Header Ads

ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂອງທ່ານ ຕາເກໂອະ ກາມາມູລະ, ປະທານກຳມາທິການງົບປະມານ, ສະພາຜູ້ແທນລາຊະດອນຍີ່ປຸ່ນ



ໃນຕອນເຊົ້າ ຂອງວັນທີ 20 ສິງຫາ 2018 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ຕາເກໂອະ ຄາມາມູລະ, ປະທານກຳມາທິການງົບປະມານ, ສະພາຜູ້ແທນລາຊະດອນຍີ່ປຸ່ນ ພ້ອມດ້ວຍຄະນະ ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 19-20 ສິງຫາ 2018.



ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນ ເສີມສ້າງສາຍພົວພັນ ແລະ ການຮ່ວມມື ຂອງສອງປະເທດ ກໍ່ຄື ສະພາຂອງສອງປະເທດ ໃຫ້ມີຄວາມແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ. ພ້ອມດຽວກັນນັ້ນ ກໍ່ໄດ້ສະແດງຄວາມຂອບໃຈ ຕໍ່ການສະໜັບສະໜູນຊ່ວຍເຫຼືອ ຂອງລັດຖະບານ ແລະ ປະຊາຊົນຍີ່ປຸ່ນ ໃນໄລຍະທີ່ຜ່ານມາ ໂດຍເຫັນວ່າເປັນການຊ່ວຍເຫຼືອທີ່ຫຼວງຫຼາຍ ແລະ ມີປະສິດທິຜົນສູງ, ສອດຄ່ອງກັບຄວາມຮຽກຮ້ອງຕ້ອງການຕົວຈິງ ຂອງການພັດທະນາເສດຖະກິດສັງຄົມຂອງ ສປປ ລາວ ໂດຍສະເພາະ ການແກ້ໄຂຄວາມທຸກຍາກຂອງປະຊາຊົນ, ການພັດທະນາພື້ນຖານໂຄງລ່າງ, ການພັດທະນາຊັບພະຍາກອນມະນຸດ, ການຊ່ວຍເຫຼືອທາງດ້ານເຕັກນິກວິຊາການ. ນອກຈາກນັ້ນ ກໍ່ຍັງມີອາສາສະໜັກຂອງຍີ່ປຸ່ນ ມາປະຕິບັດໜ້າທີ່ຢູ່ທັງຕົວເມືອງ ແລະ ຊົນນະບົດ ໂດຍໄດ້ສຸມທັງກຳລັງແຮງ, ສະຕິປັນຍາ, ຄວາມຮູ້ຄວາມສາມາດຂອງຕົນ ປະກອບສ່ວນພັດທະນາວຽກງານຕ່າງໆຂອງສປປລາວຢ່າງສຸດຄວາມສາມາດ ແລະ ມີຜົນງານຢ່າງຫຼວງຫຼາຍ.



ໃນໂອກາດດຽວກັນ, ທ່ານນາຍົກລັດຖະມົນຕີ ຍັງຫວັງຢ່າງຍິ່ງວ່າ ຄະນະຜູ້ແທນຍີ່ປຸ່ນ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອແກ່ສປປລາວຕື່ມອີກ ໂດຍສະເພາະ ຂົງເຂດວຽກງານທີ່ພົວພັນເຖິງ ການພິຈາລະນາການຊ່ວຍເຫຼືອແກ່ສປປລາວ ຜ່ານລັດຖະສະພາຍີ່ປຸ່ນ.



ໃນຕອນທ້າຍ, ທ່ານ ຕາເກໂອະ ຄາມາມູລະ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີໃນຄັ້ງນີ້. ພ້ອມທັງ ນຳເອົາຄວາມຢ້ຽມຢາມຖາມຂ່າວ ຂອງທ່ານນາຍົກລັດຖະມົນຕີ ແຫ່ງຍີ່ປຸ່ນ ມາຍັງທ່ານນາຍົກລັດຖະມົນຕີ ແຫ່ງ ສປປ ລາວ. ນອກນີ້ ຍັງໄດ້ສະແດງຄວາມເສຍໃຈ ຕໍ່ເຫດການອຸປະຕິເຫດໄພນໍ້າຖ້ວມ ຢູ່ເມືອງສະໜາມໄຊ, ແຂວງອັດຕະປື ໃນທ້າຍເດືອນກໍລະກົດ ທີ່ຜ່ານມາ. ການມາຢ້ຽມຢາມ ສປປ ລາວໃນຄັ້ງນີ້, ທ່ານ ທາເກະໂອະ ຄາມາມູລະ ຍັງໄດ້ແຈ້ງ ທ່ານ ນາຍົກລັດຖະມົນຕີຊາບວ່າ: ຈະຂໍອອກທຶນຈຳນວນ 200,000 ເຢັນ (ສອງແສນເຢັນ ສະກຸນເງິນຍີ່ປຸ່ນ) ໂດຍແມ່ນພາກສ່ວນທີ່ກ່ຽວຂ້ອງ ເພື່ອນຳໄປຊ່ວຍເຫຼືອຜູ້ປະສົມໄພທຳມະຊາດເທື່ອນີ້ ເວົ້າລວມ, ເວົ້າສະເພາະ ນໍາໄປຊ່ວຍເຫຼືອຜູ້ປະສົບໄພຢູ່ແຂວງອັດຕະປື.​


ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ 
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.