Header Ads

ທ່ານນາຍົກລັດຖະມົນຕີ ເດີນທາງເຄື່ອນໄຫວຕິດຕາມໄພນໍ້າຖ້ວມ ຢູ່ເມືອງ ໄຊບູລີ ແຂວງ ສະຫວັນນະເຂດ


​​​​​​ພາຍຫຼັງສໍາເລັດການຕິດຕາມ ຊຸກຍູ້ການແກ້ໄຂບັນຫາອຸທົກກະໄພນໍ້າຖ້ວມ ທີ່ເມືອງສະໜາມໄຊ, ແຂວງອັດຕະປື ໃນຕອນເຊົ້າ ຂອງວັນທີ 2 ສິງຫາ 2018 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເດີນທາງໄປຕິດຕາມ ໄພນໍ້າຖ້ວມ ຢູ່ພື້ນທີ່ຕົວຈິງ ເມືອງ ໄຊບູລີ, ແຂວງ ສະຫວັນນະເຂດ ໂດຍໄດ້ຮັບການຕ້ອນຮັບ ຈາກທ່ານ ສັນຕິພາບ ພົມວິຫານ  ເຈົ້າແຂວງໆສະຫວັນນະເຂດ, ການນຳແຂວງ, ການເມືອງ ພ້ອມດ້ວຍ ປະຊາຊົນພາຍໃນບ້ານ ນາແຫນ.



ກ່ອນອື່ນ, ທ່ານນາຍົກລັດຖະມົນຕີ ໄດ້ຮັບຟັງການລາຍງານ ສະພາບນໍ້າຖ້ວມ ແລະ ວິທີການແກ້ໄຂບັນຫາດັ່ງກ່າວ ຈາກທ່ານເຈົ້າແຂວງໆ ສະຫວັນນະເຂດ ເຊິ່ງກ່ອນອື່ນທ່ານ ເຈົ້າແຂວງໄດ້ລາຍ ງານໃຫ້ຊາບວ່າ: ນັບແຕ່ຕົ້ນເດືອນ ກໍລະກົດ 2018 ເປັນຕົ້ນມາ ຝົນໄດ້ຕົກ ຢ່າງຕໍ່ເນື່ອງ ແລະ ຕົກເປັນວົງກວ້າງ ໃນທົ່ວທຸກພາກ ຂອງປະເທດ ເວົ້າລວມ, ເວົ້າສະເພາະ ພາຍໃນແຂວງສະຫວັນນະເຂດ ເຮັດໃຫ້ພື້ນທີ່ລຸ່ມຕໍ່າຖືກນໍ້າຖ້ວມ ແລະ ປະລິມານນໍ້າ ຢູ່ບັນດາສາຍນໍ້າຕ່າງໆ ໄດ້ເພີ່ມຂຶ້ນຢ່າງໄວວາ ຍ້ອນຈຸດທີ່ຕັ້ງຂອງແຂວງ ກວມເອົາ 2 ອ່າງໂຕ່ງ ຄື: ອ່າງໂຕ່ງເຊບັ້ງໄຟ ແລະ ເຊບັ້ງຫຽງ ມີສາຍນໍ້າທີ່ເປັນສາຂາແມ່ນໍ້າຂອງ ນອນໃນ 2 ອ່າງໂຕ່ງ ເປັນຕົ້ນ: ແມ່ນໍ້າ ເຊບັ້ງໄຟ, ເຊບັ້ງຫຽງ, ເຊຈໍາພອນ, ເຊຊັງຊອຍ, ເຊໂປນ, ເຊກອກ, ເຊໂຈນ ແລະ ສາຍນໍ້າອື່ນໆ ເຊິ່ງປຽບເໝືອນສາຍເລືອດໃຫຍ່ ໃນການດໍາລົງຊີວິດ ຂອງປະຊາຊົນ ແຂວງສະຫວັນນະເຂດ, ຍ້ອນຝົນຕົກໜັກ ແລະ ແກ່ຍາວ ເປັນເວລາຫຼາຍວັນ ຈິ່ງເຮັດໃຫ້ບັນດາສາຍນໍ້າດັ່ງກ່າວ ບໍ່ສາມາດຮັບຮອງມວນນໍ້າໄດ້ໝົດ ຈິ່ງເຮັດໃຫ້ນໍ້າຖ້ວມ ພື້ນທີ່ແຂວງສະຫວັນນະເຂດ ເປັນບໍລິເວນວົງກວ້າງ. ຕໍ່ກັບສະພາບການດັ່ງກ່າວ ແຂວງ ກໍ່ໄດ້ພະຍາຍາມສຸມໃສ່ ເພື່ອປ້ອງກັນ ແລະ ຄວບຄຸມ ໃຫ້ມີຜົນກະທົບໜ້ອຍທີ່ສຸດ ໂດຍໃຫ້ຄະນະກໍາມະການ ຄວບຄຸມໄພພິບັດ ຂັ້ນແຂວງ, ເມືອງ ເອົາໃຈໃສ່ຊີ້ນໍາ-ນໍາພາເຝົ້າລະວັງ ໃນເຂດທີ່ມີຄວາມສ່ຽງ, ປຸກລະດົມກໍາລັງແຮງທ້ອງຖິ່ນ, ບວກກັບ ກໍາລັງຂອງກອງບັນຊາການທະຫານແຂວງ, ກໍາລັງຫຼວງ ເອົາກະສອບດິນ ປ້ານເສີມຄູກັນນໍ້າເລາະຕາມແລວເຊບັ້ງໄຟ ເພື່ອປ້ອງກັນບໍ່ໃຫ້ນໍ້າໄຫຼເຂົ້າຖ້ວມພື້ນທີ່ການຜະລິດ ແຕ່ກໍ່ເຫຼືອວິໄສ ລະດັບນໍ້າເຊບັ້ງໄຟ ເກີນຂີດທີ່ຈະຄວບຄຸມໄດ້ ເຮັດໃຫ້ນໍ້າໄດ້ລົ້ນຄັນຄູກັນນໍ້າ ໃນວັນທີ 30 ກໍລະກົດ 2018 ເຮັດໃຫ້ປະລິມານນໍ້າ ກະຈາຍເປັນວົງກວ້າງ ແລະ ເກີດຄວາມເສຍຫາຍຫຼາຍສົມຄວນ ຕໍ່ພື້ນຖານການຜະລິດ, ເນື້ອທີ່ທໍາການຜະລິດກະສິກໍາ ເປັນຕົ້ນ: 





ຜົນກະທົບຕໍ່ບ່ອນຢູ່ອາໄສ ນໍ້າຖ້ວມບ້ານເຮືອນ ປະຊາຊົນທັງໝົດ ຈໍານວນ 5 ເມືອງ, ກວມເອົາ  86 ບ້ານ, ມີ 4.257 ຄອບຄົວ, 20.983 ຄົນ. ໃນນີ້, ໄດ້ຍົກຍ້າຍຈໍານວນ 468 ຄົນ, ຈໍານວນ 2.342 ຄົນ ມາຢູ່ບ່ອນທີ່ປອດໄພ; ຕໍ່ຜົນກະທົບຕໍ່ເນື້ອທີ່ ການຜະລິດກະສິກໍາ ກວມເອົາ 12 ເມືອງ, 321 ບ້ານ, ເນື້ອທີ່ 27.564 ເຮັກຕາ, ໜອງປາ 421 ໜອງ, ສັດລ້ຽງຕາຍ 381 ໂຕ; ຜົນກະທົບ ຕໍ່ພື້ນຖານໂຄງລ່າງ ເສັ້ນທາງຖືກຖ້ວມ 56 ຈຸດ, ຊົນລະປະທານ 26 ແຫ່ງ, ຂົວ 68 ແຫ່ງ, ເສົາໄຟຟ້າຫັກ 2 ເສົາ, ຍັງບໍ່ສາມາດນໍາໃຊ້ໄຟຟ້າໄດ້ 2 ບ້ານ, ໂຮງຮຽນຖືກຖ້ວມ 44 ແຫ່ງ, ວັດ 22 ແຫ່ງ, ສຸກສາລາ 1 ແຫ່ງ, ນໍ້າບາດານ 9 ໜ່ວຍ. ສໍາລັບເມືອງ ໄຊບູລີ ເປັນເມືອງທີ່ມີຜົນກະທົບຂ້ອນຂ້າງໜັກ ສົມຄວນພໍາສົມຄວນ ມີຈໍານວນ 13 ບ້ານ ທີ່ລຽບເຊບັ້ງໄຟ ນໍ້າຖ້ວມທີ່ຢູ່ອາໄສ ເສັ້ນທາງຖືກຕັດຂາດທັງໝົດ ແລະ ມີ 18 ບ້ານ ທີ່ບໍ່ສາມາດເຂົ້າເຖິງດ້ວຍທາງບົກ, ໄດ້ຍົກຍ້າຍປະຊາຊົນຈໍານວນ 468 ຄອບຄົວ, ຈໍານວນ 2.342 ຄົນ ໄປຢູ່ທີ່ປອດໄພ 5 ຈຸດ, ເນື້ອທີ່ຖືກນໍ້າຖ້ວມ 4.918 ເຮັກຕາ (ຕາມຂໍ້ມູນສັງລວມໄດ້ ວັນທີ 31/7/2018). ສໍາລັບແຜນການໃນຕໍ່ໜ້າ ແຂວງໄດ້ຊີ້ນໍາໃຫ້ທຸກພາກສ່ວນເອົາໃຈໃສ່ ຕິດຕາມ ແລະ ເລັ່ງປັບປຸງພື້ນຖານໂຄ່ງລ່າງຕ່າງໆ ໃຫ້ກັບຄືນສູ່ສະພາບປົກກະຕິໂດຍໄວ.



ພາຍຫຼັງໄດ້ຮັບຟັງການລາຍງານ ທ່ານນາຍົກລັດຖະມົນຕີ ກໍ່ໄດ້ສະແດງຄວາມເປັນຫ່ວງເປັນໄຍ ຕໍ່ຜູ້ທີ່ໄດ້ຮັບຜົນກະທົບ ນໍ້າຖ້ວມ ຢູ່ແຂວງສະຫວັນນະເຂດ ພ້ອມທັງ ເລົ່າເຖິງສະພາບໄພພິບັດນໍ້າຖ້ວມ ຢູ່ແຂວງອັດຕະປື ໃຫ້ຜູ້ເຂົ້າຮ່ວມ ການໂອ້ລົມຄັ້ງນີ້ ໄດ້ຮັບຊາບ, ພ້ອມທັງສະແດງຄວາມດີໃຈ ທີ່ທາງການນຳຂອງແຂວງ, ຂອງເມືອງ ໄດ້ມີແຜນກຽມໄວ້ກ່ອນ ເຊິ່ງສາມາດຍົກຍ້າຍປະຊາຊົນໄດ້ທັນ ບໍ່ໃຫ້ເຂົາເຈົ້າຕົກທ່າຮັບ ບໍ່ມີຄົນເສຍຊີວິດ, ຢູ່ບາງບ່ອນກໍ່ໄດ້ໃຊ້ກະເປົ່າຂີ້ຊາຍໄປຕັນເອົາໄວ້ ເພື່ອບໍ່ໃຫ້ນໍ້າເຂົ້າມາຫຼາຍ. ໃນໂອກາດນີ້, ທ່ານນາຍົກລັດຖະມົນຕີ ກໍ່ໄດ້ຊີ້ນໍາໃຫ້ອໍານາດປົກຄອງແຂວງ ແລະ ທຸກພາກສ່ວນ ພາຍໃນແຂວງ ເອົາໃຈໃສ່ຕື່ມອີກ ເປັນຕົ້ນ: ພາຍຫຼັງອົບພະຍົບປະຊາຊົນ ມາໄດ້ແລ້ວ ໃຫ້ສືບຕໍ່ເບິ່ງເຂົາເຈົ້າກ່ອນ ເພື່ອໃຫ້ເຂົາເຈົ້າກັບເມືອບ້ານ, ກັບເມືອງຂອງເຂົາເຈົ້າ ດ້ວຍຄວາມປອດໄພ, ພາຍ ຫຼັງນໍ້າລົງ ຈະມີແຜນການພັດທະນາແນວໃດ ຂໍໃຫ້ມີແຜນການສົມທົບຮ່ວມກັນ ທຸກເມືອງທີ່ຖືກກະທົບ ມີຫຍັງທີ່ຈະສະເໜີໃຫ້ສູນກາງຊ່ວຍ ກໍໃຫ້ກະກຽມສະເໜີ; ຖ້າຕ້ອງການບັນດາ ກຳລັງປະກອບອາວຸດ ອ້າຍນ້ອງທະຫານ, ຕຳຫຼວດ ເພື່ອເປັນກອງຕະລຸມບອນ ຫຼື ຕ້ອງການກຳລັງແຮງງານຕ່າງໆ ກໍ່ຕ້ອງລະດົມກັນ;  ສືບຕໍ່ມີສະຕິລະວັງຕົວ ຕິດຕາມສະພາບການ, ສະພາບດິນຟ້າອາກາດ ໃຫ້ເປັນປົກກະຕິ; ພາຍ ຫຼັງນໍ້າແຫ້ງລົງແລ້ວ ແມ່ນໃຫ້ເຝົ້າລະວັງພະຍາດຕິດຕໍ່, ພະຍາດຕິດແປດ ແລະ ພະຍາດຕ່າງໆທີ່ຈະເກີດຂຶ້ນ; ໃຫ້ບັນດາຂະແໜງການປຶກສາຫາລືຮ່ວມກັນ ແລະ ນຳພາປະຊາຊົນເຮັດນາແຊງ, ເວລານໍ້າລົງຝຸ່ນອາດຄ້າງຢູ່ ຈະເປັນໂອກາດໃຫ້ປະຊາຊົນເຮັດນາແຊງ ມອບໃຫ້ພະແນກກະສິກຳ ແລະ ປ່າໄມ້ ຕິດຕາມຢ່າງໃກ້ຊິດ ແລະ ວາງແຜນເຮັດໃຫ້ຟື້ນຟູການປູກ-ການຝັງ ແລະ ການລ້ຽງຂອງປະຊາຊົນ; ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອບໍ່ໃຫ້ມີປະກົດການຂີ້ລັກງັດແງະ, ປະຊາຊົນ ຊ່ວຍເປັນຫູເປັນຕາ ມີເລື່ອງຫຍັງເກີດຂຶ້ນໃຫ້ພ້ອມກັນແກ້ໄຂ; ຄຸ້ມຄອງລາຄາສິນຄ້າ ເພື່ອບໍ່ໃຫ້ຜູ້ປະກອບການສວຍໂອກາດຂຶ້ນລາຄາໃນໄລຍະນີ້ ເພາະປະຊາຊົນທຸກແລ້ວ ບໍ່ໃຫ້ທຸກອີກ; ເອົາໃຈໃສ່ຄຸ້ມຄອງ ແລະ ການບໍລິໂພກສື່ອອນລາຍ ຂໍໃຫ້ປະຊາຊົນ ຢ່າໄປເຊື່ອຂ່າວບໍ່ດີ ຂ່າວອະກຸສົນ ທີ່ເຮັດໃຫ້ປະຊາຊົນ ມີຄວາມແຕກຕື່ນ ຂໍໃຫ້ເຊື່ອແຕ່ຂ່າວທີ່ເປັນທາງການເທົ່ານັ້ນ; ການຟື້ນຟູລະບົບເສັ້ນທາງຄົມມະນາຄົມ ໃຫ້ທາງກະຊວງໂຍທາທິການ ແລະ ຂົນສົ່ງ ສົມທົບກັບແຂວງ ເພື່ອສໍາຫຼວດ ແລະ ປັບປຸງ ໃຫ້ໄປໄດ້ສະ ດວກຄືແຕ່ກ່ອນ ການແກ້ໄຂໄລຍະຍາວ ຈຶ່ງໄດ້ວາງແຜນຕື່ມອີກ.



ນອກຈາກນັ້ນ, ໄລຍະຍາວ ໃຫ້ຄິດເບິ່ງຕື່ມກ່ຽວ ກັບການວາງແຜນການປ້ອງກັນໄລຍະຍາວ ບ່ອນທີ່ນໍ້າຖ້ວມທຸກປີ ພວກເຮົາຈະເຮັດຈັ່ງໃດ ອັນນີ້ກໍ່ຢາກໃຫ້ກະຊວງກະສິກຳ ແລະ ປ່າໄມ້ ລົງມາຊ່ວຍວາງແຜນໄລຍະຍາວ ກ່ຽວກັບລະບົບຊົນ ລະປະທານ ເຮົາສິເຮັດແນວໃດ ສາມາດຍົກຂຶ້ນໄດ້ລະດັບໃດ ເພື່ອປ້ອງກັນບໍ່ໃຫ້ນໍ້າຖ້ວມຫຼາຍກວ່ານີ້; 2. ຖ້ານໍ້າລົງແລ້ວ ຈະມີນໍ້າພຽງພໍຟື້ນຟູການຜະລິດ ຂອງປະຊາຊົນ ເຊິ່ງຢາກສະເໜີໃຫ້ພິຈາລະນາ​ຄືນຕື່ມ.

ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ 
© ໂຕະນໍ້າຊາ  | www.tonamcha.com | www.tonamchanews.com
_______




No comments

Powered by Blogger.