍົກຍ້າຍສິ່ງຂອງທີ່ຈຳເປັນຂອງປະຊາຊົນໄປໄວ້ບ່ອນທີ່ສຸງ ແລະ ມີຄວາມປອດໄພທີ່ສຸດ

ດັ່ງທ່ານ ພັນໂທ ວິໄຊ ຄຳໄພທູນ ຫົວໜ້າການເມືອງ ກອງບັນຊາການທະຫານເມືອງໄຊບູລີວ່າ: ນອກຈາກເຂດຊຽງໄຄທີ່ຖືກນໍ້າຖວ້ມ ກໍ່ຍັງມີ ເຂດບ້ານເວີນ,ຕົ້ນແຫນ,ເຂດປາກເຊບັ້ງໄຟ,ເຂດສົມສະອາດ,ເສັ້ນທາງການໄປມາຫາສູ່ຂອງປະຊາຊົນ ທີ່ຢູ່ລຽບຕາມສາຍເຊບັ້ງໄຟບາງເສັ້ນທາງແມ່ນບໍ່ສາມາດສັນຈອນໄປມາໄດ້ມີແຕ່ໃຊ້ເຮືອເທົ່ານັ້ນຈິ່ງໄປໄດ້,ມາຮອດປະຈຸບັນເນື້ອທີ່ທຳການຜະລິດຂອງຊາວນາເມືອງໄຊບູລີ ທີ່ຖືກນໍ້າຖ້ວມ 2.138 ເຮັກຕາ,ສະເພາະການວັດແທກນໍ້າເຊບັ້ງໄຟໃນມື້ວັນທີ 26 ກໍລະກົດ 2018,ວັດແທກໄດ້ 14 ແມັດ 30 ຊັງຕີແມັດ,ເຂດອັນຕະລາຍແມ່ນຢູ່ໃນລະດັບ 15 ແມັດ,ຍັງເຫຼືອພຽງແຕ່ 70 ຊັງຕີແມັດຖືວ່າອັນຕະລາຍ.%


ຂ່າວ: ບຸນຊູ ພົມມະເທບ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.