Header Ads

ຫຼວງພະບາງກະກຽມຈັດງານບຸນປະເພນີ ຫໍ່ເຂົ້າປະດັບດິນເດືອນເກົ້າ ພສ 2561




ໃນວັນທີ 31 ກໍລະກົດ 2018 ນີ້ ທີ່ຫ້ອງປະຊຸມຫ້ອງວ່າການປົກຄອງນະຄອນຫຼວງພະບາງ, ຫ້ອງວ່າການປົກຄອງນະຄອນຫຼວງພະບາງ ໄດ້ຈັດກອງປະຊຸມກະກຽມຈັດງານບຸນປະເພນີ ຫໍ່ເຂົ້າປະດັບດິນ ຊ່ວງເຮືອເດືອນເກົ້າ ພສ 2561, ຫລື ຄສ 2018 ທີ່ນະຄອນຫຼວງພະບາງ ເມືອງມໍລະດົກໂລກ, ໂດຍພາຍໃຕ້ການເປັນປະທານຂອງທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ແລະ ທ່ານ ສຸກັນ ບຸນຍົງ ເຈົ້າຄອງນະຄອນ ຫຼວງພະບາງ, ແລະ ໂດຍການເຂົ້າຮ່ວມຂອງບັນດາທ່ານໃນຄະນະກໍາມະການ, ອານຸກໍາມະການທີ່ກ່ຽວຂ້ອງຈາກບັນດາສໍານັກງານ, ອົງການອ້ອມຂ້າງແຂວງ ແລະ ນະຄອນຫຼວງພະບາງ. 





ໃນກອງປະຊຸມ, ຜູ້ຕາງໜ້າຄະນະຮັບຜິດຊອບດ້ານເນື້ອໃນ ໄດ້ຂື້ນຜ່ານຂໍ້ຕົກລົງຂອງ ທ່ານເຈົ້າແຂວງຫຼວງພະບາງ ວ່າດ້ວຍການແຕ່ງຕັ້ງ ຄະນະກໍາມະການ ແລະ ອານຸກໍາມະການຮັບຜິດຊອບ ເຊິ່ງປະກອບມີ 17 ຄະນະອານຸກໍມະການ. ພ້ອມກັນນັ້ນ, ຄະນະຊີ້ນໍາລວມ ແລະ ອານຸກໍາມະການ ໄດ້ປະກອບຄໍາຄິດ-ຄໍາເຫັນ ເພື່ອຄົ້ນຄ້ວາຄວາມເປັນເອກະພາບ ໃນການກະກຽມວຽກງານໃຫ້ທັນກັບເວລາ. ໃນຕອນທ້າຍ ທ່ານປະທານກອງປະຊຸມໄດ້ເນັ້ນໃຫ້ບັນດາອານຸກໍາມະການຕ້ອງວາງແຜນ ແລະ ຈັດແບ່ງໜ້າທີ່ຄວາມຮັບຜິດຊອບປະສານງານການເຄື່ອນໄຫວທຸກໜ້າວຽກຢ່າງລະອຽດ ເພື່ອເຮັດໃຫ້ງານດັ່ງກ່າວ ບັນລຸຜົນສຳເລັດຕາມຄາດໝາຍ ທັງຖືກຕ້ອງຕາມຮີດຄອງປະເພນີ ເປັນຕົ້ນກໍ່ຄື: ງານຕະຫຼາດນັດ, ງານໂລະລາດ ທີ່ຈະມີການວາງຂາຍສິນຄ້າ, ໂດຍຕ້ອງຊີ້ນຳໃຫ້ເປັນສິນຄ້າທີ່ປະຊາຊົນຜະລິດເອງ, ເປັນຕົ້ນ: ຜະລິດຕະພັນເຄື່ອງກະສິກໍາ ແລະ ຫັດຖະກໍາພື້ນບ້ານ ໃຫ້ມາວາງຂາຍໃຫ້ຫຼາຍໆ. ສ່ວນກິດຈະກໍາທາງສາດສະໜາ, ໂດຍສະເພາະ ການໃສ່ບາດຕາມປະເພນີ ແລະ ການຊ່ວງເຮືອນັ້ນ ກໍ່ຕ້ອງເຮັດຢ່າງຫັດກຸມ ໃຫ້ສອດຄ່ອງກັບຮີດຄອງປະເພນີ ແລະ ລະບຽບການຢ່າງເຄັ່ງຄັດ, ທັງນີ້ ກໍ່ເພື່ອເຮັດໃຫ້ງານບຸນຫໍ່ເຂົ້າປະດັບດີນ ແລະ ບຸນຊ່ວງເຮືອປີນີ້ ມີບັນຍາກາດເບິກບານມ່ວນຊື່ນ ຫຼາຍກວ່າປີຜ່ານມາ, ທັງຮັບປະກັນໄດ້ ຄວາມສະຫງົບ, ແລະ ຄວາມເປັນລະບຽບຮຽບຮ້ອຍ ພ້ອມທັງ ຮັກສາໄວ້ຢ່າງໜຽວແໜ້ນ ມູນເຊື້ອວັດທະນະທໍາ ແລະ ຮິດຄອງປະເພນີອັນດີງາມ ທີ່ເປັນເອກະລັກສະເພາະຂອງນະຄອນຫຼວງພະບາງ ເມືອງມໍລະດົກໂລກ. 




ຂ່າວ: ສົມແກ້ວ , ພາບ: ຊານຸດ( ນະຄອນ ຫຼວງພະບາງ)
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.