Header Ads

ເຈົ້າແຂວງຈຳປາສັກລົງຢ້ຽມຢາມ ແລະມອບເງິນ 50 ລ້ານກີບ ຊ່ວຍເຫຼືອຜູ້ປະສົບໄພນໍ້າຖວ້ມຢູ່ເມືອງປາກຊ່ອງ



ໃນວັນທີ 26 ກໍລະກົດ 2018 ນີ້ ທ່ານ ປອ. ບຸນຖອງ ດີວິໄຊ ເຈົ້າແຂວງຈຳປາສັກໄດ້ລົງໄປຢ້ຽມຢາມ, ແລະ ມອບເຄື່ອງຊ່ວຍເຫຼືອບັນເທົາທຸກເບື້ອງຕົ້ນແກ່ປະຊາຊົນທີ່ປະສົບໄພນໍ້າຖວ້ມ ຫຼື ອຸປະຕິໄພຈາກເຫດສັນເຂື່ອນໄຟຟ້າເຊປຽນ - ເຊນໍ້ານ້ອຍແຕກຢູ່ແຂວງອັດຕະປື, ໂດຍມີທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ, ມີຫົວໜ້າພະແນກການອ້ອມຂ້າງແຂວງ , ພ້ອມດ້ວຍຄະນະສື່ມວນຊົນຂອງແຂວງເຂົ້າຮ່ວມ. 




ໃນການລົງໄປຢ້ຽມຢາມ, ແລະມອບເຄື່ອງຊ່ວຍເຫຼືອບັນເທົາທຸກແກ່ປະຊາຊົນທີປະສົບໄພນໍ້າຖວ້ມໃນຄັ້ງນີ້,ທ່ານເຈົ້າແຂວງຈຳປາສັກໄດ້ໄປພົບປະໂອ້ລົມ ແລະ ໃຫ້ກຳລັງໃຈແກ່ປະຊາຊົນທີ່ປະສົບເຄາະຮ້າຍ ຢູ່ຈຸດສາງກາເຟຂອງບໍລິສັດດາວເຮືອງ ແລະ ຈຸດບ້ານປາກບ້ອງ ເຊິ່ງທັງສອງຈຸດແມ່ນໄດ້ຍົກຍ້າຍປະຊາຊົນທີ່ຢູ່ລຽບຕາມແຄມແມ່ນໍ້າເຊປຽນທີ່ເປັນຈຸດສ່ຽງ ຈາກການຖືກນໍ້າຖ້ວມ,ນໍ້າຊຸ ແລະ ທັງສອງຈຸດນີ້ກໍ່ເປັນຈຸດທີ່ປະກອບມີຄະນະກຳມະການ ແລະ ຄະນະແພດໝໍທີ່ຄ່ອຍໃຫ້ການຊ່ວຍເຫຼືອ ດ້ານສຸຂະພາບແກ່ ປະຊາຊົນເປັນຢ່າງດີ. ໃນໂອກາດນີ້, ທ່ານເຈົ້າແຂວງຈຳປາສັກຍັງໄດ້ມອບເງິນຊ່ວຍເຫຼືອແກ່ປະຊາຊົນທີ່ປະສົບໄພນໍ້າຖວ້ມ ມູນຄ່າ 50 ລ້ານກີບ ແລະ ເຄຶ່ອງອຸປະໂພກ ບໍລິໂພກອີກຈຳນວນໜຶ່ງ. 

ພ້ອມນັ້ນ, ທ່ານ ສຸລິວັນ ສະຫວັດທະສິນ, ເຈົ້າຄອງນະຄອນປາກເຊ ຍັງໄດ້ມອບເງິນມູນຄ່າ 10 ລ້ານກີບ ແລະ ເຄື່ອງອຸປະໂພກບໍລິໂພກເຊິ່ງຮັບໂດຍຄະນະກຳມະການຊ່ວຍເຫຼືອບັນເທົ່າທຸກປະຊາຊົນທີ່ປະຈຳຢູ່ທັງສອງຈຸດຂອງເມຶອງປາກຊ່ອງ. ສຳລັບຈຸດສາງດາວເຮືອງມາຮອດວັນທີ 26 ກໍລະກົດ ສາມາດຊ່ວຍກອບກູ້ຍົກຍ້າຍປະຊາຊົນມາຈາກຈຸດຕົກຄ້າງສ່ຽງໄພ ມາສູ່ທີ່ພັກປອດໄພໄດ້ ເພີ່ມຂື້ນ ຈາກວັນທີ 25 ຜ່ານມາ 113 ຄອບຄົວ ພົນລະເມືອງ 688 ຄົນ ມາເປັນ 151 ຄອບຄົວ ຈຳນວນ 811 ຄົນແລ້ວ, ສ່ວນຈຸດບ້ານປາກບ້ອງມີປະຊາຊົນໄດ້ຮັບການຍົກຍ້າຍມາພັກທັງໝົດ 90 ຄອບຄົວ ມີພົນລະເມຶອງທັງໝົດ 528 ຄົນ. 

ໃນໂອກາດນີ້, ປະຊາຊົນ ແລະ ຄະນະກຳມະການທີ່ໃຫ້ການຊ່ວຍເຫຼືອທັງສອງຈຸດຕ່າງກໍ່ເວົ້າສຽງດຽວກັນວ່າ: ສິ່ງທີ່ຂາດແຄນ ແລະ ມີຄວາມຕ້ອງການຫລາຍກ່ວາຫມູ່ ແມ່ນຜ້າຮົ່ມ, ເຄື່ອງນຸ່ງຮົ່ມ ແລະ ເຄື່ອງອຸປະໂພກບໍລິໂພກເພາະລັກສະນະຈຸດພິເສດຂອງເມຶອງປາກຊ່ອງເປັນເມຶອງທີ່ມີອາກາດໜາວເຢັນ ມັກມີຝົນຕົກລິນຕະຫລອດລະດູຝົນ, ດັ່ງນັ້ນຈິ່ງຂໍຄວາມເມດຕາກະລຸນາມາຍັງທຸກພາກສ່ວນຈົ່ງໃຫ້ການຊ່ວຍເຫຼືອດ້ວຍ. ນອກຈາກນັ້ນ, ຄະນະຂອງທ່ານເຈົ້າແຂວງຍັງໄດ້ສືບຕໍ່ເດີນທາງໄປເບິ່ງຈຸດທີ່ສັນເຂື່ອນແຕກ ທີ່ຈຸດບ້ານຫວຍຈອດ ແລະ ບ້ານໜອງພະໜວນ ນຳອີກ. 


ຂ່າວ: ນາງ ພິລາວັນ ເພັງສະຫວັດ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.