Header Ads

ມູນຄ່າການຊົດເຊີຍທາງດ່ວນ ວຽງຈັນ ໄຮເວ ອາດສູງກວ່າ 40 ລ້ານໂດລາສະຫະລັດ


ໂຄງການກໍ່ສ້າງເສັ້ນທາງດ່ວນ ວຽງຈັນ ໄຮເວ ທີ່ມີຄວາມຍາວ 15,3 ກິໂລແມັດ ເພື່ອໃຫ້ເປັນເສັ້ນທາງຄູ່ຂະໜານກັບຖະໜົນ ໄກສອນ ພົມວິຫານ ທີ່ຕັດຜ່ານຫຼາຍບ້ານ ອາດມີມູນຄ່າການຊົດເຊີຍເວນຄືນຫຼາຍກວ່າ 40 ລ້ານໂດລາສະຫະລັດ, ປັດຈຸບັນກຳລັງຢູ່ໃນຂັ້ນຕອນຂອງການໄກເກ່ຍກັບປະຊາຊົນທີ່ຖືກໂຄງການຄາດຈະລົງມືກໍ່ສ້າງໃນຕົ້ນປີໜ້າ.

ທ່ານ ບຸນທາມ ພຸດທະວົງ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມລາຍງານໃນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫຼວງວຽງຈັນ ທີ່ດຳເນີນລະຫວ່າງວັນທີ 16 – 18 ກໍໍລະກົດ ວ່າ: ໂຄງການກໍ່ສ້າງທາງດ່ວນ ວຽງຈັນ ໄຮເວ ທີ່ໄດ້ມີການສໍາຫຼວດມາແຕ່ປີ 2017 ໂດຍ ບໍລິສັດ ນໍລິນໂກ ສປ ຈີນ ແລະ ບໍລິສັດ ເອເຊຍ ລົງທຶນພັດທະນາ ແລະ ກໍ່ສ້າງ ຈຳກັດຜູ້ດຽວ ເຊິ່ງບໍລິສັດໄດ້ສະເໜີສຳປະທານໂຄງການໃນຮູບແບບ BOT ອາຍຸຸສຳປະທານ 50 ປີ, ປັດຈຸບັນອໍານາດການປົກຄອງກໍາລັງຫາລືກັບປະຊາຊົນຜູ້ທີ່ໄດ້ຮັບຜົນກະທົບໃນການຊົດເຊີຍ ແລະ ເວນຄືນ ເພື່ອເຮັດໃຫ້ໂຄງການດັ່ງກ່າວຂັບເຄື່ອນໂດຍໄວ ແລະ ໄດ້ເລີ່ມລົງມືກໍ່ສ້າງໃນຕົ້ນປີ 2019 ນີ້ ໂດຍມີກໍານົດການກໍ່ສ້າງໄລຍະທີ 1 ປະມານ 2 ປີກວ່າ, ຕາມການປະເມີນເບື້ອງຕົ້ນມູນຄ່າການຊົດເຊີຍຈະຢູ່ລະຫວ່າງ 40 ລ້ານກວ່າໂດລາສະຫະລັດ.

ໂຄງການກໍ່ສ້າງທາງດ່ວນ ວຽງຈັນ ໄຮເວ ມີຄວາມຍາວທັງໝົດ 15,3 ກິໂລແມັດ ເຊິ່ງຜ່ານເມືອງໄຊທານີ 6 ບ້ານ ມີຄວາມຍາວປະມານ 7 ກິໂລແມັດ ຄື: ບ້ານນາແຄ, ບ້ານໄຊ, ໄຊສະຫວ່າງ, ດົງສ້າງຫີນ, ດອນຕິ້ວ ແລະ ບ້ານດົງໝາຍຄາຍ; ສ່ວນເມືອງໄຊເຊດຖາ ມີ 8 ກວ່າກິໂລແມັດ ຜ່ານ 12 ບ້ານ ຄື: ບ້ານໂນນຄໍ້, ຮ່ອງແກ, ທາດຫຼວງໃຕ້, ວຽງຈະເລີນ, ຫົວຂົວ, ໂນນສະຫວ່າງ, ໂນນສະຫງ່າ, ວັງຊາຍ, ໂພນພະເນົາ, ໜອງໜ່ຽງ, ຮ່ອງສຸພາບ ແລະ ບ້ານໂຊກໃຫຍ່.



ອີງໃສ່ຄວາມພ້ອມ ແລະ ຈຸດພິເສດຂອງໂຄງການແມ່ນເປັນຮູບແບບ BOT ມີແຜນການກໍ່ສ້າງ 3 ໄລຍະ, ທາງຄະນະກຳມະການທີ່ຖືກແຕ່ງຕັ້ງໄດ້ດຳເນີນການສຳຫຼວດ ແລະ ປະສານສົມທົບໂດຍກົງກັບການຈັດຕັ້ງຂັ້ນພື້ນຖານບ້ານ ແລະ ປະຊາຊົນທີ່ນອນໃນເຂດໂຄງການ, ໄດ້ເຈລະຈາກັບຜູ້ທີ່ໄດ້ຮັບຜົນກະທົບ ແລະ ໄດ້ສ້າງບົດບັນທຶກຊົດເຊີຍຮ່ວມກັນ ໂດຍມີການຈັດຕັ້ງບ້ານເປັນຜູ້ຮັບຮອງເອົາ, ຄະນະກຳມະການທີ່ຖືກແຕ່ງຕັ້ງຈາກນະຄອນຫຼວງວຽງຈັນ ແມ່ນໃຫ້ກວດກາຄືນການສ້າງບົດບັນທຶກເຈລະຈາຕໍ່ລອງລະຫວ່າງບໍລິສັດ ແລະ ຜູ້ໄດ້ຮັບຜົນກະທົບ ໂດຍສົມທົບກັບເມືອງ ແລະ ບ້ານ ໂດຍກວດກາ ແລະ ສ້າງບົດບັນທຶກຮັບຮອງຄືນໃໝ່ລະຫວ່າງ ເດືອນມິຖຸນາ ຫາ ເດືອນກໍລະກົດ 2018 ໃຫ້ສຳເລັດ, ໃຫ້ຫົວໜ່ວຍລາຄາຊົດເຊີຍມີລາຄາໃກ້ຄຽງກັບລາຄາຊື້ – ຂາຍຕົວຈິງຕາມປະເພດຂອງດິນ.

ຢ່າງໃດກໍ່ຕາມ, ສະມາຊິກສະພາຫຼາຍທ່ານກໍ່ໄດ້ສະແດງຄວາມຫ່ວງໄຍຕໍ່ປະຊາຊົນໃນການເວນຄືນທີ່ດິນໃຫ້ມີຄວາມເໝາະສົມທີ່ສຸດ ເພື່ອເຂົາເຈົ້າຈະໄດ້ມີທຶນຮອນໃນການຍົກຍ້າຍໄປຕັ້ງຖິ່ນຖານຢູ່ເຂດອື່ນ, ການຊົດເຊີຍຄວນກຳນົດຢ່າງຈະແຈ້ງ.


 ຂ່າວ: ສຸລິນ (ນສພ ເສດຖະກິດ-ການຄ້າ)
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.