ບໍລິສັດໄຟຟ້ານໍ້າເທີນ 2 ຢຸດຕິການຜະລິດໄຟຟ້າ ແລະ ປ່ອຍນໍ້າລົງແມ່ນໍ້າເຊບັ້ງໄຟຊົ່ວຄາວ

ເຮືອນ​ຈັກ​ໂຄງການ​ໄຟຟ້າ​ນໍ້າ​ເທີນ 2 ຢູ່​ເມືອງ​ຍົມ​ມະ​ລາດ ​ແຂວງ​ຄຳ​ມ່ວນ ​ໄດ້​ຢຸດຕິ​ການ​ຜະລິດ​ກະແສໄຟຟ້າ ​ແລະ ການ​ປ່ອຍ​ນໍ້າ​ລົງ​ຄອງ​ເໝືອງສົ່ງ​ນໍ້​າ ລົງສູ່ແມ່ນ້ຳເຊບັ້ງໄຟຊົ່ວຄາວ ໃນ​ວັນ​ທີ 24 ກໍລະກົດ 2018 ຍ້ອນ​ລະດັບ​ນໍ້າ​ໃນ​ເຊບັ້ງ​ໄຟ​ ​ເຂດເມືອງ​ມະຫາ​ໄຊ​ ລຸ່ມ​ເຮືອນ​ຈັກ​ໃກ້​ຈະລົ້ນຕາຝັ່ງ.​ ບໍລິສັດ​ໄດ້​ຫຼຸດ​ການ​ປ່ອຍ​ນໍ້າ​ເລີ່ມ​ແຕ່​ເວລາ 19:00 ​ໂມງ​ຂອງ​ວັນ​ທີ 24 ກໍລະກົດ ​ແລະ ຢຸດ​ການ​ປ່ອຍ​ນໍ້າ ແລະ ການ​ຜະລິດ​ກະແສໄຟຟ້າ ເວລາ 00:00 ໂມງກາງຄືນ​ໃນ​ວັນ​ດຽວກັນ. ​

ໃນວັນທີ 26 ກໍລະກົດ 2018 ຢູ່ເຮືອນຈັກບໍລິສັດ ໄຟຟ້າເທີນ 2 ບ້ານສ້າງ​ແກ້ວ ​ເມືອງ​ຍົມ​ມະ​ລາດ ບໍລິສັດ​ໄຟຟ້າ​ເທີນ 2 ​ໄດ້​ຈັດ​ກອງ​ປະຊຸມ​ປຶກສາ​ຫາລື ກ່ຽວກັບ​ການ​ຢຸດ​ການ​ປ່ອຍ​ນໍ້າ ​ແລະ ​ຢຸດ​ທຳ​ການ ​ຜະລິດ​ກະແສໄຟຟ້າ​ຊົ່ວຄາວ, ​ເນື່ອງ​ຈາກ​ລະດັບ​ນໍ້າ​ເຊບັ້ງ​ໄຟເພີ່ມ​ຂຶ້ນສູງ. ​ເຂົ້າຮ່ວມ​ມີ ທ່ານ ຄຳ​ສອນ ອ້ວນ​ທະວີ ຫົວໜ້າຫ້ອງ​ວ່າການ​ປົກຄອງ​ແຂວງ​ຄຳ​ມ່ວນ ພ້ອມດ້ວຍບັນດາທ່ານ​ ຫົວໜ້າຫ້ອງວ່າການປົກຄອງ​ເມືອງ ທີ່ກ່ຽວຂ້ອງ ​ແລະ ອຳນາດ​ການ​ປົກຄອງ​ບ້ານ ​ຈາກ​ ເມືອງ​ຍົມ​ມະ​ລາດ, ມະຫາ​ໄຊ, ​ເຊບັ້ງ​ໄຟ,​ ໜອງບົກ ແລະ ​ເມືອງໄຊບູລີ ແຂວງ ສະຫວັນນະເຂດ​.

ກອງ​ປະຊຸມ​ດັ່ງກ່າວ​, ທາງ​ບໍລິສັດ ​ແມ່ນ​ໄດ້​ຈັດ​ຂຶ້ນ​ໃນ​ແຕ່ລະ​ປີ​ ໂດຍ​ອີງ​ຕາມ​ຂໍ້​ຕົກລົງ​ເຫັນ​ພ້ອມ​ຂອງ​ສັນຍາ​ສຳ​ປະທານ ​ເພື່ອ​ແນ​ໃສ່​ເຮັດ​ໃຫ້​ຜູ້​ເຂົ້າຮ່ວມ​ໄດ້​ກຳນົດ ​ແລະ ຢັ້ງຢືນວ່າທາງ ບໍລິສັດໄຟຟ້ານໍ້າເທີນ 2 ໄດ້ຢຸດຕິການປ່ອຍນໍ້າ ທັງນຳ​ໄປ​​ເຜີຍ​ແຜ່​ໂຄສະນາ​ ໃຫ້​ປະຊາຊົນ​ບ້ານ​ເປົ້າໝາຍລຽບຕາມ​ແຄມ​ນໍ້​າເຊບັ້ງ​ໄຟ ​ໄດ້​ຮູ້​ສະພາບ​ລວມ ກ່ຽວກັບ​ອຸປະກອນ​ຕ່າງໆ ທີ່​ຕິດຕັ້ງ​ໃນ​ແຕ່ລະ​ຈຸດ​ຂອງ​ລະບົບ​ການ​ວັດ​ແທກ​ນໍ້າ ການ​ບໍລິຫານ​ຈັດ​ເກັບ​ນໍ້າ​ໃນ​ໄລຍະລະດູຝົນ ​ແລະ ​ລະດູ​ແລ້ງ.

ທ່ານ ດູສິດ ພົມມະຈັນ ຫົວໜ້າເຂື່ອນໄຟຟ້ານໍ້າເທີນ 2 ຍັງໄດ້ລາຍ​ງານ ກ່ຽວກັບຂໍ້ມູນ ໃນການດຳເນີນງານຂອງໂຄງການ ລວມທັງ​ການບໍລິຫານນ້ຳ ຢູ່ອ່າງຈັດເກັບນ້ຳ ພ້ອມ​ທັງໄດ້ໃຫ້ຮູ້ເຖິງຈຸດປະສົງ ໃນການຢຸດການຜະລິດກະແສໄຟຟ້າຊົ່ວຄາວ ​ແລະ ຢຸດ​ການ​ປ່ອຍ​ນໍ້າ ລົງສູ່ຄອງສົ່ງນໍ້າ ເຊບັ້ງໄຟ ​ຍ້ອນ​ໃນ​ອາທິດ​ຜ່ານ​ມາ​ ມີ​ຝົນຕົກຫລາຍ​ເຂດ​ອ່າງ​ນໍ້​າເທີນ 2 ລວມທັງ​ຕອນ​ເທິງ​ຂອງ​ນໍ້າ​ເຊບັ້ງ​ໄຟ​. ສະ​ເພາະ​ອ່າງ​ນໍ້​າເທີນ 2 ປັດຈຸ​ບັນ​ ແມ່ນລະດັບ​ນໍ້າຮອດ 535.35 ​ແມັດ ທຽບກັບໜ້ານໍ້າທະ​ເລ​ ເຊິ່ງບໍລິ​ມາດ​ນໍ້າ​ໃນ​ອ່າງ​ປະມານ 2.600 ລ້ານ​ແມັດ​ກ້ອນ,​ ນໍ້າ​ເຕັມ​ອ່າງ​ປະມານ 3.900 ລ້ານ​ແມັດ​ກ້ອນ, ​ເຊິ່ງ​ເນື້ອທີ່​ສາມາດ​ຮັບ​ນໍ້າ​ໄດ້​ຍັງ​ເຫຼືອ​ຢູ່​ປະມານ 1,300 ລ້ານ​ແມັດ​ກ້ອນ. ແຕ່ວ່າ​ປັດຈຸ​ບັນ​ຝົນຍັງ​ຕົກ​ຕໍ່​ເນື່ອງ ຈຳ​ເປັນ​ຈຶ່ງໄດ້​ຢຸດ​ການ​ຜະລິດ​ກະແສໄຟຟ້າ ​ແລະ ​ຢຸດ​ການ​ປ່ອຍ​ນໍ້າ ເພື່ອປະຕິບັດຕາມສັນຍາສຳປະທານ ລະຫວ່າງບໍລິສັດໄຟຟ້ານໍ້າເທີນ 2 ແລະ ລັດຖະບານລາວ ທີ່ໄດ້ເຫັນດີເປັນເອກະພາບກັນ ໃນສັນຍາທີ່ກຳນົດໄວ້ ຄື: ໂຄງການໄຟຟ້າເທີນ 2 ຈະຕ້ອງຫຼຸດອັດຕາການປ່ອຍນ້ຳອອກສູ່ນ້ຳເຊບັ້ງໄຟ ເມື່ອອັດຕາການໄຫຼຂອງນ້ຳເຊບັ້ງໄຟ ຢູ່ເມືອງມະຫາໄຊ ຂຶ້ນຮອດລະດັບ 14.4 ແມັດ.

ມາ​ຮອດ​ວັນ​ທີ 24 ກໍລະກົດ ລະດັບ​ນໍ້າ​ເຊບັ້ງ​ໄຟ​ ຂຶ້ນຮອດ​ເຂດ​ເຕືອນ​ໄຟ ​ເຊິ່ງ​ພວກ​ເຮົາ​ໄດ້​ຢຸດ​ການ​ຜະລິດກະແສ​ໄຟຟ້າ ​ແລະ ຢຸດ​ການ​ປ່ອຍ​ນໍ້າ. ຄາດ​ວ່າ​ຈະຜະລິດ​ໄຟຟ້າ ​ແລະ ປ່ອຍ​ນໍ້າຈົນ​ກວ່າ​ລະດັບ​ນໍ້າ​ຈະ​ຫຼຸດ​ລົງ. ທັງ​ນີ້, ກໍ່​ເພື່ອ​ຄວາມ​ປອດ​ໄພ ຂອງ​ພໍ່​ແມ່​ປະຊາຊົນ​ ທີ່​ຕັ້ງຢູ່​ຕາມ​ລຽບ​ແມ່​ນໍ້າ​ເຊບັ້ງ​ໄຟ.

ໂຄງການ​ນໍ້າ​ເທີນ 2 ​ ແມ່ນ​ໃຫ້ໜັ້ນ​ໃຈ​ໄດ້​ວ່າ ​ໄດ້​ປະຕິບັດຕາມ​ສັນຍາ ​ເພື່ອ​ບໍ່​ໃຫ້​​ເກີດ​ມີ​ນໍ້າ​ຖ້ວມ​ ຍ້ອນ​ການ​ປ່ອຍ​ນໍ້າຂອງ​ໂຄງການ, ທັງຮຽກຮ້ອງມາຍັງ​ພໍ່​ແມ່​ປະຊາຊົນ ​​ແລະ ອຳນາດ​ການ​ປົກຄອງ​ທ້ອງ​ຖິ່ນ ຈົ່ງ​ມີ​ຄວາມໜັ້ນ​ໃຈ​ໄດ້​ວ່າ​ ເຂື່ອນໄຟຟ້າແຫ່ງນີ້ ເປັນ​ເຂື່ອນ​ທີ່​ມີ​ລະບົບ​ການ​ຈັດການ​ທີ່​ດີ, ມີ​ຂັ້ນຕອນ, ມີ​ການກວດ​ສອບ​ປະຈຳ, ມີ​ແຜນ​ສຸກ​ເສີນ ​ແລະ ​ແຜນ​ຕອບ​ສະໜອງ ຖ້າພົບ​ເຫັນ​ສິ່ງ​ໃດ​ຜິດປົກກະຕິ,​ ​ ພະນັກງານ​ທຸກ​ຄົນ​ມີ​ການ​ຝຶກ​ອົບຮົມ ​ແລະ ​ຝຶກ​ຊ້ອມ​ເພື່ອ​ຕອບ​ສະໜອງ​ໃຫ້​ທັນ​ການ ​ແລະ ມີ​ການກວດ​ສອບ​ຕະຫຼອດ,​ ​ມີ​ຄະນະທີ​ປຶກສາ​ດ້ານ​ຄວາມ​ປອດ​ໄພ​ ທັງ​ພາຍ​ໃນ ​ແລະ ​ຕ່າງປະ​ເທດ​ເປັນ​ຢ່າງ​ດີ.

ຂໍ້ມູນ : ຂ່າວສານປະເທດລາວ

© ໂຕະນໍ້າຊາ  | www.tonamcha.com | www.tonamchanews.com

_______