Header Ads

ເຂັ້ມງວດລາດຕະເວນໄລຍະພັກຮຽນ ສະກັດກັ້ນແກ້ງຂີ່ລົດກວນເມືອງ



ກໍາລັງປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ຈະເພີ່ມຄວາມເຂັ້ມງວດໃນການກວດກາລາດຕະເວນເປັນສອງເທົ່າຢູ່ຕາມສາຍທາງຕ່າງໆ ແລະ ຈຸດສໍາຄັນ ໃນຊ່ວງພັກຮຽນ ເພື່ອແກ້ໄຂບັນດາກຸ່ມແກ້ງຂີ່ລົດກວນເມືອງ.

ໃນໄລຍະເດືອນ ກໍລະກົດ ຫາ ກັນຍາ ເຈົ້າໜ້າທີ່ ຈະເພີ່ມຄວາມເຂັ້ມງວດໃນການກວດກາລາດຕະເວນຂຶ້ນເປັນສອງເທົ່າ ຢູ່ຕາມເສັ້ນທາງຕ່າງໆເປັນຕົ້ນແມ່ນ: ຢູ່ຕາມເສັ້ນທາງສາຍສໍາຄັນ ໃນນະຄອນຫຼວງວຽງຈັນ ໂດຍເພີ່ມກໍາລັງພົນ ແລະ ລົດສະເກມເຂົ້າກວດກາຕື່ມອີກ ເພື່ອຄວບຄຸມພື້ນທີ່ດັ່ງກ່າວໃຫ້ຫຼາຍຂຶ້ນ ເມື່ອມີບັນດາກຸ່ມແກ້ງຂີ່ລົດກວນເມືອງ ຫຼື ຂີ່ແຂ່ງກັນ ກໍຈະເຂົ້າສະກັດກັ້ນໂດຍຢຶດລົດ ແລະ ຄົນໄວ້ ເພື່ອນໍາມາສຶກສາອົບຮົມ ແລະ ໃຊ້ມາດຕະການຕໍ່ຜູ້ລະເມີດ.

ຜ່ານມາ, ເຈົ້າໜ້າທີ່ ສາມາດກັກລົດໄດ້ທັງໝົດ 369 ຄັນ; ໃນນີ້, ແກ້ໄຂແລ້ວ 275 ຄັນ, ເປັນລົດຢູ່ໃນກຸ່ມແກ້ງກວນເມືອງ 114 ຄັນ, ບໍ່ຖືເອກະສານ 31 ຄັນ, ຍັງບໍ່ທັນແກ້ໄຂ 69 ຄັນ; ຕໍ່ກັບບັນຫາດັ່ງກ່າວນີ້, ເຈົ້າໜ້າທີ່ສຶກສາອົບຮົມຜູ້ລະເມີດໄດ້ 321 ຄົນ ຍິງ 51 ຄົນ; ນອກນີ້, ຍັງສາມາດກັກຕົວຜູ້ຄ້າຂາຍຢາເສບຕິດ ແລະ ຂີ້ລັກງັດແງະໄດ້ທັງໝົດ 23 ຄົນ, ຍຶດຂອງກາງຢາບ້າໄດ້ 1.699 ເມັດ, ຢາໄອສ໌ 4 ຖົງນ້ອຍ, ປືນ 1 ກະບອກ, ກະແຈໂຕເຕ 3 ຊຸດ, ໂທລະສັບມືຖື 6 ໜ່ວຍ ແລະ ລົດຈັກ 25 ຄັນ. 


ທີ່ມາ: ປກສ ນະຄອນຫຼວງວຽງຈັນ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.