Header Ads

ຄາດຈະເລີ່ມກໍ່ສ້າງທາງດ່ວນ ວຽງຈັນ ໄຮເວ (Vientaine Highway) ໃນປີ 2019



ໃນ​ວັນ​ທີ 17 ກໍລະກົດ 2018 ທີ່ຜ່ານມາ ​ຢູ່​ໃນ​ກອງ​ປະຊຸມ​ສະ​ໄໝສາມັນ​ເທື່ອ​ທີ 5 ສະພາ ນະຄອນຫຼວງ​ວຽງຈັນ ທ່ານ ບຸນ​ທາມ ພຸດ​ທະ​ວົງສາ ຫົວໜ້າພະ​ແນ​ກຊັບພະຍາກອນທຳ​ມະ​ຊາດ ​ແລະ ສິ່ງ​ແວດ​ລ້ອມ ນະຄອນຫຼວງ​ວຽງຈັນ ​ໄດ້​ຊີ້​ແຈງ​ກ່ຽວກັບ​ຮ່າງ​ຂໍ້​ຕົກລົງ​ເຈົ້າຄອງ​ນະຄອນຫຼວງ​ວຽງຈັນ ວ່າ​ດ້ວຍ​ການ​ກຳນົດ​ຂອບ​ເຂດ ​ແລະ ປະ​ເມີນ​ຫົວໜ່ວຍທົດ​ແທນ​ຄ່າ​ເສຍ​ຫາຍ​ໃຫ້​ຜູ້​ຖືກ​ຜົນ​ກະທົບ​ຈາກ​ໂຄງການ​ກໍ່ສ້າງ​ທາງ​ດ່ວນ ວຽງຈັນ ​ໄຮ​ເວ ​ວ່າ: ​ໂຄງການ​ກໍ່ສ້າງ​ທາງ​ດ່ວນ ວຽງຈັນ ​ໄຮ​ເວ ​​ເປັນ​ໂຄງການ​ໃຫຍ່​ທີ່​ສຳຄັນ ​ໂດຍ​ບໍລິສັດ ນໍລິນ​ໂກ ສປ ຈີນ ​ແລະ ບໍລິສັດ ​ເອ​ເຊຍ​ລົງທຶນ ພັດທະນາ ​ແລະ ກໍ່ສ້າງ​ຈຳກັດ​ຜູ້​ດຽວ ​ເປັນ​ຜູ້​ລົງທຶນ ​ໃນ​ຮູບ​ແບບ BOT ມີ​ສັນຍາ​ສຳປະທານ 50 ປີ, ​ໂຄງການ​ດັ່ງກ່າວ​ຈະ​ເລີ່​ມ​ແຕ່​ບໍລິ​ເວນ​ສູນ​ການ​ຄ້າ​ອາຊຽນມໍ ​ໄປ​ຮອດ​ເສັ້ນທາງ​ທ່າ​ງ່ອນ ຄາດ​ວ່າ​ຈະ​ໃຊ້​ທຶນ​ໃນ​ການ​ທົດ​ແທນ​ເວນ​ຄືນ​ທີ່​ດິນ, ສິ່ງ​ປຸກ​ສ້າງ ​ແລະ ຜົນລະປູກ ຄາດ​ວ່າ​ຈະ​ມີມູນ​ຄ່າສູງ​ເຖິງ 40 ລ້ານ​ໂດ​ລາ​ສະຫະລັດ.





ສຳລັບ​ເມືອງ​​ໄຊ​ທານີ ມີ 6 ບ້ານ​ຄື: ບ້ານ ນາ​ແຄ, ບ້ານ ​ໄຊ​ສະຫວ່າງ, ບ້ານ ດົງ​ສ້າງ​ຫີນ, ບ້ານ ດອນ​ຕິ້ວ ​ແລະ ບ້ານ​ ດົງໝາກຄາຍ, ສ່ວນ​ເມືອງ​ໄຊ​ເສດ​ຖາ​ມີ 12 ບ້ານ​ຄື: ບ້ານ ​ໂນນ​ຄໍ້, ຮ່ອງ​ໄກ່​​ແກ, ທາດຫຼວງ​ໃຕ້, ວຽງຈະ​ເລີ​ນ, ຫົວ​ຂົວ, ​ໂນນ​ສະຫວ່າງ, ​​ໂນນ​ສະຫງ່າ, ວັງ ຊາຍ, ໜອງໜ່ຽງ, ບ້າ​ນ ຮ່ອງ​ສຸພາບ ​ແລະ ບ້ານ ​ໂຊກ​ໃຫຍ່. ຊຶ່ງແຜນກໍ່ສ້າງ 3 ​ໄລຍະ. ​ໄລຍະ​ທີ 1 ​ແມ່ນ​ຈະ​ເລີ່​ມ​ແຕ່ ສູນ​ການ​ຄ້າ​ອາຊຽນມໍ ຫາ ​ເມືອງ​ໃໝດອກ​ຈຳປາ ​ໄປ​ຫາໜອງໜ່ຽງ ​ແລະ ​ເສັ້ນທາງ 450 ປີ ມີ​ຄວາມ​ຍາວ 14.01 ກິ​ໂລ​ແມັດ ຈະ​ເລີ່​ມກໍ່ສ້າງ ປີ 2017-2019, ​ໄລຍະ​ທີ 2 ​ແຕ່​ບ້ານ ທາດຫຼວງ​ໃຕ້ ຫາ ດົງ​ຄຳ​ຊ້າງ, ທ່າ​ເດື່ອ-ທ່າ​ນາ​ແລ້ງ ມີ​ຄວາມ​ຍາວ 17.19 ກິ​ໂລ​ແມັດ ​ເລີ່​ມກໍ່ສ້າງ 2020-2026 ​ແລະ ​ໄລຍະ​ທີ 3 ດົງໝາກຄາຍ ຫາ ທ່າ​ງ່ອນ ມີ​ຄວາມ​ຍາວ 11 ກ່ວາ​ກິ​ໂລ​ແມັດ ​​ແລະ ຈະ​ເລີ່​ມກໍ່ສ້າງ​ໃນ​ປີ 2024-2026.


ຫົວໜ້າພະ​ແນ​ກຊັບພະຍາກອນທຳ​ມະ​ຊາດ ​ແລະ ສິ່ງ​ແວດ​ລ້ອມ ນະຄອນຫຼວງ​ວຽງຈັນ ຍັງ​ໃຫ້​ຮູ້​ວ່າ: ​ໂດ​ຍອີງ​ໃສ່​ຄວາມ​ພ້ອມ ​ແລະ ຈຸດ​ພິ​ເສດຂອງ​ໂຄງການ​ທາງ​ດ່ວນດັ່ງກ່າວ​ໃນຮູບ​ແບບ BOT ທາງ​ຄະນະ​ກຳມະການ​ທີ່​ຖືກ​ແຕ່ງ​ຕັ້ງ ​ໄດ້​ດຳ​ເນີນ​ການ​ສຳ​ຫຼວດ ​ແລະ ປະສານ​ສົມທົບ​ໂດຍ​ກົງ ກັບ​ການຈັດ​ຕັ້ງ​ຂັ້ນ​ບ້ານ ​ແລະ ປະຊາຊົນ​ທີ່​ນອນ​ໃນ​ເຂດ​ໂຄງການ, ​ເຊິ່ງ​ເຫັນ​ວ່າ​ຫົວໜ່ວຍຊົດ​ເຊີຍ ມີ​ລາຄາ​ໃກ້ຄຽງກັບ​ລາຄາ​ຊື້-ຂາຍ​ຕົວ​ຈິງ ​ໃນ​ແຕ່ລະ​ທ້ອງ​ຖິ່ນ​​ເພື່ອ​ແນ​ໃສ່ ຮັບປະກັນສິດຜົນ​ປະ​ໂຫຍ​ດຂອງ​ປະຊາຊົນ ​ແລະ ຄວາມຖືກຕ້ອງ​ໂປ່​ງ​ໃສ, ຕ້ອງ​ໄດ້​ມີ​ການ​ປະສານ​ສົມທົບ, ປຶກສາ​ຫາລື​ລະຫວ່າງ​ປະຊາຊົນ, ​ເຈົ້າ​ຂອງ​ໂຄງການ ​ແລະ ຄະນະ​ກຳມະການ​ທີ່​ຮັບຜິດຊອບ ​ເພື່ອ​ເປັນ​ເອກະ​ພາບ ​ແລະ ມີ​ຄຳ​ເຫັນ​ຊີ້ນຳ​ອື່ນໆອີກ ດ້ານ​ສິ່ງ​ແວດ​ລ້ອມ ​ແລະ ຜົນ​ກະທົບ​ຕໍ່ສັງຄົມ ​ເພື່ອ​ໃຫ້​ໂຄງການ​ຈັດ​ຕັ້ງ​ປະຕິບັດສຳ​ເລັດ​ຜົນ.


ຂໍ້ມູນ : ໜັງສືພິມເສດຖະກິດ-ສັງຄົມ
© ໂຕະນໍ້າຊາ  | www.tonamcha.com | www.tonamchanews.com
_______





No comments

Powered by Blogger.