Header Ads

ຮອງນາຍົກລັດຖະມົນຕີ ລົງຕິດຕາມການຟື້ນຟູຊີວິດການເປັນຢູ່ຂອງປະຊາຊົນເມືອງສະໜາມໄຊ


ຕອນບ່າຍຂອງວັນທີ 18 ສິງຫາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິພັດລະດັບຊາດ ໄດ້ລົງຢ້ຽມຢາມ ແລະ ຕິດຕາມເບິ່ງຄວາມຄືບໜ້າໃນການຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງປະຊາຊົນ ທີ່ປະສົບໄພພິບັດນໍ້າຖ້ວມ ຢູ່ເມືອງສະໜາມໄຊ, ແຂວງອັດຕະປື ໃນທ້າຍເດືອນກໍລະກົດ 2018 ທີ່ຜ່ານມາ. ໂດຍມີອໍານາດການປົກຂອງແຂວງ, ເມືອງ ແລະ ປະຊາຊົນ ເມືອງສະໜາມໄຊ ໃຫ້ການຕ້ອນຮັບ.



ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ໄປຢ້ຽມຢາມປະຊາຊົນ ຜູ້ທີ່ໄດ້ຮັບຜົນກະທົບຢູ່ໂຮງໜໍເມືອງສະໜາມໄຊ ໂດຍລວມແລ້ວເຫັນວ່າ ການປະຕິບັດວຽກງານປິ່ນປົວ, ຮັກສາສຸຂະພາບໃຫ້ແກ່ຜູ້ປະສົບໄພ ແມ່ນໄດ້ຮັບການເອົາໃຈໃສ່ເປັນຢ່າງດີ, ເຖິງຢ່າງໃດກໍ່ຕາມຍັງເຫັນວ່າ ສະຖານທີ່ຮອງຮັບຄົນເຈັບໃນເຂດດັ່ງກ່າວ ຍັງບໍ່ທັນພຽງພໍ, ການເຈັບເປັນຂອງປະຊາຊົນສ່ວນຫຼາຍ ແມ່ນເປັນໄຂ້ຫວັດ. ປະຈຸບັນ ໜ່ວຍງານທີ່ກ່ຽວຂ້ອງ ໄດ້ດໍາເນີນການກໍ່ສ້າງ ແລະ ຂະຫຍາຍສະຖານທີ່ບໍລິການຄົນເຈັບຕື່ມອີກ. ພ້ອມດຽວກັນນີ້, ການບໍລິການປິ່ນປົວຂອງອາສາສະໝັກຈາກຕ່າງປະເທດ ກໍ່ໄດ້ມີການດໍາເນີນປິ່ນປົວປະຊາຊົນຢ່າງປົກກະຕິ ແລະ ຕະຫຼອດເວລາ.


ໃນໂອກາດດຽວກັນ, ທ່ານ ສອນໄຊ ສີພັນດອນ ຍັງໄດ້ໄປຕິດຕາມ ແລະ ຊຸກຍູ້ການປຸກສ້າງເຮືອນພັກຊົ່ວຄາວໃຫ້ແກ່ ປະຊາຊົນ ຢູ່ໂຮງຮຽນປະຖົມບ້ານຫາດຍາວ, ເມືອງສະໜາມໄຊ  ເພື່ອຮອງຮັບປະຊາຊົນທີ່ປະສົບໄພນໍ້າຖວ້ມ. ມາຮອດປະຈຸບັນ ການປຸກສ້າງດັ່ງກ່າວ ໄດ້ດຳເນີນທັງເວັນ ແລະ ຄືນ ເຊິ່ງຄາດວ່າທ້າຍເດືອນສິງຫານີ້ ຈະສາມາດສ້າງສຳເລັດ ແລະ ໃຫ້ປະຊາຊົນຜູ້ທີ່ໄດ້ຮັບຜົນກະທົບ ຍ້າຍເຂົ້າມາອາໄສໄດ້. ສໍາລັບເຮືອນພັກເຊົາຊົ່ວຄາວແຫ່ງນີ້ ມີທັງໜົດ 14 ຫຼັງ, ປະກອບມີ 140 ຫ້ອງ, ມີຫ້ອງນໍ້າ 5 ຫຼັງ ສາມາດຮັບປະຊາຊົນໄດ້ປະມານ 800 ຄົນ, ສ່ວນການສ້າງບ້ານພັກຊົ່ວຄາວ ຢູ່ບອ່ນອື່ນນັ້ນ ປະຈຸບັນຍັງຢູ່ໃນໄລຍະດຳເນີນການກໍ່ສ້າງ. ຈາກນັ້ນ, ທ່ານສອນໄຊ ສີພັນດອນ ຍັງໄດ້ໄປຢຽ້ມຢາມການຈັດຕັ້ງປະຕິບັດວຽກງານຂອງ ກອງກໍາລັງປ້ອງກັນປະເທດໃນການຄົ້ນຫາຜູ້ປະສົບໄພທີ່ຍັງສູນຫາຍ ແລະ ໄດ້ມອບເງີນຈໍານວນໜຶ່ງ ໃຫ້ແກ່ບັນດາຄອບຄົວທີ່ເສຍຊີວິດ. ການລົງຕິດຕາມ ແລະ ຊຸກຍູ້ແຕ່ລະບ່ອນ, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ບັນດາພະນັກງານ, ທະຫານ, ຕໍາຫຼວດ ກໍ່ຄື ອາສາສະມັກ ທັງພາຍໃນ ແລະ ຕ່າງປະເທດ ທີ່ໄດ້ເອົາໃຈໃສ່ ປະຕິບັດວຽກງານຂອງຕົນ ເຊິ່ງເຮັດໃຫ້ແຕ່ລະວຽກງານ ມີຄວາມຄືບໜ້າເປັນຢ່າງດີ, ອັນເປັນການປະກອບສ່ວນເຮັດໃຫ້ຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບນໍ້າຖ້ວມໃນຄັ້ງນີ້ ໄດ້ຮັບການປັບປຸງດີຂຶ້ນເປັນກ້າວໆ.






ພາຍຫຼັງສໍາເລັດການຕິດຕາມ ແລະ ຊຸກຍູ້, ການປະຕິບັດໜ້າທີ່ຂອງແຕ່ລະພາກສ່ວນຢູ່ພາກສະໜາມແລ້ວ, ທ່ານສອນໄຊ ສີພັນດອນ ຍັງໄດ້ຊີ້ນໍາໃຫ້ຄະນະສະເພາະກິດແກ້ໄຂໄພຂັ້ນແຂວງ ແລະ ເມືອງ ສືບຕໍ່ເອົາໃຈໃສ່ເກັບກໍາສະຖິຕິຂອງປະຊາຊົນທີ່ໄດ້ຮັບຜົນກະທົບໃນຄັ້ງນີ້ ໃຫ້ລະອຽດຈະແຈ້ງຕື່ມ, ກໍານົດກົດລະບຽບໃນການຄຸ້ມຄອງຂອງສູນ, ເອົາໃຈໃສ່ໃນການປະສານສົມທົບລະຫວ່າງແຕ່ລະໜ່ວຍງານໃຫ້ລະອຽດກົມກຽວ ໂດຍສະເພາະແມ່ນ ການປິ່ນປົວຮັກສາສຸຂະພາບຜູ້ປະສົບໄພຢູ່ໂຮງໜໍ ແຂວງ ໃຫ້ແຍກອອກ ລະຫວ່າງ ຄົນເຈັບທີ່ໄດ້ຮັບຜົນກະທົບຈາກໄພພິບັດ ແລະ ຄົນເຈັບທີ່ມາປິ່ນປົວທົ່ວໄປ; ຮີບຮ້ອນເລັ່ງສ້າງເຮືອນພັກຊົ່ວຄາວຂອງປະຊາຊົນ ໃຫ້ສໍາເລັດໂດຍໄວ; ເອົາໃຈໃສ່ປັບປຸງພື້ນຖານໂຄງລ່າງທີ່ຈໍາເປັນ ຢ່າງຮີບດ່ວນ ເປັນຕົ້ນ ຂົວ, ເສັ້ນທາງ, ໂຮງຮຽນ, ສຸກສາລາ ແລະ ອື່ນໆ. ພ້ອມດຽວກັນນີ້, ໃຫ້ກວດກາຄືນຄວາມຕ້ອງການຮີບດ່ວນຢູ່ບັນດາສູນຕ່າງໆ ເພື່ອສະໜອງໃຫ້ທັນການ, ເອົາໃຈໃສ່ໃນການຈັດສົ່ງວັດຖຸສິ່ງຂອງຊ່ວຍເຫຼືອ ໃຫ້ໄປເຖິງສູນຕ່າງໆ ໃນນີ້ໃຫ້ເອົາໃຈໃສ່ໃນການຄຸ້ມຄອງບັນຊີໃຫ້ລະອຽດ, ຈະແຈ້ງ ແລະ ຄົບຖ້ວນ. ສຳຄັນໃຫ້ເອົາໃຈໃສ່ໃນການສະໜອງວັດຖຸ, ອຸປະກອນການຮຽນການສອນ ເພື່ອໃຫ້ລູກຫຼານຜູ້ປະສົບໄພ ໄດ້ເຂົ້າຮຽນຕາມກຳນົດເວລາ.


ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ 
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.