Header Ads

ທ່ານ ຮອງປະທານປະເທດ ເຄື່ອນໄຫວຕິດຕາມສະພາບໄພນໍ້າຖ້ວມ ຢູ່ແຂວງອຸດົມໄຊ




ວັນທີ 7-8 ສິງຫານີ້ ທ່ານ ປະລິນຍາເອກ ພັນຄຳ ວິພາວັນ ກົມການເມືອງສູນກາງພັກ ຄະນະເລຂາທິການໃຫຍ່ສູນກາງພັກ ຜູ້ປະຈຳການຄະນະເລຂາທິການໃຫຍ່ສູນກາງພັກ ຮອງປະທານປະເທດ ແຫ່ງ ສປປລາວ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມສະພາບໄພນໍ້າຖ້ວມຢູ່ ແຂວງອຸດົມໄຊໃນເດືອນ ກໍລະກົດຜ່ານມາ.



ໃນການລົງເຄື່ອນໄຫວຕິດຕາມສະພາບໄພນໍ້າຖ້ວມຢູ່ ແຂວງອຸດົມໄຊຄັ້ງນີ້ ກ່ອນອື່ນທ່ານ ໄດ້ລົງພາກສະໜາມເບິ່ງພື້ນທີ່ ທີ່ໄດ້ຮັບຜົນກະທົບຈາກໄພນໍ້າຖ້ວມ ເປັນຕົ້ນແມ່ນເບິ່ງເນື້ອທີ່ນາຂອງປະຊາຊົນ ທີ່ຖຶກນໍ້າເຊາະເຈື່ອນ, ເບິ່ງໂຮງໝໍທີ່ໄດ້ຮັບຜົນກະທົບຈາກນໍ້າຖ້ວມ, ເບິ່ງຂົວ,ເສັ້ນທາງ ແລະ ບ້ານເຮືອນປະຊາຊົນທີ່ໄດ້ຮັບຄວາມເສຍຫາຍຈາກນໍ້າເຊາະເຈື່ອນຢູ່ພາຍໃນເມືອງແບງ, ເມືອງຮຸນ ແລະ ເມືອງປາກແບງ ໂດຍມີ ທ່ານ ຄຳພຽງ ຢາຈົງວາ ຮອງເລຂາພັກແຂວງ ຮອງເຈົ້າແຂວງ ຜູ້ປະຈຳການ ພ້ອມດ້ວຍບັນດາທ່ານ ຮອງລັດຖະມົນຕີທີ່ກ່ຽວຂ້ອງ,ການນຳຂອງແຂວງ ແລະ ເມືອງຮ່ວມເດີນທາງນຳ. ໂອກາດດຽວກັນ ທ່ານ ຮອງປະທານປະເທດ ຍັງໄດ້ຮັບຟັງການລາຍງານສະພາບຜົນເສຍຫາຍຈາກໄພນໍ້າຖ້ວມ ຈາກທ່ານເຈົ້າເມືອງທັງ 3 ເມືອງ.ເຊິ່ງສະພາບນໍ້າຖ້ວມຢູ່ພາຍໃນ 3 ເມືອງດັ່ງກ່າວເຫັນວ່າໄດ້ສ້າງຄວາມເສຍຫາຍຕໍ່ເນື້ອທີ່ທຳການຜະລິດ, ບ້ານເຮືອນ ແລະ ສັດລ້ຽງຂອງພໍ່ແມ່ປະຊາຊົນ ລວມເຖິງພື້ນຖານໂຄ່ງລ່າງຂອງພາກລັດເຊັ່ນ: ຖະໜົນຫົນທາງ, ລະບົບນໍ້າປະປາ, ຄອງເໝືອງ ແລະ ຊົນລະປະທານຕ່າງໆ ອັນໄດ້ສ້າງຄວາມສູນເສຍຕໍ່ງົບປະມານຂອງພາກລັດຢ່າງມະຫາສານ ແລະ ກະທົບຕໍ່ຊີວິດການເປັນຢູ່ຂອງປະຊາຊົນຫຼາຍສົມຄວນ. 



ໃນນັ້ນ ສຳຫຼັບເມືອງແບງລວມມີຈຳນວນບ້ານທີ່ໄດ້ຮັບຜົນເສຍຫາຍທັງໝົດ 43 ບ້ານ, ກວມເອົາ 2,372 ຄອບຄົວ, ມີພົນລະເມືອງ 12,450 ຄົນ, ເນື້ອທີ່ກະສິກຳເສຍຫາຍ 900 ກວ່າເຮັກຕາ, ສັດລ້ຽງເສຍຫາຍ 500 ກວ່າໂຕ, ໜອງປາ 200 ໜອງ, ຊົນລະປະທານ 28 ໂຄງການ, ເສັ້ນທາງພາຍໃນຕົວເມືອງແລະ ຊົນນະບົດຫຼາຍຈຸດເປ່ເພເສຍຫາຍ ນອກນີ້ ວຽກງານສຶກສາ ແລະ ສາທາລະນະສຸກກໍໄດ້ຮັບຜົນກະທົບເຊັ່ນກັນ ລວມມູນຄ່າເສຍຫາຍທັງໝົດ 12 ຕື້ກວ່າກີບ; ເມືອງຮຸນມີບ້ານທີ່ໄດ້ຮັບຜົນກະທົບທັງໝົດ 55 ບ້ານ, 4000 ກວ່າຄອບຄົວ, ພົນລະເມືອງ 25,000 ກວ່າຄົນ, ຂົງເຂດກະສິກຳມີເນື້ອທີ່ທຳການຜະລິດ,ສັດລ້ຽງ, ໜອງປາຂອງປະຊາຊົນ ແລະ ຊົນລະປະທານຖຶກເສຍຫາຍ. ພ້ອມນີ້ຍັງມີເສັ້ນທາງຄົມມະນາຄົມພາຍໃນເມືອງ ແລະ ຊົນນະບົດ ລວມເຖິງຂົວ, ລະບົບນໍ້າລິນສະອາດ ແລະ ພາຫະນະກໍໄດ້ຮັບຄວາມເສຍຫາຍເຊັ່ນກັນ ເຊິ່ງລວມມູນຄ່າທັງໝົດ 36 ຕື້ ກວ່າກີບ, ສ່ວນເມືອງປາກແບງລວມມີ 4 ບ້ານ, ມີ 53 ຫຼັງຄາເຮືອນ, 60 ຄອບຄົວ, ມີພົນລະເມືອງລວມ 300 ກວ່າຄົນ ໃນນັ້ນ ລວມທັງເລົ້າເຂົ້າ, ສັດລ້ຽງ, ຮ້ານອາຫານ, ຮ້ານຄ້າຂາຍເຄື່ອງ ຂອງປະຊາຊົນໄດ້ຮັບຜົນກະທົບຈາກນໍ້າເຊາະເຈື່ອນ. ນອກນີ້ ເສັ້ນທາງຫຼວງແຫ່ງຊາດ 2Wຫຼາຍຈຸດຖຶກນໍ້າເຊາະເຈື່ອນ, ເສັ້ນທາງຍຸບ ແລະ ດິນເຈື່ອນລົງທັບຖົມໃສ່ ເຮັດໃຫ້ການຄົມມະນາຄົມພົບຄວາມຫຍຸ້ງຍາກບາງບ່ອນໄດ້ຢຸດການສັນຈອນຊົ່ວຄາວຕ້ອງໄດ້ຮັບການສ້ອມແປງແກ້ໄຂສຸກເສີນ, ລະບົບໄຟຟ້າ ເກີດມີຫຼັກຫັກ, ລົ້ມ, ສາຍໄຟຟ້າຂາດບາງຈຸດ, ດອກໄຟຂາດ. ນອກນີ້ ລະບົບສາທາລະນະສຸກ ແລະ ນໍ້າປະປາກໍໄດ້ຮັບຜົນກະທົບເຊັ່ນກັນ ລວມມູນຄ່າເສຍຫາຍທັງໝົດ 21 ຕື້ກວ່າກີບ. ຕໍ່ກັບສະພາບການດັ່ງກ່າວ ມາຮອດປັດຈຸບັນ ທາງອົງການປົກຄອງເມືອງ, ແຂວງ ແລະ ພາກສ່ວນກ່ຽວຂ້ອງ ລວມທັງສັງຄົມຫຼາຍພາກສ່ວນກໍໄດ້ສຸມໃສ່ແກ້ໄຂ ແລະ ເຂົ້າໄປຊ່ວຍເຫຼືອສຸກເສີນຢ່າງທັນການ ໂດຍໄດ້ມີການແຕ່ງຕັ້ງຄະນະຮັບຜິດຊອບແຕ່ລະໜ້າວຽກຢ່າງລະອຽດ ພ້ອມທັງວາງແຜນແກ້ໄຂໃນແຕ່ລະໄລຍະໃຫ້ທັນກັບສະພາບການ ເພື່ອເຮັດໃຫ້ສະພາບການດຳລົງຊີວິດຂອງພໍ່ແມ່ປະຊາຊົນກັບຄືນສູ່ປົກກະຕິໂດຍໄວ.



ໂອກາດດັ່ງກ່າວ ທ່ານ ປະລິນຍາເອກ ພັນຄຳ ວິພາວັນ ກົມການເມືອງສູນກາງພັກ ຮອງປະທານປະເທດ ກໍໄດ້ກ່າວສະແດງຄວາມຊົມເຊີຍຕໍ່ຄະນະພັກ ແລະ ອຳນາດການປົກຄອງທຸກຂັ້ນທີ່ໄດ້ສຸມໃສ່ແກ້ໄຂ ແລະໃຫ້ການຊ່ວຍເຫຼືອແກ່ພໍ່ແມ່ປະຊາຊົນຢ່າງທັນການ. ພ້ອມດຽວກັນ ທ່ານຍັງໄດ້ໃຫ້ທິດຊີ້ນຳຫຼາຍບັນຫາແກ່ອົງການປົກຄອງທຸກຂັ້ນ ນັບແຕ່ແຂວງຮອດເມືອງ ລວມເຖິງອົງການທີ່ກ່ຽວຂ້ອງ ຈົ່ງສືບຕໍ່ໃຫ້ການຊ່ວຍເຫຼືອແກ່ປະຊາຊົນ ພ້ອມທັງຈະຕ້ອງໄດ້ເອົາໃຈໃສ່ໃນການແກ້ໄຂສະພາບໄພພິບັດທີ່ອາດຈະເກີດຂຶ້ນໃນຕໍ່ໜ້າ ໂດຍການສ້າງໃຫ້ມີລະບົບເຊັ່ນ: ລະບົບປ້ອງກັນທີ່ຍືນຍົງ, ລະບົບແກ້ໄຂເວລາເກີດສະພາບ ແລະ ລະບົບຟື້ນຟູສະພາຍພາຍຫຼັງເກີດເຫດການ ພ້ອມນີ້ ຈະຕ້ອງໄດ້ກວດກາຄືນການຈັດສັນທີ່ ຢູ່ອາໄສ, ການຈັດສັນອາຊີບຂອງປະຊາຊົນ ລວມເຖິງພື້ນຖານໂຄງລ່າງຂອງລັດຕ້ອງໃຫ້ແທດເໝາະ ແລະ ມີລັກສະນະຍືນຍົງ ເພື່ອຄວາມປອດໄພທັງຊີວິດ ແລະຊັບສິນ, ສຳລັບເນື້ອທີ່ທຳການຜະລິດຂອງປະຊາຊົນທີ່ເສຍຫາຍແມ່ນຕ້ອງໄດ້ມີການຄົ້ນຄວ້າປຶກສາຫາລືກັນຈາກຫຼາຍຂະແໜງການເພື່ອແກ້ໄຂ ໂດຍການປູກພຶດຊະນິດອື່ນທີ່ມີລາຍຮັບເພື່ອທົດແທນການປູກເຂົ້າ ຕາມຄວາມເໝາະສົມ, ພ້ອມນີ້ ຕ້ອງຮູ້ຈັກນຳໃຊ້ທ່າແຮງຂອງເມືອງທີ່ມີຢູ່ເຂົ້າໃນການພັດທະນາພື້ນຖານໂຄງລ່າງ ກໍຄືເສດຖະກິດສັງຄົມຂອງເມືອງໃຫ້ນັບມື້ກ້າວໜ້າ.




ຂ່າວ : ໄມພອນ (Via Media Laos )
© ໂຕະນໍ້າຊາ  | www.tonamcha.com | www.tonamchanews.com
_______




No comments

Powered by Blogger.