Header Ads

ທ່ານ ສອນໄຊ ສີພັນດອນ ສຳຫຼວດເບິ່ງສະພາບການຈັດການນໍ້າໃນເຂື່ອນ ທີ່ແຂວງອັດຕະປື



ໃນຕອນບ່າຍ ຂອງວັນທີ 1 ສິງຫາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ເດີນທາງໄປສຳຫຼວດເບິ່ງສະພາບການເກັບກັກ ແລະ ບໍລິຫານຈັດການນໍ້າ ໃນເຂື່ອນໄຟຟ້າແຫ່ງຕ່າງໆ ທີ່ຢູ່ພາຍໃນແຂວງອັດຕະປື ເປັນຕົ້ນ ເຂື່ອນໄຟຟ້ານໍ້າກົງ 1 ແລະ 2, ເຂື່ອນໄຟຟ້າຫ້ວຍເຮາະ, ເຂື່ອນໄຟຟ້າເຊກະໝານ 1.



ໃນໂອກາດດັ່ງກ່າວນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເລິກສຳຫຼວດ ແລະ ສອບຖາມເບິ່ງຂໍ້ມູນ ຂອງໂຄງການເຂື່ອນໄຟຟ້າເຊກະໝານ 1 ເຊິ່ງເຫັນວ່າ: ລະດັບນໍ້າໃນອ່າງ ຮອດເວລາ 24 ໂມງ ຂອງວັນທີ 31 ກໍລະກົດ 2018 ຢູ່ທີ່ລະດັບ 226,036 ແມັດ, ເຊິ່ງລະດັບນໍ້າຍັງບໍ່ທັນໄຫຼຜ່ານປະຕູນໍ້າລົ້ນ (ລະດັບນໍ້າສູງຂຶ້ນຕື່ມປະມານ 4 ແມັດ ຈຶ່ງຈະເຖິງສັນປະຕູນໍ້າລົ້ນ), ລະດັບນໍ້າຂຶ້ນສູງສຸດ ໃນໄລຍະຜ່ານມາ ແມ່ນຢູ່ທີ່ລະດັບ 230 ແມັດ ແລະ ລະດັບນໍ້າຂຶ້ນຕາມຄວາມສາມາດບັນຈຸຂອງອ່າງ ແມ່ນຢູ່ທີ່ລະດັບ 233,16 ແມັດ, ປະລິມານນໍ້າໄຫຼເຂົ້າອ່າງ ໃນເດືອນກໍລະກົດ 2018 ສະເລ່ຍແມ່ນ 575,95 ແມັດກ້ອນ/ວິນາທີ ແລະ ປະລິມານໄຫຼເຂົ້າສູງສຸດແມ່ນ 1.928 ແມັດກ້ອນ/ວິນາທີ, ບໍລິມາດນໍ້າໃນອ່າງ (31/07/2018) ມີ 4.156 ຕື້ແມັດກ້ອນ, ບໍລິມາດນໍ້າໃນອ່າງ ຢູ່ໃນລະດັບນໍ້າຂຶ້ນສູງສຸດ ແມ່ນ 4.808 ຕື້ແມັດກ້ອນ, ຄວາມສາມາດບັນຈຸນໍ້າຂອງອ່າງແມ່ນ 5.275 ຕື້ແມັດກ້ອນ, ມີນໍ້າສຳລັບຮັບໃຊ້ການຜະລິດໄຟຟ້າ ໃນປະຈຸບັນ 1.034 ຕື້ແມັດກ້ອນ.



ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ຄະນະຮັບຜິດຊອບໂຄງການດັ່ງກ່າວ, ໂດຍໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດ ທີ່ໂຄງການເຂື່ອນໄຟຟ້າເຊກະໝານ 1 ສາມາດປະຕິບັັດໄດ້ໃນໄລຍະທີ່ຜ່ານມາ. ພ້ອມທັງ ເນັ້ນໜັກຕື່ມບາງດ້ານ ເປັນຕົ້ນ ໃຫ້ເອົາໃຈໃສ່ຕໍ່ການຕິດຕາມປະລິມານນໍ້າ ກໍ່ຄື ການບໍລິຫານຈັດການນໍ້າໃນອ່າງ ຢ່າງໃກ້ສິດ, ເປັນປົກກະຕິ ແລະ ທັັນສະພາບການ; ເອົາໃຈໃສ່ຕໍ່ການປົກປັກຮັກສາສິ່ງແວດລ້ອມ ໃນຂົງເຂດອ້ອມຮອບ ແລະ ໃນໂຄງການ ໂດຍສະເພາະແມ່ນປ່າໄມ້, ຫ້ວຍນໍາລຳເຊ, ສັດສາວາສິ່ງ; ສືບຕໍ່ຈັດຕັ້ງປະຕິບັດ ບັນດາເນື້ອໃນສັນຍາສຳປະທານ ຢ່າງເຂັ້ມງວດ ແລະ ເກີດປະໂຫຍດສູງສຸດ ແກ່ທຸກຝ່າຍ ລວມທັງ ກນປັບປຸງຊີວິດການເປັນຢູ່ ​ຂອງປະຊາຊົນທີ່ດຳລົງຊີວິດ ໃນເຂດຍົກຍ້າຍຈັດສັນ ໃຫ້ມີອາຊີບທີ່ໝັ້ນຄົງ, ມີຄຸນນະພາບຊີວິດ ທີ່ດີຂຶ້ນເປັນກ້າວໆ.




ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.