Header Ads

ນາຍົກລັດຖະມົນຕີເນັ້ນໃຫ້ເບິ່ງແຍງຜູ້ໄດ້ຮັບຜົນກະທົບຢ່າງຈິງຈັງ ຂະນະທີ່ຍອດຜູ້ເສຍຊີວິດເພີ່ມຂຶ້ນເປັນ 13 ສົບ ແລະ ສູນຫາຍ 118 ຄົນ




ອີງຕາມການລາຍງານຂອງ ຂປລ ວ່າ: ຕົວເລກຍອດຜູ້ເສຍຊີວິດເພີ່ມຂຶ້ນຈາກ 11 ສົບເປັນ 13 ສົບ ແລະ ຍັງສາບສູນ 118 ຄົນ ຂະນະທີ່ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວໄດ້ເນັ້ນໃຫ້ຄະນະນໍາ ແລະ ເຈົ້າໜ້າທີ່ສະເພາະກິດຕ້ອງເອົາໃຈໃສ່ສືບຕໍ່ຄົ້ນຫາ ແລະ ກອບກູ້ເອົາຜູ້ເສຍຊີວິດ ລວມທັງຜູ້ສາບສູນຢ່າງເຄັ່ງຮ້ອນແລະ ວ່ອງໄວ.

ທ່ານ ພົນຕີ ຄໍາລຽງ ອຸທະໄກສອນ ຮອງຫົວໜ້າກົມໃຫຍ່ເສນາທິການກອງທັບ, ຫົວໜ້າກອງບັນຊາການພາກສະໜາມໄດ້ເປັນປະທານຖະແຫລງຂ່າວຜົນການຊອກຄົ້ນ ແລະ ກອບກູ້ໃນວັນທີ 1 ກໍລະກົດ 2018 ນີ້ວ່າໄດ້ພົບຍອດຜູ້ເສຍຊີວິດແລ້ວ 13 ສົບ ແລະ ຍັງສາບສູນ 118 ຄົນ ແຕ່ການປະຕິບັດໜ້າທີ່ຍັງສືບຕໍ່ຊອກຄົ້ນ ແລະ ກອບກູ້ຕໍ່ໄປຈົນກວ່າຈະສໍາເລັດ.

ໃນວັນດຽວກັນ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະກໍໄດ້ເດີນທາງຢ້ຽມຢາມ ແລະ ໃຫ້ກໍາລັງໃຈຜູ້ໄດ້ຮັບຜົນກະທົບຈາກເຂື່ອນເຊປ່ຽນ-ເຊນໍ້ານ້ອຍແຕກຢູ່ສູນພັກຊົ່ວຄາວທີ່ໂຮງຮຽນມັດທະຍົມສະໜາມໄຊ ພາຍຫລັງສໍາເລັດການພົບປະໂອ້ລົມ ແລະ ເຮັດວຽກກັບຄະນະນໍາແຂວງອັດຕະປື ລວມທັງການລົງຢ້ຽມຢາມພື້ນທີ່ໄດ້ຮັບຜົນກະທົບຢູ່ບ້ານໃໝ່ ເຊິ່ງເປັນໜຶ່ງໃນ 13 ບ້ານ.

ລະຫວ່າງການພົບປະໂອ້ລົມບັນດາການນໍາແຂວງ ແລະ ໃຫ້ກໍາລັງໃຈປະຊາຊົນນັ້ນ, ທ່ານ ນາຍົກລັດຖະມົນຕີໄດ້ເນັ້ນໃຫ້ຂະແໜງການທີ່ກ່ຽວຂ້ອງຕ້ອງເອົາໃຈຊ່ວຍເຫລືອ ແລະ ກອບກູ້ຜູ້ເສຍຊີວິດ ລວມທັງຜູ້ສາບສູນຢ່າງເຄັ່ງຮ້ອນທັງໃຫ້ທິດຊີ້ນໍາຕໍ່ບັນດາການນໍາ ແລະ ເຈົ້າໜ້າທີ່ເພີ່ມທະວີຄວາມເປັນເຈົ້າການຢ່າງເດັດດ່ຽວ ໃນນັ້ນຕ້ອງເອົາໃຈໃສ່ຈັດສັນທີ່ຢູ່ໄລຍະສັ້ນ-ຍາວຄັກແນ່; ຕ້ອງສະໜອງອາຫານໂດຍຮັບປະກັນສຸຂະອະນາໄມ; ຕ້ອງຈັດສັນເຄື່ອງຊ່ວຍເຫລືອໃຫ້ເຖິງມືປະຊາຊົນດ້ວຍຄວາມວ່ອງໄວ, ຕ້ອງເກັບມ້ຽນເຄື່ອງຊ່ວຍເຫລືອ ລວມທັງປັດໄຈຕ່າງໆໃຫ້ລະອຽດ ແລະ ອື່ນໆ. 

ພາບ-ຂ່າວ: ເກີດຂວັນໃຈ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.