ເມືອງໄຊເຊດຖາ ໃຊ້ມາດຕະການເດັດຂາດຕໍ່ຜູ້ທີ່ບໍ່ປະຕິບັດມ້າງເທີບ-ເງີບ

ທ່ານ ທະ­ວີ​ໄຊ ໄຊ​ປະ­ເສີດ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ເມືອງ​ໄຊ​ເຊດ​ຖາ ໃຫ້​ສຳ­ພາດ​ວັນ​ທີ 28 ສິງ­ຫາ 2018 ວ່າ: ເພື່ອ​ຜັນ​ຂະ­ຫຍາຍ​ວຽກ​ງານ 3 ຫຼຸດ 3 ເພີ່ມ ແລະ 3 ຂະ​ບວນ​ການ​ໃຫ້​ປາ­ກົດ​ຜົນ​ເປັນ​ຈິງ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ (ນວ) ໄດ້​ໄປ​ຖອດ​ຖອນ​ບົດ­ຮຽນ​ນຳ​ເມືອງ​ສີ​ໂຄດ​ຕະ­ບອງ ໃນ​ຕົ້ນ​ປີ 2018 ຈາກ​ນັ້ນ ກໍ່​ໄດ້​ມາ​ຈັດ​ຕັ້ງ​ປະ­ຕິ­ບັດ​ຢູ່​ເມືອງ​ຕົນ​ເອງ ໂດຍ​ນຳ​ເອົາ​ບັນ­ຫາ​ນີ້​ເຂົ້າ​ຜ່ານ​ກອງ​ປະ­ຊຸມ​ເຈົ້າ­ເມືອງ-ຮອງ​ເຈົ້າ­ເມືອງ ໂດຍ​ເມືອງ​ໄຊ​ເຊດ​ຖາ ມີ 5 ເສັ້ນ­ທາງ ໃນ 21 ເສັ້ນ­ທາງ​ຢູ່ ນວ ທີ່​ຈະ​ໄດ້​ຈັດ​ສັນ​ຄວາມ​ເປັນ​ລະ­ບຽບ​ຮຽບ​ຮ້ອຍ ເຊິ່ງ​ກອງ​ປະ­ຊຸມ​ໄດ້​ເຫັນ​ດີ​ເຮັດ​ທົດ​ລອງ​ຢູ່​ເສັ້ນ­ທາງ​ທາດ­ຫຼວງ ແລະ ເສັ້ນ­ທາງ​ກຳ­ແພງ​ເມືອງ ຈາກ​ນັ້ນ ຈຶ່ງ​ຜັນ​ຂະ­ຫຍາຍ​ໄປ​ຍັງ 3 ເສັ້ນ­ທາງ​ທີ່​ເຫຼືອ.

ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ຂັ້ນ​ຕອນ​ທຳ​ອິດ​ໄດ້​ຮວບ​ຮວມ​ເອ­ກະ­ສານ ແລະ ນິ­ຕິ​ກຳ​ຕ່າງໆ​ທີ່​ກ່ຽວ­ຂ້ອງ​ກັບ​ວຽກ​ງານ 3 ຂະ​ບວນ​ການ ຂັ້ນ ນວ ກໍ່​ຄື ຂັ້ນ​ເມືອງ ໂດຍ​ຂຽນ​ເປັນ​ປື້ມ​ໂຄງ­ການ​ແກ້​ໄຂ​ຫຼຸດ­ຜ່ອນ​ອຸ­ບັດ​ຕິ​ເຫດ​ຕາມ​ຖະ­ໜົນ ລົງ​ເກັບ​ກຳ​ຂໍ້​ມູນ​ຕົວ​ຈິງ​ກ່ຽວ​ກັບ​ເທີບ-ເງີບ ທີ່​ກວມ​ເອົາ​ທາງ​ຍ່າງ ແລະ ເຂດ​ສະ­ຫງວນ​ສອງ​ຟາກ​ທາງ ເຊີນ​ປະ­ຊາ­ຊົນ ແລະ ຜູ້​ປະ­ກອບ​ການ​ທຸ­ລະ​ກິດ ທີ່​ຕັ້ງ​ເຮືອນ​ຢູ່​ແຄມ​ທາງ​ໄປ​ຮັບ​ຟັງ​ເຜີຍ­ແຜ່​ເອ­ກະ­ສານ ແລະ ນິ­ຕິ​ກຳ ລົງ​ເກັບ​ກຳ​ຂໍ້​ມູນ​ຕົວ​ຈິງ​ແຕ່​ວັນ​ທີ 7-25 ກໍ­ລະ­ກົດ 2018 ຢູ່​ເສັ້ນ­ທາງ​ທາດ­ຫຼວງ (ວົງ­ວຽນ​ທາດ­ຫຼວງ-ໄຟ​ອຳ­ນາດ​ທາດ­ຫຼວງ-ຂົວ​ຫົວ​ຂົວ-3 ແຍກ​ຕົ້ນ​ຕານ ບ້ານ​ຫົວ​ຂົວ) ໂດຍ​ກຳ­ນົດ 15 ວັນ ໃຫ້​ປະ­ຊາ­ຊົນ​ເປັນ​ຜູ້​ມ້າງ​ເທີບ-ເງີບ​ເອງ ຈາກ​ນັ້ນ ໄດ້​ເລີ່ມ​ມ້າງ​ແຕ່​ວັນ​ທີ 22 ສິງ­ຫາ 2018 ໂດຍ​ການ​ສົມ­ທົບ​ຂອງ​ກຳ­ລັງ​ກໍ່­ສ້າງ​ຮາກ​ຖານ ກະ­ຊວງ​ປ້ອງ​ກັນ​ຄວາມ​ສະ­ຫງົບ ແລະ ຄະ­ນະ​ສະ­ເພາະ​ກິດ​ເມືອງ​ໄຊ​ເຊດ​ຖາ ຜ່ານ​ການ­ຈັດ­ຕັ້ງ​ປະ­ຕິ­ບັດ​ປະ­ຊາ­ຊົນ​ໄດ້​ໃຫ້­ການ​ຮ່ວມ​ມື​ເປັນ​ຢ່າງ​ດີ ໃນ​ນີ້ ແຕ່​ໄຟ​ແດງ​ທາດ­ຫຼວງ-ຂົວ​ຫົວ​ຂົວ ມີ 50 ຫຼັງ­ຄາ​ເຮືອນ ປ້າຍ​ໂຄ­ສະ­ນາ 10 ກວ່າ​ປ້າຍ ແຕ່​ຍັງ​ມີ​ປະ­ຊາ­ຊົນ ແລະ ຜູ້​ປະ­ກອບ​ການ​ຈຳ­ນວນ​ໜຶ່ງ​ຍັງ​ບໍ່​ທັນ​ມ້າງ ໂດຍ​ສະ­ເພາະ ນັບ​ແຕ່​ວົງ­ວຽນ​ທາດ­ຫຼວງ-ໄຟ​ແດງ​ທາດ­ຫຼວງ ວັນ​ທີ 27 ສິງ­ຫາ 2018 ຈຶ່ງ​ໄດ້​ຂໍ​ທິດ​ຊີ້​ນຳ​ຈາກ​ອຳ­ນາດ​ການ​ປົກ­ຄອງ​ເມືອງ ເຊິ່ງ​ອຳ­ນາດ​ການ​ປົກ­ຄອງ​ກໍ່​ເຫັນ​ດີ​ຕົກ­ລົງ​ໃຫ້​ໃຊ້​ມາດ​ຕະ­ການ​ຕໍ່​ຜູ້​ທີ່​ບໍ່​ປະ­ຕິ­ບັດ.

ວັນ​ທີ 28 ສິງ­ຫາ 2018 ຄະ­ນະ​ພວກ​ເຮົາ​ຈຶ່ງ​ໄດ້​ລົງ​ຈັດ​ຕັ້ງ​ປະ­ຕິ­ບັດ ໂດຍ​ເອົາ​ກຳ­ລັງ​ຄົນ ແລະ ພາ­ຫະ­ນະ​ລົງ​ໄປ​ມ້າງ​ເທີບ-ເງີບ ສຳ­ລັບ​ຜູ້​ທີ່​ມີ​ເງື່ອນ­ໄຂ​ກໍ່​ໄດ້​ໃຫ້​ມ້າງ​ເອງ ໂດຍ​ມີ​ກຳ­ນົດ 1 ວັນ ສ່ວນ​ຜູ້​ທີ່​ບໍ່​ມີ​ເງື່ອນ­ໄຂ​ຄະ­ນະ​ກໍ່​ໄດ້​ມ້າງ ໃນ​ນີ້ ການ​ມ້າງ​ເທີບ-ເງີບ​ເສັ້ນ­ທາງ​ທາດ­ຫຼວງ ຄາດ​ວ່າ​ຈະ​ສຳ­ເລັດ​ວັນ​ທີ 31 ສິງ­ຫາ 2018 ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ປະ­ຊາ­ຊົນ​ໃຫ້­ການ​ຮ່ວມ​ມື ເພື່ອ​ສ້າງ​ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ຕົວ​ເມືອງ ຕ້ອນ­ຮັບ​ປີ​ທ່ອງ​ທ່ຽວ​ລາວ 2018 ພາຍ­ຫຼັງ​ສຳ­ເລັດ​ໂຄງ­ການ​ນີ້ ຈະ​ມີ​ການ​ປັກ​ຫຼັກ​ເຂດ​ສະ­ຫງວນ​ແບບ​ຖາ­ວອນ.

ຂ່າວ: ນສພ ວຽງຈັນໃຫ່ມ

© ໂຕະນໍ້າຊາຂ່າວ |  www.tonamcha.com

_____