Header Ads

ແຂວງບໍລິຄໍາໄຊ ມອບເງິນຊ່ວຍເຫຼືອຜູ້ປະສົບໄພພິບັດ 480 ລ້ານກີບ



ເພື່ອເປັນການປະກອບສ່ວນທຶນຮອນເຂົ້າໃນການຊ່ວຍເຫຼືອຜູ້ປະສົບອຸທົກກະໄພນໍ້າຖ້ວມ ຢູ່ບັນດາແຂວງຕ່າງໆທາງພາກເໜືອ, ພາກກາງ ແລະ ພາກໃຕ້ ໃນຂອບເຂດທົ່ວປະເທດ ໃນວັນທີ 30 ກໍລະກົດ 2018 ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ນໍາເງິນຈໍານວນ 200 ລ້ານ ກີບ ໄປມອບໃຫ້ກະຊ່ວງແຮງງານ ແລະ ສະຫວັດດີການສັງຄົມ ເຊິງເປັນກຽດຮັບເງິນດັ່ງກ່າວໂດຍແມ່ນ ທ່ານ ບຸນຄົງ ຫຼ້າສຸກັນ ຮອງລັດທະມົນຕີ ກະຊວງແຮງງານ ແລະ ສະຫວັດດີການສັງຄົມ ເຊິ່ງກ່ອນໜ້ານີ້ແຂວງບໍລິຄໍາໄຊ ແລະ ກອງທຶນໜຶ່ງດວງໃຈບໍລິຄໍາໄຊຊ່ວຍເຫຼື່ອສັງຄົມ ຍັງໄດ້ມອບເງິນໄປກ່ອນແລ້ວໃນມູນຄ່າ 20 ລ້ານກີບ.



ໂອກາດດັ່ງກ່າວ ທ່ານ ບຸນຄົງ ຫຼ້າສຸກັນ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈເປັນຢ່າງສູ່ງ ມາຍັງການນໍາຂອງແຂວງບໍລິຄໍາໄຊ ຕະຫຼອດຮອດພໍ່ແມ່ປະຊາຊົນບັນດາເຜົ່າ ທີເຫັນໄດ້ຄວາມສໍາຄັນນໍາເອົາເງິນຈໍານວນດັ່ງກ່າວມາມອບໃຫ້ໃນຄັ້ງນີ້. ເພື່ອເປັນການສັນລະເສີນຜົນງານ-ຄຸນງາມຄວາມດີດັ່ງກ່າວ ແລະ ເພື່ອຈະໄດ້ບັນທຶກຈາລຶກໄວ້ໃນປຶ້ມປະຫວັດສາດ ຂອງກະຊວງແຮງງານ ແລະ ສະຫວັດດີການສັງຄົມ ໃນພິທີທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຍັງໄດ້ມອບໃບຍ້ອງຍໍຂັ້ນກະຊ່ວງ ໃຫ້ກັບແຂວງບໍລິຄໍາໄຊ.

ຂ່າວຍັງໃຫ້ຮູ້ຕື່ມອີກວ່າ ໃນທ້າຍອາທິດທີຜ່ານມາແຂວງບໍລິຄໍາໄຊ ກໍ່ຍັງໄດ້ຈັດລະດົມທຶນຮ່ອນ ບໍ່ວາຈະເປັນນໍ້າດື່ມ, ເຄື່ອງນຸງຫົມ, ເຄື່ອງອຸປະໂພກ-ບໍລິໂພກ, ອຸປະກອນການແພດ, ຢາປົ່ວພະຍາດ, ເຄື່ອງໃຊ້ຄົວເຮືອນ ແລະ ສິ່ງຂອງຈໍາເປັນຈໍານວນໜຶ່ງ ຈາກບັນດາພະແນກການ-ກົມກອງ, ບໍລິສັດວິສະຫະກິດ, ອົງການຈັດຕັ້ງຂັ້ນຕ່າງໆ ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວແຂວງບໍລິຄໍາໄຊ ແລະ ປະຊາຊົນຊາວຕ່າງປະເທດທີ່ມາອາໃສຢູ່ແຂວງບໍລິຄໍາໄຊ ລວມມູນຄ່າຫຼາຍກວ່າ 260 ລ້ານກີບ ນໍາໄປຊ່ວຍເຫຼື່ອປະຊາຊົນທີ່ຖືກອຸທົກກະໄພນໍ້າຖ້ວມ ຢູ່ທີ່ເມືອງສະໜາມໄຊ ແຂວງອັນຕະປື ໃນການບັນເທົາທຸກເບື້ອງຕົ້ນ ແລະ ເປັນການໃຫ້ກໍາລັງໃຈແກ່ຜູ້ປະສົບໄພ ພ້ອມດ້ວຍເຈົ້າໜ້າທີທີ່ກໍາລັງປະຕິບັດໜ້າທີຢູ່ໃນຂະໜາດນີ້ ໃຫ້ພ້ອມກັນກ້າວຜ່ານວິກິດການຄັ້ງນີ້ໄດ້ໂດຍໄວ້.


© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.