Header Ads

ກະ­ຊວງ​ສາ­ທາ­ລະ­ນະ​ສຸກລາຍງານ 6 ເດືອນຕົ້ນປີມີຜູ້ເສຍຊີວິດຍ້ອນພະຍາດໄຂ້ຍຸງລາຍ 12 ຄົນ



ໄຂ້­ຍຸງ​ລາຍ​ເປັນ​ພະ­ຍາດ​ໜຶ່ງ​ທີ່​ສົ່ງ​ຜົນ​ກະ­ທົບ​ຕໍ່​ສຸ­ຂະ­ພາບ ແລະ ຊີ­ວິດ​ຂອງ​ປະ­ຊາ­ຊົນ ໂດຍ​ສະ­ເພາະ ໃນ​ໄລ­ຍະ​ລະ­ດູ­ຝົນ ອີງ​ຕາມ​ການ​ໃຫ້​ຂໍ້​ມູນ​ຂອງ​ກະ­ຊວງ​ສາ­ທາ­ລະ­ນະ​ສຸກ ໄດ້​ໃຫ້​ຮູ້​ວ່າ: ເລີ່ມ​ແຕ່​ວັນ​ທີ 30 ທັນ­ວາ 2017 ຫາ 18 ກໍ­ລະ­ກົດ 2018 ໄດ້​ມີ​ຈຳ­ນວນ​ຄົນ​ເຈັບ​ພະ­ຍາດ​ໄຂ້­ຍຸງ​ລາຍ​ໃນ​ທົ່ວ​ປະ­ເທດ​ທັງ​ໝົດ 2.426 ກໍ­ລະ­ນີ ແລະ ກໍ­ລະ­ນີ​ເສຍ​ຊີ­ວິດ​ເຖິງ 12 ກໍ­ລະ­ນີ ໃນ​ນັ້ນ ສະ­ຫວັນ​ນະ​ເຂດ​ມີ 6 ກໍ­ລະ­ນີ ຈຳ­ປາ​ສັກ ແລະ ອັດ​ຕະ​ປື 2 ກໍ­ລະ­ນີ ສ່ວນ ສາ­ລະ​ວັນ ແລະ ໄຊ​ຍະ​ບູ​ລີ 1 ກໍ­ລະ­ນີ ທຽບ­ໃສ່​ໄລ­ຍະ​ດຽວ​ກັນ​ກັບ​ປີ 2017 ເພີ່ມ​ຂຶ້ນ ສະ­ເພາະ​ໃນ​ປີ 2017 ໄດ້​ມີ​ກໍ­ລະ­ນີ​ຄົນ​ເຈັບ​ໄຂ້­ຍຸງ​ລາຍ 5.584 ກໍ­ລະ­ນີ.



ເພື່ອ​ເປັນ​ການ​ຕ້ານ ແລະ ສະ­ກັດ​ກັ້ນ​ພະ­ຍາດ​ດັ່ງ­ກ່າວ​ບໍ່​ໃຫ້​ມີ​ກໍ­ລະ­ນີ​ເພີ່ມ​ຂຶ້ນ ທາງ​ພາກ­ສ່ວນ​ກ່ຽວ­ຂ້ອງ ໂດຍ​ສະ­ເພາະ ຂະ­ແໜງ​ສາ­ທາ­ລະ­ນະ​ສຸກ​ໄດ້​ເລັ່ງ​ໃຫ້​ຄວາມ​ຮູ້ ແລະ ປຸກ­ລະ­ດົມ​ໃຫ້​ປະ­ຊາ­ຊົນ​ເອົາ­ໃຈ­ໃສ່​ປະ­ຕິ­ບັດ​ຕາມ 5 ປ ທີ່​ທຸກ​ຄົນ​ຕ້ອງ​ເອົາ­ໃຈ­ໃສ່​ປະ­ຕິ­ບັດ ປະ­ກອບ​ມີ ປິດ​ຝາ​ພາ­ຊະ­ນະ​ທີ່​ເກັບ​ນ້ຳ​ໃນ​ເຮືອນ ແລະ ນອກ​ເຮືອນ ເພື່ອ​ບໍ່​ໃຫ້​ຍຸງ​ມາ​ໄຂ່​ໃສ່ ປ່ຽນ​ນ້ຳ​ໃນ​ພາ­ຊະ­ນະ ເຊັ່ນ: ເຕົ້າ​ດອກ​ໄມ້ ນ້ຳ​ຮອງ​ຕີນ​ຕູ້ ຖ້ານ​ຮອງ​ຈອກ​ນ້ຳ ປ່ອຍ​ປາ​ຫາງ​ນົກ​ຍຸງ​ເພື່ອ​ກິນ​ໜອນ​ນ້ຳ ປັບ­ປຸງ​ອະ­ນາ­ໄມ​ສິ່ງ­ແວ­ດລ້ອມ​ອ້ອມ​ເຮືອນ​ບໍ່​ໃຫ້​ມີ​ກະ­ໂປະ​ກະ​ປ໋ອງ ຢາງ​ຕີນ­ລົດ​ເກົ່າ​ທີ່​ມີ​ນ້ຳ​ຂັງ ປະ­ຕິ­ບັດ​ໃຫ້​ເປັນ​ນິ­ໄສ​ປະ­ຈຳ​ທຸກໆ​ອາ­ທິດ ຖ້າ​ເປັນ­ໄຂ້​ໃຫ້​ໄປ​ພົບ​ແພດ​ໝໍ​ດ່ວນ ພຽງ​ເທົ່າ​ນີ້​ທ່ານ​ກໍ່​ສາ­ມາດ​ປອດ​ໄພ​ຈາກ​ການ​ເປັນ​ພະ­ຍາດ​ໄຂ້­ຍຸງ​ລາຍ.




ພາບ-ຂ່າວ: ນສພ ວຽງຈັນໃຫ່ມ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.