Header Ads

ຣັດເຊຍສົ່ງມອບຍົນທະຫານ 4 ລຳໃຫ້ທາງການລາວ



ບໍລິສັດເຮລີຄອບເຕີ ຣັດເຊຍ ໄດ້ມອບຍົນເຮລີຄອບເຕີ ມີ-17 ຈຳນວນ 4 ລຳໃຫ້ທາງການລາວກໍ່ຄື ກົມທະຫານອາກາດກອງທັບປະຊາຊົນລາວ ພາຍຫຼັງໄດ້ລົງມືສ້ອມແປງມາແຕ່ເດືອນພະຈິກປີ 2016 ຊຶ່ງທັງ 4 ລຳນີ້ແມ່ນຈະຮັບໃຊ້ວຽກງານປ້ອງກັນຊາດໄປຍາວນານເຖິງ 8 ປີຈິ່ງຈະມີການສ້ອມແປງຮອບໃໝ່.




ທ່ານ ເຊຣ ວາຊີລີເຢວິດ ກູເຊບ ຜູ້ອຳນວຍການຝ່າຍບໍລິການຫຼັງການຂາຍ ຂອງກຸ່ມບໍລິສັດເຮລີຄອບເຕີ ຣັດເຊຍກ່າວວ່າ: ອຸປະກອນເຕັກນິກຂອງເຮືອບິນຣັດເຊຍປະມານ 90% ແມ່ນຖືກນຳໃຊ້ເຂົ້າໃນເຫຼົ່າລົບທະຫານອາກາດ ແລະບັນດາເຮືອບິນເຫຼົ່ານັ້ນມີຄວາມຈຳເປັນຕ້ອງໄດ້ຮັບການສ້ອມແປງໃຫ້ທັນເວລາຕາມຄວາມເໝາະສົມ ແລະຕໍ່ຊົ່ວໂມງບິນ ຊຶ່ງເຮືອບິນທັ້ງ 4 ລຳນັ້ນແມ່ນໄດ້ນຳໃຊ້ມາຫຼາຍປີແລ້ວຈິ່ງຄວນໄດ້ຮັບການປົວແປງໃໝ່ ທັງເປັນສັນຍາຄັ້ງທຳອິດຂອງການຮ່ວມມືລາວ-ຣັດເຊຍກ່ຽວກັບການສ້ອມແປງເຮືອບິນ ເນື່ອງຈາກທີ່ຜ່ານມາ ສປປ ລາວແມ່ນຊື້ເຮືອບິນຈາກບໍລິສັດຮຸ້ນສ່ວນຂອງ ເຮລີຄອບເຕີຣັດເຊຍມາຕະຫຼອດ.



ໃນດ້ານຂອງການສ້ອມແປງ ພາກສ່ວນລຳໂຕແມ່ນໃຫ້ຊ່າງຈາກບໍລິສັດຢູ່ຣັດເຊຍມາດຳເນີນການສ້ອມແປງຢູ່ລາວ ແຕ່ບັນດາເຄື່ອງຈັກສຳຄັນແມ່ນໄດ້ນຳເອົາໄປແປງຢູ່ໂຮງງານທີ່ໄດ້ມາດຕະຖານສາກົນຂອງຣັດເຊຍ. ຂະບວນການສ້ອມແປງສຳເລັດຖືວ່າເຫຼົ່າລົບທະຫານອາກາດລາວໄດ້ພະຫະນະທີ່ສາມາດບິນໄດ້ເຖິງ 2.000 ຊົ່ວໂມງມາພ້ອມກັນ 4 ລຳ ພ້ອມຮັບປະກັນອາຍຸການໃຊ້ງານແມ່ນ 8 ປີ ຈິ່ງຈະມີການສ້ອມແປງອີກຮອບໃໝ່.



ທ່ານຫົວໜ້າກົມໃຫຍ່ເສນາທິການກອງທັບປະຊາຊົນລາວກ່າວວ່າ: ສັນຍາການຮ່ວມທີ່ສຳເລັດລົງໃນຂັ້ນພື້ນຖານອັນສາມາດກ້າວສູ່ການມອບ-ຮັບໃນຄັ້ງນີ້ແມ່ນສະແດງໃຫ້ເຫັນເຖິງຄວາມເຕີບໃຫຍ່ຂະຫຍາຍຕົວໃນສາຍພົວພັນຮ່ວມມືທີ່ສະໜິດແໜ້ນໃນວຽກງານປ້ອງກັນຊາດຂອງສອງຝ່າຍ ແລະຍັງສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຂອງກອງທັບປະຊາຊົນລາວຕໍ່ການນຳໃຊ້ຜະລິດຕະພັນຂອງສະຫະພັນຣັດເຊຍອີກດ້ວຍ.



ທ່ານຍັງກ່າວສະແດງຄວາມເຊື່ອໝັ້ນຕໍ່ການສ້ອມແປງຄັ້ງນີ້ຈະເປັນການປະກອບສ່ວນອັນໃຫຍ່ຫຼວງໃນການຈັດຕັ້ງປະຕິບັດສອງໜ້າທີ່ຍຸດທະສາດໃນການປົກປັກຮັກສາ ແລະສ້າງສາປະເທດຊາດ ໃຫ້ເພີ່ມທະວີຄວາມສາມາດຂອງກອງທັບປະຊາຊົນລາວໃນການເຮັດສຳເລັດໜ້າທີ່ຂອງຕົນໃນສະເພາະໜ້າ ແລະຍາວນານ, ກອງທັບໃຫ້ສັນຍາວ່າຈະນຳໃຊ້ຍົນທັງໝົດທີ່ມີເຂົ້າໃນວຽກງານຕົວຈິງຢ່າງມີປະສິດທິຜົນ.




ພິທີມອບ-ຮັບເຮືອບິນທັງ 4 ລຳໄດ້ຈັດຂຶ້ນທີ່ກອງກຽດຕິຍົດທະຫານອາກາດກອງທັບປະຊາຊົນລາວ ນະຄອນຫຼວງວຽງຈັນ ໃນຕອນເຊົ້າວັນທີ 12 ກໍລະກົດ 2018ນີ້ ໂດຍມີທ່ານ ພົ.ຕ ພຸວົງ ວົງພົມ ຮອງລັດຖະມົນຕີກະຊວງປ້ອງກັນປະເທດ, ມີທ່ານເອກອັກຂະລາຖະທູດຣັດເຊຍປະຈຳລາວ, ພ້ອມບັນດາພາກສ່ວນກ່ຽວຂ້ອງເຂົ້າຮ່ວມ.

ທີ່ມາ: ນສພ ເສດຖະກິດ-ການຄ້າ
© ໂຕະນໍ້າຊາ  | www.tonamcha.com | www.tonamchanews.com
_______




No comments

Powered by Blogger.