Header Ads

ເດືອນຕຸລານີ້ ຈະທົດລອງເກັບເງິນຜ່ານປະຕູດຽວ ຢູ່ດ່ານສາກົນຂົວມິດຕະພາບລາວ-ໄທ 1


ອີງຕາມການລາຍງານຂອງ ນສພ ວຽງຈັນໃຫ່ມ ວ່າ: ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ນະ­ຄອນ­ຫຼວງ​ວຽງ​ຈັນ ແລະ ແຂວງ​ໜອງ​ຄາຍ ເປັນ​ດ່ານ​ທີ່​ມີ​ຄົນ ສິນ­ຄ້າ ແລະ ພາ­ຫະ­ນະ​ເຂົ້າ-ອອກ ແຕ່​ລະ​ວັນ​ເປັນ​ຈຳ­ນວນ​ຫຼວງ­ຫຼາຍ ຖື​ໄດ້​ວ່າ​ເປັນ​ດ່ານ​ໜຶ່ງ​ທີ່​ສາ­ມາດ​ສ້າງ​ລາຍ​ຮັບ​ເຂົ້າ​ງົບ­ປະ­ມານ​ລັດ​ປີ​ໜຶ່ງ​ຫຼາຍ​ພັນ​ຕື້​ກີບ ແລະ ແຕ່​ລະ​ປີ​ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ກໍ່​ເພີ່ມ​ຂຶ້ນ​ເລື້ອຍໆ ເພື່ອ​ຮັບ ປະ­ກັນ​ເຮັດ​ໃຫ້­ການ​ຈັດ​ເກັບ​ລາຍ​ຮັບ​ບໍ່​ຮົ່ວ​ໄຫຼ​ໃນ​ອະ­ນາ­ຄົດ​ຂ້າງ​ໜ້າ​ນັ້ນ ລັດ​ໄດ້​ມີ​ແຜນ​ປັບ­ປຸງ​ການ​ບໍ­ລິ­ການ​ເກັບ​ເງິນ​ຜ່ານ​ປະ­ຕູ​ດຽວ​ຢູ່​ດ່ານ ແລະ ໂຄງ­ການ​ນີ້​ຄາດ​ວ່າ​ຈະ​ເລີ່ມ​ທົດ​ລອງ​ຈັດ​ຕັ້ງ​ປະ­ຕິ­ບັດ​ໃນ​ທ້າຍ​ປີ​ນີ້.

ທ່ານ ທອງ​ທິບ ສີ​ວິ​ໄຊ ຮັກ­ສາ​ການ​ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ວັນ​ທີ 16 ກໍ­ລະ­ກົດ 2018 ວ່າ: ໂດຍ​ອີງ­ໃສ່​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ນະ­ຄອນ­ຫຼວງ​ວຽງ​ຈັນ ກໍ່​ຄື ປີ​ທ່ອງ​ທ່ຽວ​ລາວ 2018 ໃນ 6 ເດືອນ​ຕົ້ນ​ປີ 2018 ດ່ານ​ສາ­ກົນ​ຂົວ​ມິດ­ຕະ­ພາບ​ລາວ -ໄທ 1 ໄດ້​ມີ​ການ­ເຄື່ອນ­ໄຫວ​ສຳ­ເລັດ​ຫຼາຍ​ດ້ານ​ສົມ­ຄວນ ໂດຍ​ສະ­ເພາະ ການ​ເກັບ​ກຳ​ຄົນ​ເຂົ້າ-ອອກ​ດ່ານ ປົກ­ກະ­ຕິ​ມີ​ຄົນ​ເຂົ້າ-ອອກ​ດ່ານ ສະ­ເລ່ຍ 6.500-7.000 ຄົນ​ຕໍ່​ວັນ ໃນ​ໄລ­ຍະ 6 ເດືອນ​ຕົ້ນ​ປີ 2018 ເຫັນ​ວ່າ​ມີ​ຄົນ​ເຂົ້າ-ອອກ​ສະ​ໝ່ຳ​ສະ­ເໝີ ແຕ່​ວ່າ 6 ເດືອນ​ທ້າຍ​ປີ 2018 ໂດຍ​ສະ­ເພາະ ໄລ­ຍະ​ລະ­ດູ­ຝົນ​ຄົນ​ເຂົ້າ-ອອກ​ຈະ​ຫຼຸດ​ລົງ ເນື່ອງ​ຈາກ​ການ​ໄປ​ມາ​ມີ​ຄວາມ​ຫຍຸ້ງ­ຍາກ ແລະ ຈະ​ເລີ່ມ​ເພີ່ມ​ຂຶ້ນ​ເດືອນ​ຕຸ­ລາ​ເປັນ­ຕົ້ນ​ໄປ ສ່ວນ​ພາ­ຫະ­ນະ​ເຂົ້າ-ອອກ​ດ່ານ ສະ­ເລ່ຍ​ພັນ​ກວ່າ​ຄັນ​ຕໍ່​ວັນ ທຽບ­ໃສ່ 6 ເດືອນ​ຕົ້ນ​ປີ 2017 ແມ່ນ​ບໍ່​ຫຼຸດ​ລື່ນ​ກັນ​ຫຼາຍ ແຕ່ 6 ເດືອນ​ຕົ້ນ​ປີ 2018 ນັກ​ທ່ອງ​ທ່ຽວ​ທີ່​ເຂົ້າ​ມາ​ທ່ຽວ​ປະ­ເທດ​ລາວ​ໂດຍ​ຜ່ານ​ດ່ານ​ແຫ່ງ​ນີ້​ເຫັນ​ວ່າ​ຫຼຸດ​ລົງ​ປະ­ມານ 1% ຖ້າ​ທຽບ­ໃສ່ 6 ເດືອນ​ຕົ້ນ​ປີ 2017 ສ່ວນ​ສາ­ເຫດ​ທີ່​ຫຼຸດ​ລົງ​ນັ້ນ​ແມ່ນ​ຍັງ​ບໍ່​ທັນ​ຮູ້​ເທື່ອ ແຕ່​ຄາດ​ວ່າ​ນັກ​ທ່ອງ​ທ່ຽວ​ທີ່​ເຂົ້າ​ມາ​ອາດ​ຈະ​ຜ່ານ​ດ່ານ​ແຫ່ງ​ອື່ນ​ຫຼາຍ​ຂຶ້ນ ເນື່ອງ​ຈາກ​ປັດ­ຈຸ­ບັນ​ມີ​ຫຼາຍ​ດ່ານ​ທົ່ວ​ປະ­ເທດ​ທີ່​ມີ​ຄວາມ​ສະ­ດວກ​ສາ­ມາດ​ຮອງ​ຮັບ​ນັກ​ທ່ອງ​ທ່ຽວ​ໄດ້​ຈຳ­ນວນ​ຫຼາຍ.


ສຳ­ລັບ​ແຜນ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ປີ 2018 ນັບ​ທັງ​ຢູ່​ດ່ານ​ທ່າ​ນາ​ແລ້ງ ແລະ ດ່ານ​ຂົວ​ມິດ­ຕະ­ພາບ 3.240 ກວ່າ​ຕື້​ກີບ ແຕ່​ຜ່ານ​ການ­ຈັດ­ຕັ້ງ​ປະ­ຕິ­ບັດ​ມາ​ຮອດ​ກາງ​ເດືອນ​ກໍ­ລະ­ກົດ 2018 ສາ­ມາດ​ປະ­ຕິ­ບັດ​ໄດ້​ປະ­ມານ 1.469 ຕື້​ກີບ ເທົ່າ​ກັບ 46,05% ຄາດ​ວ່າ​ໝົດ​ປີ​ຈະ​ໄດ້ 90% ຂອງ​ແຜນ­ການ ທ່າ­ແຮງ​ທີ່​ເກັບ​ລາຍ​ຮັບ​ໄດ້​ຫຼາຍ​ກວ່າ​ໝູ່​ມາ​ຈາກ​ເກັບ​ພາ­ສີ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ຈາກ​ຕ່າງ­ປະ­ເທດ ແລະ ໄລ­ຍະ​ລະ­ດູ­ຝົນ​ການ​ກໍ່­ສ້າງ​ຈະ​ຫຼຸດ​ລົງ​ກໍ່​ຈະ​ເຮັດ​ໃຫ້­ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ຈະ​ຫຼຸດ​ລົງ ຈະ​ສົ່ງ​ຜົນ​ເຮັດ​ໃຫ້​ລາຍ​ຮັບ​ຈາກ​ການ​ເກັບ​ພາ​ສີ­ນ້ຳ­ມັນ​ຫຼຸດ​ລົງ​ເຊັ່ນ​ດຽວ​ກັນ.

ເພື່ອ​ເຮັດ​ໃຫ້­ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ຢູ່​ດ່ານ​ແຫ່ງ​ນີ້​ມີ​ຄວາມ​ຮັບ­ປະ­ກັນ​ບໍ່​ຮົ່ວ​ໄຫຼ​ໃນ​ອະ­ນາ­ຄົດ​ຂ້າງ​ໜ້າ​ນັ້ນ ກົມ​ພາ­ສີ ກະ­ຊວງ​ການ​ເງິນ ໄດ້​ເຊັນ​ສັນ­ຍາ​ກັບ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ຈະ​ໄດ້​ປັບ­ປຸງ​ການ​ເກັບ​ເງິນ​ປະ­ຕູ​ດຽວ ໂດຍ​ແມ່ນ​ທະ­ນາ­ຄານ​ຈະ​ເປັນ​ຜູ້​ຮັບ­ຜິດ­ຊອບ​ຈະ​ບໍ່​ໃຫ້​ພະ­ນັກ­ງານ​ແຕ່​ລະ​ພາກ­ສ່ວນ​ປະ­ຈຳ​ດ່ານ​ເກັບ​ເງິນ​ເອງ​ໃນ​ຕໍ່​ໄປ ເຊິ່ງ​ໂຄງ­ການ​ນີ້​ສອງ​ຝ່າຍ​ໄດ້​ເຊັນ​ສັນ­ຍາ​ກັນ​ແລ້ວ​ໃນ​ເດືອນ​ເມ­ສາ 2018 ປັດ­ຈຸ­ບັນ​ຍັງ​ຢູ່​ໃນ​ຂັ້ນ​ຕອນ​ກະ­ກຽມ​ສັ່ງ​ເຄື່ອງ­ມື​ມາ​ຈາກ​ຕ່າງ­ປະ­ເທດ​ເຂົ້າ​ມາ​ຕິດ​ຕັ້ງ ແລະ ຕາມ​ແຜນ­ການ​ວາງ​ໄວ້​ຄາດ​ວ່າ​ເດືອນ​ຕຸ­ລາ 2018 ຈະ​ໄດ້​ເລີ່ມ​ທົດ​ລອງ​ຈັດ​ຕັ້ງ​ປະ­ຕິ­ບັດ ເນື່ອງ​ຈາກ​ພັກ-ລັດ ໄດ້​ກຳ­ນົດ​ເອົາ​ດ່ານ​ແຫ່ງ​ນີ້​ເປັນ​ດ່ານ​ຕົວ​ແບບ​ໃຫ້​ແກ່​ທົ່ວ​ປະ­ເທດ ຖ້າ​ໂຄງ­ການ​ນີ້​ສຳ­ເລັດ​ຈະ​ມີ​ຜົນ​ດີ​ຫຼາຍ​ຢ່າງ ເປັນ­ຕົ້ນ ເຮັດ​ໃຫ້​ເກັບ​ເງິນ​ເຂົ້າ​ງົບ­ປະ­ມານ​ຄົບ​ຖ້ວນ ບໍ່​ຮົ່ວ​ໄຫຼ ແລະ ປະ­ຊາ­ຊົນ​ທີ່​ມາ​ບໍ­ລິ­ການ​ກໍ່​ມີ​ຄວາມ​ເຊື່ອ​ໝັ້ນ ນອກ​ນີ້ ຍັງ​ເຮັດ​ໃຫ້­ການ​ບໍ­ລິ­ການ​ຄ່ອງ​ແຄ້ວ​ໄວ​ຂຶ້ນ​ຕື່ມ​ອີກ.

ພາບ ແລະ ຂ່າວ: ນສພ ວຽງຈັນໃຫ່ມ
© ໂຕະນໍ້າຊາ  | www.tonamcha.com | www.tonamchanews.com
_______




No comments

Powered by Blogger.