Header Ads

ພະແນກກະສິກໍາ ແລະ ປ່າໄມ້ແຂວງໄຊຍະບູລີ ຈັດພິທີທໍາລາຍຊີ້ນສັດປ່າມູນຄ່າກວ່າ 88 ລ້ານກີບ





ໃນຕອນເຊົ້າວັນທີ 17 ສິງຫາ 2018 ນີ້, ກອງກວດກາປ່າໄມ້ ພະແນກກະສິກໍາ ແລະ ປ່າໄມ້ແຂວງໄຊຍະບູລີ ໄດ້ຈັດພິທີທໍາລາຍຊີ້ນສັດປ່າທີ່ຫວງຫ້າມ ຄັ້ງນີ້ ເປັນຄັ້ງທີ່ 15 ທີ່ກອງກວດກາປ່າໄມ້ໄດ້ຈັດຂື້ນ ເປັນກຽດເຂົ້າຮ່ວມຂອງທ່ານ ແສງເພັດ ສີລິສົມບັດ ຫົວໜ້າກອງກວດກາປ່າໄມ້, ຕ່າງໜ້າຈາກພະແນກກະສິກໍາ ແລະ ປ່າໄມ້ແຂວງ, ພະແນກກະສິກໍາ ແລະ ປ່າໄມ້ ເມືອງພຽງ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມ

ທ່ານ ແສງຈັນ ພານຸເດດ ຮອງຫົວໜ້າກອງກວດກາປ່າໄມ້ແຂວງ ໄດ້ໃຫ້ຮູ້ວ່າ: ໃນວັນທີ 18 ທັນວາ 2017 ຜ່ານມາ ເຈົ້າໜ້າທີ່ປ່າໄມ້ ໄດ້ລົງກວດກາລາດຕະເວນ, ພົບເຫັນ ທ້າວ ສິງທອງ ພິລັກ, ອາຍຸ 46 ປີ, ອາຊີບ ພະນັກງານຄູ ແລະ ທ້າວ ບຸນໄທ ມະນິວັນ, ອາຍຸ 55 ປີ, ອາຊີບ ປະຊາຊົນ, ທັງສອງຄົນ ຢູ່ບ້ານຫ້ວຍຊ່າວ ເມືອງໄຊຍະບູລີ ແຂວງໄຊຍະບູລີ ໄດ້ຕ່າງຊີ້ນຊ້າງປ່າ ຈໍານວນ 88 ກິໂລກຼາມ ( ຊີ້ນດິບ ) ຄິດໄລ່ເປັນມູນຄ່າເສຍຫາຍ 88 ລ້ານກີບ, ປະຈຸບັນຊີ້ນສ່ວນຊ້າງປ່າ ຈໍານວນດັ່ງກ່າວແມ່ນໄດ້ຕາກແຫ້ງ ເຮັດໃຫ້ນໍ້າໜັກຫຼຸດລົງ ຈໍານວນ 53 ກິໂລກຼາມ ນໍ້າໜັກຕົວຈິງ 35 ກິໂລກຼາມ ແລະ ເຈົ້າໜ້າທີ່ປ່າໄມ້ ຍັງສາມາດຍຶດ ຊີ້ນສ່ວນສັດປ່າ ຕາມທອງຕະຫຼາດ ຈໍານວນ 12,6 ກິໂລກຼາມ ໃນນີ້, ມີຊີ້ນຟານແຫ້ງ, ຊີ້ນໝູປ່າແຫ້ງ, ຊີ້ນໄກ້ແຫ້ງ, ກະຮອກແຫ້ງ ແລະ ນົກແຫ້ງ. ເຊິ່ງການກະທຳດັ່ງກ່າວ ເປັນການກະທຳຜິດຕໍ່ກົດໝາຍວ່າດ້ວຍສັດນໍ້າ ແລະ ສັດປ່າ ສະບັບເລກທີ 07/ສພຊ ລົງວັນທີ່ 24 ທັນວາ 2007 .

ທ່ານ ແສງຈັນ ພານຸເດດ ຍັງໃຫ້ຮູ້ຕື່ມວ່າ ໃນໄລຍະຜ່ານມາ ເຈົ້າໜ້າທີ່ກອງກວດກາປ່າໄມ້ ແຂວງໄຊຍະບູລີ ໄດ້ຈັດຕັ້ງພະນັກງານລົງເຜີຍແຜ່ລະບຽບ ກົດໝາຍກ່ຽວກັບການຄຸ້ມຄອງສັດນໍ້າ ແລະ ສັດປ່າໃຫ້ປະຊາຊົນບັນດາເຜົ່າຢູ່ບັນດາເມືອງ ບ້ານທີ່ຫຼໍ່ແຫຼມ ມີຄວາມສ່ຽງສູງຕໍ່ການລ່າ ຫາສັດນໍ້າ ແລະ ສັດປ່າ ເຊິ່ງໄດ້ຕິດຕັ້ງໂພດສະເຕີ ແລະ ປ້າຍໂຄສະນາ ເພື່ອໃຫ້ປະຊາຊົນບັນດາເຜົ່າມີຄວາມເຂົ້າໃຈ ມີຄວາມຮັບຮູ້ຕໍ່ລະບຽບກົດໝາຍສັດນໍ້າ ແລະ ສັດປ່າ ພ້ອມກັນນີ້ ກໍໄດ້ລົງຕິດຕາມກວດກາເປັນປະຈຳ ເພື່ອເກັບກໍາຂໍ້ມູນບຸກຄົນ ເປົ້າໝາຍທີ່ມີການຊື້-ຂາຍສັດນໍ້າ ແລະ ສັດປ່າ ພ້ອມທັງ ແຈ້ງເຊີນບຸກຄົນເປົ້າໝາຍຕ່າງໆເຂົ້າມາສຶກສາອົບຮົມ ແລະ ເຮັດບົດບັນທຶກເພື່ອບໍ່ໃຫ້ກັບມາເຄື່ອນໄຫວທີ່ຜິດຕໍ່ລະບຽບກົດໝາຍອີກຕໍ່ໄປ.


ພາບ-ຂ່າວ: ສາຄອນໄຊສົມຮັກສາ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.