Header Ads

ດ່ານພາສີສາກົນປາກຊັນ ເກັບລາຍຮັບເກີນແຜນ 5 ເດືອນ ປະຕິບັດໄດ້ 128 ຕື້ກີບ




ອີງຕາມການລາຍງານຂອງ ສໍານັກຂ່າວສານປະເທດລາວ  ວ່າ:  ການປະຕິບັດແຜນງົບປະມານແຫ່ງລັດ ຂອງດ່ານພາສີສາກົນປາກຊັນ ແຂວງ ບໍລິຄຳໄຊ ມີລັກສະນະເພີ່ມຂຶ້ນ, ເນື່ອງຈາກວ່າ ການນຳເຂົ້ານໍ້າມັນເຊື້ອໄຟ-ອາຍແກັດ, ພາຫະນະ, ເຄື່ອງກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິໂພກຈໍານວນໜຶ່ງ ເພີ່ມຂຶ້ນຕໍ່ເນື່ອງ, ​ເຊິ່ງສະແດງອອກ ໃນການຈັດເກັບລາຍຮັບເຂົ້າງົບປະມານ 5 ເດືອນຜ່ານ​ມາ ສາມາດປະຕິບັດໄດ້ທັງໝົດ 128 ຕື້ກວ່າກີບ, ລື່ນ​ແຜນການ 43 ຕື້​ກວ່າ​ກີບ ​ເທົ່າ​ກັບ 151,44% ແລະ ເທົ່າກັບ 63,10% ຂອງແຜນການປີ.


ທ່ານ ໄຊຊະນະ ວົງຊົມພູ ຮອງຫົວໜ້າດ່ານ ພາສີສາກົນປາກຊັນ ໃຫ້ສຳພາດເມື່ອທ້າຍອາທິດຜ່ານມານີ້ວ່າ: ການຈັດຕັ້ງປະຕິບັດວຽກງານ ຂອງດ່ານພາສີສາກົນປາກຊັນ ໃນໄລຍະ 5 ເດືອນຜ່ານມາ (ເດືອນມັງກອນ-ເດືອນພຶດສະພາ) ປີ 2018 ເຫັນວ່າມີຄວາມສະດວກ, ມີທ່ວງທ່າທີ່ດີພໍສົມຄວນ ເປັນຕົ້ນ ຖານລາຍຮັບຈາກການນໍາເຂົ້າພາຫະນະ ແລະ ການນໍາເຂົ້າ ປະເພດນໍ້າມັນເຊື້ອໄຟ ແມ່ນຍັງປົກກະຕິ ເຮັດໃຫ້ການຂຶ້ນແຜນລາຍຮັບ ຈາກໝວດສິນຄ້າດັ່ງກ່າວ, ໄດ້ຕາມແຜນການ ແລະ ລື່ນແຜນການ ທີ່ວາງໄວ້, ແຕ່ແຜນການ ລາຍຮັບ ບາງໝວດສິນຄ້າຈໍານວນໜຶ່ງ ແມ່ນຍັງບໍ່ທັນໄດ້ຕາມແຜນການ ເຊັ່ນ: ການຈັດຕັ້ງປະຕິບັດແຈ້ງການເລກທີ 15/ນຍ ຢຸດສົ່ງໄມ້ທ່ອນ, ໄມ້ແປຮູບ, ການປະຕິບັດ ແຜນຫລຸດ ຜ່ອນອັດຕາພາສີ ກອບອາຊຽນ ມີຫລາຍສີນຄ້າອັດຕາພາສີ 0%.

ສໍາລັບປີ 2018 ດ່ານພາສີສາກົນປາກຊັນ ໄດ້ຮັບຕົວເລກ ຈັດເກັບລາຍຮັບທັງໝົດຈໍານວນ 204 ຕື້ກວ່າກີບ, ຜ່ານການຈັດຕັ້ງປະຕິບັດວຽກງານວິຊາສະເພາະ ໃນໄລຍະ 5 ເດືອນຜ່ານມາ ສາມາດຈັດເກັບ ລາຍຮັບໄດ້ລື່ນ​ແຜນ. ໃນນີ້, ດ່ານພາສີສາກົນປາກຊັນ ປະຕິບັດໄດ້ 127 ຕື້ກວ່າກີບ, ດ່ານປະເພນີ ປາກກະດິງ 30 ລ້ານກວ່າກີບ, ດ່ານປະເພນີ ທ່າສະອາດ 40 ລ້ານກວ່າກີບ, ດ່ານປະເພນີບ້ານທວຍ 162 ລ້ານກວ່າກີບ ແລະ ໜ່ວຍງານຄຸ້ມຄອງພາຫະນະ ແລະ ຜູ້ໂດຍສານປະຕິບັດໄດ້ 759 ລ້ານກວ່າກີບ.

ທ່ານໄຊຊະນະ ວົງຊົມພູ ​ໃຫ້​ຮູ້ຕື່ມວ່າ: ເພື່ອເຮັດໃຫ້ການຈັດເກັບລາຍຮັບ ໃນຕໍ່ໜ້າ ໄດ້ຮັບຜົນສໍາເລັດຕາມຄາດໝາຍ ດ່ານພາສີສາກົນປາກຊັນ ຈະສືບຕໍ່ປັບປຸງແບບ ແຜນວິທີນໍາພາ, ແບ່ງຄວາມຮັບຜິດ ຊອບຈັດວາງພະນັກງານ ເຂົ້າໃສ່ບັນດາຈຸງານ ແລະ ດ່ານປະເພນີ ໃຫ້ມີຄວາມຄ່ອງຕົວ ໃນການປະຕິບັດໜ້າທີ່ວຽກງານ, ທັງລົງເລິກຕິດຕາມ ກວດກາປະເມີນຜົນ. ພ້ອມທັງ, ເພີ່ມທະວີການຄຸ້ມຄອງກວດກາສິນຄ້າເຂົ້າ -ອອກດ່ານ ໃຫ້ມີຄວາມເຂັ້ມງວດ, ສືບຕໍ່ໂຄສະນາເຜີຍແຜ່ກົດໝາຍວ່າດ້ວຍພາສີ, ລະບຽບການຕ່າງໆ ໃຫ້ພາກສ່ວນທຸລະກິດ, ຜູ້ປະກອບການ ເຂົ້າໃຈຢ່າງກວ້າງ ຂວາງ ເພື່ອສ້າງເງື່ອນໄຂ ໃຫ້ເຂົາເຈົ້າປະກອບສ່ວນຢ່າງຕັ້ງໜ້າ, ເອົາໃຈໃສ່ຢ່າງຕັ້ງໜ້າ ໃນການກວດກາການສົ່ງອອກຫີນກໍ່ສ້າງ, ຜະລິດຕະພັນໄມ້ສໍາເລັດຮູບ ໂດຍໃຫ້ຖືກຕ້ອງ ສອດຄ່ອງຕາມນິຕິກໍາ ແລະ ແຈ້ງການທີ່ໄດ້ອອກມາຕາມລະບຽບກົດໝາຍ, ຕ້ານ ແລະ ສະກັດກັ້ນ ການລັກລອບໜີພາສີ ທັງໃນດ່ານ ແລະ ນອກດ່ານ ເພື່ອບໍ່ໃຫ້ເກີດການຮົ່ວໄຫລ ແລະ ເຮັດໃຫ້ການຈັດເກັບລາຍຮັບ ບັນລຸຕາມແຜນການທີ່ກໍານົດໄວ້.


ພາບ ແລະ ຂ່າວ: ສໍານັກຂ່າວສານປະເທດລາວ
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.