Header Ads

ເຊກອງ ກະກຽມຄວາມພ້ອມທີ່ຈະຍົກລະດັບ ດ່ານແຫ່ງຊາດ ດາກຕະອອກ ຂຶ້ນເປັນດ່ານສາກົນ





ດ່ານແຫ່ງຊາດ ດາກຕະອອກ ຕັ້ງຢູ່ຫ່າງຈາກຕົວເມືອງດາກຈຶງ ແຂວງເຊກອງໄປທາງທິດຕາເວັນອອກຊາຍແດນຫວຽດນາມ 21 ກິໂລແມັດ ແລະ ຫ່າງຈາກເທສະບານແຂວງເຊກອງ 94,6 ກິໂລແມັດ ຕິດກັບດ່ານດາກໂອກ ເມືອງນາມຢາງ ແຂວງກວາງນາມ ສສ ຫວຽດນາມ.

ທ່ານ ຄໍາເຜີຍ ບຸດດາວຽງ ເຈົ້າແຂວງເຊກອງ ໄດ້ລາຍງານກ່ຽວກັບການກະກຽມຄວາມພ້ອມດ້ານຕ່າງໆ ເພື່ອຍົກລະດັບດ່ານແຫ່ງຊາດ ດາກຕະອອກ ເມືອງດາກຈຶງ ແຂວງເຊກອງ ເປັນດ່ານສາກົນ ເຊິ່ງທ່ານໃຫ້ຮູ້ວ່າ: ໃນປີ 2006 ດ່ານແຫ່ງນີ້ໄດ້ຖືກຮັບຮອງ ແລະ ສ້າງຕັ້ງເປັນດ່ານແຫ່ງຊາດ ເພື່ອອໍານວຍຄວາມສະດວກ ແລະ ຮອງຮັບໃຫ້ແກ່ການຂະຫຍາຍຕົວຂອງເສດຖະກິດ, ວັດທະນະທໍາສັງຄົມ ກໍຄືການບໍລິການໃຫ້ແກ່ປະຊາຊົນໄປ-ມາຫາສູ່ເຊິ່ງກັນ ແລະ ກັນໄດ້ດີຂຶ້ນ, ມາຮອດປີ 2009 ລັດຖະບານໄດ້ອະນຸມັດໂຄງການກໍ່ສ້າງເສັ້ນທາງ 16B ເຊິ່ງເປັນເສັ້ນທາງຫຼວງແຫ່ງຊາດ ທີ່ຜ່ານແຂວງເຊກອງ ອອກໄປເມືອງດາກຈຶງ ຫາຊາຍແດນຫວຽດນາມ, ປະຈຸບັນໄດ້ສຳເລັດການກໍ່ສ້າງທາງປູຢາງເປັນສ່ວນໃຫຍ່ ແລະ ຄາດວ່າຈະເປີດນໍາໃຊ້ເປັນທາງການໃນທ້າຍປີ 2018 ນີ້, ພ້ອມນັ້ນ ຂົວຂ້າມນໍ້າເຊກອງ ທີ່ໄດ້ຮັບທຶນຊ່ວຍເຫຼືອລ້າຈາກລັດຖະບານ ແລະ ປະຊາຊົນຍີ່ປຸ່ນ ກໍ່ໄດ້ສ້າງສໍາເລັດ 100% ເຊິ່ງໄດ້ຈັດພິທີມອບ-ຮັບ ແລະ ເປີດນໍາໃຊ້ຢ່າງເປັນທາງການໃນທ້າຍເດືອນກຸມພາ 2018 ຜ່ານມາ; 

ສ່ວນການກໍ່ສ້າງພື້ນຖານໂຄງລ່າງ ອາຄານສໍານັກງານ ແລະ ສິ່ງເອື້ອອໍານວຍຄວາມສະດວກຕ່າງໆ ຢູ່ດ່ານເຂົ້າ-ອອກ ໂດຍໄດ້ຮັບທຶນສະໜັບສະໜູນຊ່ວຍເຫຼືອຈາກລັດຖະບານ ແລະ ປະຊາຊົນ ສສ ຫວຽດນາມ, ມາຮອດປະຈຸບັນໄດ້ສໍາເລັດການກໍ່ສ້າງແລ້ວ 100% ເຊິ່ງໄດ້ຈັດພິທີມອບ-ຮັບ ແລະເປີດນໍາໃຊ້ ຢ່າງເປັນທາງການໃນຕົ້ນເດືອນ ກໍລະກົດ ປີ 2017 ຜ່ານມາ, ດ້ວຍຜົນສໍາເລັດການກໍ່ສ້າງພື້ນຖານໂຄງລ່າງທີ່ສໍາຄັນດັ່ງກ່າວ ໄດ້ອໍານວຍຄວາມສະດວກຫຼາຍດ້ານໃຫ້ແກ່ການພັດທະນາເສດຖະກິດ-ສັງຄົມຂອງແຂວງເຊກອງ ເປັນຕົ້ນ: ສາມາດຕອບສະໜອງໃຫ້ແກ່ການການໄປ-ມາ ແລະ ແລກປ່ຽນຊື້-ຂາຍສິນຄ້າ ລະຫວ່າງປະເທດ ກໍຄືການເຂົ້າ-ອອກຂອງພົນລະເມືອງ ມີຄວາມສະດວກຂຶ້ນກວ່າເກົ່າ ເວົ້າລວມ, ເວົ້າສະເພາະ ໄດ້ອໍານວນຄວາມສະດວກໃຫ້ແກ່ປະຊາຊົນພົນລະເມືອງຊາວແຂວງເຊກອງ ກໍ່ຄືບາວເມືອງດາກຈຶງ ໃນການຜະລິດ-ການຈໍລະຈອນສິນຄ້າ, ການຂົນສົ່ງໂດຍສານ, ການຄ້າຂາຍຕ່າງໆ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າທີ່ອາໃສຢູ່ໃນຂອບເຂດບໍລິເວນດັ່ງກ່າວໄດ້ຮັບການພັດທະນາດີຂື້ນເປັນກ້າວໆ, ພ້ອມນີ້ ເສັ້ນທາງດັ່ງກ່າວ ຍັງເປັນເສັ້ນທາງຍຸດທະສາດທີ່ສໍາຄັນທາງດ້ານການເມືອງ, ການທະຫານ, ເສດຖະກິດ, ວັດທະນະທໍາ-ສັງຄົມຂອງຊາດ ທັງເປັນເສັ້ນທາງເຊື່ອມຕໍ່ລະຫວ່າງປະເທດ ເພື່ອອອກສູ່ທະເລທີ່ສັ້ນກວ່າໝູ່.

ໃນສ່ວນກົງຈັກການຈັດຕັ້ງຢູ່ສໍານັກງານດ່ານ ດັ່ງກ່າວ ກໍໄດ້ປະກອບບຸກຄະລາກອນ ແລະ ເຈົ້າທີ່ ຢ່າງເປັນລະບົບຄົບຊຸດ ເຊິ່ງປະກອບມີພາກສ່ວນພາສີ-ອາກອນ, ເຈົ້າໜ້າທີ່ ປກສ, ໂຍທາທິການ ແລະ ຂົນສົ່ງ, ກະສິກໍາ-ປ່າໄມ້ ແລະ ຂະແໜງການອື່ນໆທີ່ກ່ຽວຂ້ອງ ຕາມມາດຕະຖານເງື່ອນໄຂທີ່ກໍານົດໄວ້ ເພື່ອເຮັດໜ້າທີ່ອໍານວຍຄວາມສະດວກໃນການບໍລິການດ້ານຕ່າງໆໃຫ້ແກ່ປະຊາຊົນພົນລະເມືອງ ນັບທັງນັກທຸລະກິດຜູ້ປະກອບການຢູ່ພາຍໃນ ແລະ ຕ່າງປະເທດ; ພ້ອມທັງ ປະກອບອຸປະກອນຮັບໃຊ້ ເພື່ອອໍານວຍຄວາມສະດວກໃຫ້ແກ່ພະນັກງານ ແລະ ເຈົ້າໜ້າທີ່ກ່ຽວຂ້ອງໃນການປະຕິບັດໜ້າທີ່ ແມ່ນມີຄວາມພ້ອມໃນລະດັບໃດໜຶ່ງ ຊຶ່ງສາມາດໃຫ້ການບໍລິການຢ່າງເປັນປົກະຕິ, ວ່ອງໄວ ແລະ ທັນການ.


ຂ່າວ: ພຸດທະສອນ (ຂ່າວແຂວງເຊກອງ)
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.