Header Ads

ທ່ານຮອງນາຍົກ ຕ້ອນຮັບຄະນະຜູ້ແທນສູນຄົ້ນຄວ້າ ພັດທະນາສະພາແຫ່ງລັດ ສປ ຈີນ



​​​ໃນຕອນບ່າຍ ຂອງວັນທີ 12 ກໍລະກົດ 2018 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງທ່ານ ຫວັງ ແອນຊູນ ຮອງຫົວໜ້າສູນຄົ້ນຄວ້າ ພັດທະນາສະພາແຫ່ງລັດ ສປ ຈີນ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 9-13 ກໍລະກົດ 2018.



ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຮ່ວມກັບ ສະຖາບັນຄົ້ນຄວ້າເສດຖະກິດແຫ່ງຊາດ ແຫ່ງ ສປປ ລາວ, ເຊິ່ງເປັນການຈັດຕັ້ງຜັນຂະຫຍາຍ ບັນດາເນື້ອຈິດໃຈ ທີ່ການນຳຂັ້ນສູງ ຂອງສອງພັກ, ສອງລັດຖະບານ ໄດ້ເຊັນສັນຍາພົວພັນຮ່ວມມືກັນແລ້ວນັ້ນ ໃຫ້ປະກົດຜົນເປັນຈິງ, ທັງເປັນການປະກອບສ່ວນ ເສີມສ້າງສາຍພົວພັນ ແລະ ການຮ່ວມມື ຂອງສອງພັກ, ສອງລັດ ແລະ ປະຊາຊົນສອງຊາດ ທີ່ເປັນມູນເຊື້ອອັນດີງາມມາແຕ່ດົນນານແລ້ວນັ້ນ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນເປັນກ້າວໆ. ພ້ອມດຽວກັນນັ້ນ, ທ່ານຍັງໄດ້ສະແດງຄວາມຂອບໃຈ ຕໍ່ການສະໜັບສະໜູນ ແລະ ຊ່ວຍເຫຼືອ ຂອງລັດຖະບານ ແລະ ປະຊາຊົນຈີນ ໃນໄລຍະຜ່ານມາ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງສປປ ລາວ ໃຫ້ຂະຫຍາຍຕົວຢ່າງຕົວເນື່ອງ, ສາມາດແກ້ໄຂຊີວິດການເປັນຢູ່ ຂອງປະຊາຊົນລາວບັນດາເຜົ່າ ນັບມື້ດີຂຶ້ນເປັນກ້າວໆ. ນອກຈາກນັ້ນ, ທ່ານຍັງໄດ້ສະເໜີໃຫ້ ສູນຄົ້ນຄວ້າພັດທະນາສະພາແຫ່ງລັດ ສປ ຈີນ ສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສະຖາບັນຄົ້ນຄວ້າເສດຖະກິດແຫ່ງຊາດ ແຫ່ງ ສປປ ລາວ ໂດຍສະເພາະແມ່ນ ການຖ່າຍທອດບົດຮຽນ, ປະສົບການ, ເຕັກນິກວິຊາການ ໃນການຄົ້ນຄວ້າ, ການພັດທະນາຊັບພະຍາກອນມະນຸດ ແລະ ອື່ນໆ. ໃນນັ້ນ, ອັນສຳຄັນ ແມ່ນການຄົ້ນຄວ້ານະໂຍບາຍ ໃນການພັດທະນາ ແລະ ຄຸ້ມຄອງເສດຖະກິດ, ການແກ້ໄຂຄວາມທຸກຍາກຂອງປະຊາຊົນ, ການຊຸກຍູ້ສົ່ງເສີມການລົງທຶນ ແລະ ອື່ນໆ.

​​​​ໃນໂອກາດດຽວກັນ, ທ່ານຮອງຫົວໜ້າສູນຄົ້ນຄວ້າ ພັດທະນາສະພາແຫ່ງລັດ ສປ ຈີນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງນາຍົກລັດຖະມົນຕີ ແຫ່ງ ສປປ ລາວ ໃນຄັ້ງນີ້. ພ້ອມທັງ ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສປ ຈີນ ແລະ ສປປ ລາວ ເຊິ່ງນັບວ່າເປັນໄລຍະທີ່ພົ້ນເດັ່ນ ແລະ ກຳລັງໄດ້ຮັບການຍົກລະດັບສູງຂຶ້ນຢ່າງຕໍ່ເນື່ອງ. ໃນໂອກາດນີ້, ທ່ານຍັງໄດ້ລາຍງານໃຫ້ທ່ານຮອງນາຍົກລັດຖະມົນຕີ ຊາບ ກ່ຽວກັບຜົນການເຄື່ອນໄຫວຢ້ຽມຢາມ ແລະ ເຄື່ອນໄຫວເຮັດວຽກ ຮ່ວມກັບ ສະຖາບັນຄົ້ນຄວ້າເສດຖະກິດແຫ່ງຊາດ ແຫ່ງ ສປປ ລາວ ໃນໄລຍະມາເຄື່ອນໄຫວເຮັດວຽກຢູ່ ສປປ ລາວ ໃນຄັ້ງນີ້.


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ 
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.