Header Ads

ທາງການລາວອຳນວຍຄວາມສະດວກສຸດຂີດຕໍ່ຜູ້ເຂົ້າມາຊ່ວຍເຫຼືອບັນເທົາທຸກໄພນໍ້າຖ້ວມ



ຕັ່ງແຕ່ວັນທີ 26-29 ກໍລະກົດ 2018 ນີ້,ຄະນະສະເພາະກິດພົວພັນປະສານງານຮັບການຊ່ວຍເຫຼືອບັນເທົາທຸກຜູ້ປະສົບໄພນໍ້າຖ້ວມ ຢູ່ເມືອງສະໜາມໄຊ ແຂວງອັດຕະປື ແລະ ເມືອງປາກຊ່ອງ ແຂວງຈຳປສັກ ໄດ້ອຳນວຍຄວາມສະດວກສຸດຂີດໃຫ້ແກ່ຄົນລາວ ແລະ ຕ່າງປະເທດ ທີ່ໄດ້ເຂົ້າມາຊ່ວຍເຫລືອມອບເຄື່ອງບັນເທົາທຸກໃຫ້ແກ່ຜູ້ປະສົບໄພນໍ້າຖ້ວມຢູ່ເມືອງສະໜາມໄຊ ແຂວງອັດຕະປື ແລະ ຢູ່ເມືອງປາກຊ່ອງ ແຂວງຈໍາປາສັກ ໂດຍໄດ້ແຕ່ງຕັ້ງຄະນະຮັບຜິດຊອບຂຶ້ນທີ່ດ່ານສາກົນວັງເຕົ່າ- ຊ່ອງເມັກ ຊາຍແດນລາວ-ໄທ ແລະ ຢູ່ດ່ານສະໜາມບິນສາກົນປາກເຊ.

ທ່ານ ຂັນຄຳ ແກ່ນບຸດຕາ ຫົວໜ້າພະແນກການຕ່າງປະເທດແຂວງຈຳປາສັກ ແລະທ່ານ ບຸນຍະເດດ ທອງສະຫວັນ ຫົວໜ້າຫ້ອງການຄຸ້ມຄອງດ່ານສາກົນວັງເຕົ່າ ໃຫ້ສຳພາດຕໍ່ນັກຂ່າວວິທະຍຸກະຈາຍສຽງແຂວງຈຳປາສັກ ໃນວັນທີ 29 ກໍລະກົດ 2018 ນີ້ວ່າ: ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງໆຈຳປາສັກ ວ່າດວ້ຍການແຕ່ງຕັ້ງຄະນະກຳມະການຕ້ອນຮັບ ແລະ ປະສານງານຮັບການຊ່ວຍເຫຼືອບັນເທົາທຸກຜູ້ປະສົບໄພນໍາຖ້ວມ, ທາງພະແນກການຕ່າງປະເທດ ໄດ້ປະສານສົມທົບກັບ ພະແນກ ແຮງງານ ແລະ ສະຫວັດດີການສັງຄົມແຂວງ, ດ່ານສາກົນວັງເຕົ່າ ແລະ ອົງການປົກຄອງເມືອງໂພນທອງ ເພື່ອຈັດຕັ້ງຄະນະຮັບການຊ່ວຍເຫຼືອຂື້ນ ແລະ ກໍ່ເຫັນວ່າມີຫຼາຍພາກສ່ວນເຂົ້າມາບໍລິຈາກເຄື່ອງຊ່ວຍເຫຼືອຜ່ານດ່ານສາກົນວັງເຕົ່າຢ່າງຫຼວງຫຼາຍ ແລະ ມີຂະບວນລົດ ຫຼາຍກ່ວາ 100 ຂະບວນແລ້ວເຊັ່ນ: ເຄື່ອງອຸປະໂພກບໍລິໂພກ, ເຂົ້າສານອາຫານແຫ້ງຈາກບຸກຄົນ, ການຈັດຕັ້ງຕ່າງໆຂອງລັດ ແລະ ປະຊາຊົນໄທ. ນອກນີ້ ຍັງມີຈາກປະເທດຈີນ, ສາທາລະນະລັດເກົາຫຼີ, ສິງກະໂປ, ອົດສະຕາລີ, ແລະ ປະເທດອື່ນໆ ໂດຍຜ່ານດ່ານສາກົນວັງເຕົ່າ ແລະ ດ່ານສະໜາມບິນສາກົນປາກເຊ. ເວົ້າສະເພາະ ການຊ່ວຍເຫຼືອຂອງຄົນໄທ ແລະ ລາວທີ່ຢູ່ປະເທດໄທຜ່ານດ່ານສາກົນວັງເຕົ່າ-ຊ່ອງເມກນັ້ນ ແມ່ນມີຄວາມຄຶກຄື້ນ ໂດຍໄດ້ພາກັນທະຍ່ອຍເຂົ້າມາມອບຢ່າງຕໍ່ເນື່ອງ, ເຊິ່ງເຄື່ອງຊ່ວຍເຫຼືອດັ່ງກ່າວໄດ້ເກັບມ້ຽນໄວ້ຢູ່ສາງຊົ່ວຄາວທີ່ດ່ານວັງເຕົ່າຈົນລົ້ນສາງ ແລະ ໄດ້ສົ່ງມາເກັບມ້ຽນທີ່ສາງປາກເຊ 2 ແຫ່ງ. ຈາກນັ້ນ ກໍ່ໄດ້ລະບາຍເອົາເຄື່ອງໄປຍັງ ເມືອງສະໜາມໄຊ ແຂວງອັດຕະປື ແລະ ຈຸດຕ່າງໆທີ່ຕ້ອງການຊ່ວຍເຫຼືອ. 

ສຳລັບພາກສ່ວນອື່ນໆທີ່ຕ້ອງການເຂົ້າໄປມອບດ້ວຍຕົນເອງໃນແຕ່ລະຈຸດນັ້ນ ກໍ່ໄດ້ອຳນວຍຄວາມສະດວກໃຫ້ ໂດຍບໍ່ມີການເກັບຄ່າທຳນຽມໃດໆ ເພາະມັນເປັນການຊ່ວຍເຫຼືອສຸກເສີນ.ແຕ່ບຸກຄົນ ແລະ ພາຫະນະທີ່ເຂົ້າໄປຕ້ອງໄດ້ແຈ້ງໜັງສື ແລະ ເອກະສານກ່ຽວຂ້ອງຕາມລະບຽບການປົກກະຕິ ເພື່ອປ້ອງກັນບໍ່ໃຫ້ມີສິນຄ້າແອບແຝງ ແລະ ອື່ນໆ, ແຕ່ກໍໄດ້ພະຍາຍາມເອົາໃຈໃສ່ບໍລິການໃຫ້ສະດວກ ແລະ ວ່ອງໄວທີ່ສຸດ.
ຂໍ້ມູນເກດສະໜາ ແກ້ວສຸວັນນະແສງ (ຂປລ)
© ໂຕະນໍ້າຊາ  | www.tonamcha.com | www.tonamchanews.com
_______



No comments

Powered by Blogger.