Header Ads

ທ່ານນາຍົກລັດຖະມົນຕີ ຕ້ອນຮັບການເຂົ້າຢ້ຽມ ຂອງຄະນະຊ່ຽວຊານຕ່າງປະເທດ ທີ່ຊ່ວຍຄະນະຮັບຜິດຊອບ ສືບສວນ-ສອບສວນ ສາເຫດຄູກັນນໍ້າຂອງເຂື່ອນໄຟຟ້າເຊປຽນ-ເຊນໍ້ານ້ອຍ ແຕກພັງ ເລກທີ 54/ນຍ



ໃນຕອນເຊົ້າຂອງວັນທີ 21 ສິງຫາ 2018 ທີ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະ ມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ທ່ານ Prof. Dr. Schliess Anton J ຜູ້ຊ່ຽວຊານອາວຸໂສ ທັງເປັນປະ ທານກິຕິມະສັກອົງການເຂື່ອນໃຫຍ່ສາກົນ ICOLD ພ້ອມດ້ວຍຄະນະວິສະວະກອນຕ່າງປະເທດ ໃນໂອກາດເດີນທາງມາຮ່ວມເຮັດວຽກກັບ ຄະນະສືບສວນຫາສາຍເຫດຄູກັນນໍ້າຂອງເຂື່ອນໄຟຟ້າເຊປຽນ-ເຊນ້ຳນ້ອຍ ແຕກພັງ ຕາມຂໍ້ຕົກລົງເລກທີ 54/ນຍ.



ກ່ອນອື່ນ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເຂົ້າຮ່ວມເປັນຄະນະສືບສວນນາໆຊາດ ໃນເຫດການເຂື່ອນແຕກໃນຄັ້ງນີ້ ໂດຍສະເພາະ ແມ່ນການລົງລວບລວມ, ເກັບກໍາຂໍ້ມູນທາງດ້ານການສຳຫຼວດ, ອອກແບບ, ການກໍ່ສ້າງ ແລະ ລົງໄປສຳຫຼວດເບິ່ງສະຖານທີ່ເກີດເຫດ ໃນວັນທີ 19-20 ສິງຫາ 2018 ທີ່ຜ່ານມາ.

ໂອກາດດັ່ງກ່າວ, ທ່ານ Prof. Dr. Schliess Anton J ໄດ້ສະແດງຄວາມຂອບໃຈ ຕໍ່ທ່ານນາຍົກລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ. ພ້ອມທັງ ສະແດງຄວາມເສຍໃຈ ຕໍ່ຜົນເສຍຫາຍທີ່ເກີດຂຶ້ນ ທັງຊີວິດ ແລະ ຊັບສິນ ຂອງປະຊາຊົນເມືອງສະໜາມໄຊ ໃນໄລຍະທີ່ຜ່ານມາ. ຫຼັງຈາກນັ້ນ ກໍ່ໄດ້ລາຍງານໃຫ້ທ່ານນາຍົກລັດຖະ ມົນຕີ ໄດ້ຮັບຊາບ ການລົງເຮັດວຽກຕົວຈິງ ຮ່ວມກັບຄະນະຮັບຜິດຊອບ ສືບສວນ-ສອບສວນ ແລະ ບໍລິສັດທີ່ກ່ຽວຂ້ອງໃນໂຄງການ. ຜ່ານການຈັດຕັ້ງປະຕິບັດວຽກງານຕົວຈິງມາໄດ້ໄລຍະໜຶ່ງ ເຫັນວ່າ ມີຄວາມຄືບໜ້າດີພໍສົມຄວນ ແລະ ໄດ້ຮັບການຮ່ວມມືຈາກທຸກພາກສ່ວນ. ສໍາລັບການກວດກາຂອງຄະນະສືບສວນນາໆຊາດໃນຄັ້ງນີ້ ຈະໄດ້ເກັບກໍາຂໍ້ມູນລະອຽດ ເປັນຕົ້ນ ຂໍ້ມູນ ແລະ ເຕັກນິກການສຳຫຼວດ, ການປະເມີນ, ການອອກແບບ, ເຊິ່ງທ່ານ Prof. Dr. Schliess Anton J ຍັງຈະໄດ້ເອົາຂໍ້ມູນທັງໝົດ ໄປຮ່ວມເຮັດວຽກກັບທີມງານອີກ 2ທ່ານ ທີ່ບໍ່ໄດ້ມາຮ່ວມເກັບກຳຂໍ້ມູນໃນຄັ້ງນີ້. ຄາດວ່າໃນເດືອນຕຸລາ 2018 ນີ້ ຄະນະທັງສາມທ່ານ ພ້ອມດ້ວຍຄະນະວິສະວະກອນ ຂອງຕ່າງປະເທດອີກຈຳນວນໜື່ງ ຈະໄດ້ມາເບີ່ງພາກສະໜາມຕົວຈິງອີກຄັ້ງ ແລະ ພະຍາຍາມສະຫຼຸບຫາຕົ້ນສາເຫດທີ່ແທ້ຈິງ ເຊີ່ງຄາດວ່າຈະໄດ້ຄຳຕອບທີ່ຊັດເຈນເວລາໃນທ້າຍປີ 2018 ຫຼື ຕົ້ນປີ 2019 ເປັນຢ່າງຊ້າ. ທ່ານ Prof. Dr. Sc hliess Anton J ໄດ້ກ່າວວ່າ ອຸບັດຕິເຫດແມ່ນສາມາດເກີດໄດ້ກັບທຸກຢ່າງ ແລະ ເກີດໄດ້ຢູ່ທຸກປະເທດ ບໍ່ວ່າຈະເປັນປະເທດທີ່ຈະເລີນ ແລະ ມີເຕັກນິກວິຊາການສູງແລ້ວກໍ່ຕາມ ແຕ່ເມື່ອເກິດແລ້ວ ກໍ່ຕ້ອງໄດ້ຊອກຫາສາຍເຫດໃຫ້ໄດ້ ເພຶື່ອເປັນບົດຮຽນ ແລະ ວາງມາດຕະການສະກັດກັ້ນບໍ່ໃຫ້ເກີດຂື້ນອີກ ເພາະການພັດທະນາໂຄງການເຂື່ອນໄຟຟ້າ ເປັນສີ່ງທີ່ດີຕໍ່ຄວາມສະເລີນຮຸ່ງເຮືອງຂອງປະເທດ, ທັງເປັນແຫຼ່ງພະລັງງານທີ່ສະອາດ ແລະ ສັງຄົມມະນຸດຍັງຕ້ອງການພະລັງງນ.



ໂອກາດດຽວກັນນີ້, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ ທ່ານ Prof. Dr. Schliess Anton J ທີ່ໄດ້ໃຫ້ຂໍ້ມູນສໍາຄັນ ແລະ ເປັນປະໂຫຍດ ເພື່ອເຮັດໃຫ້ການສືບສວນ-ສອບສວນ ໃນຄັ້ງນີ້ ມີປະສິດທິຜົນ, ໂປ່ງໃສ, ຍຸຕິທຳ ແລະ ທັນເວລາ. ພ້ອມດຽວກັນນີ້, ທ່ານ ທອງລຸນ ສີສຸລິດ ໄດ້ເນັ້ນໜັກໃຫ້ຄະນະຊ່ຽວຊານຕ່າງປະເທດ ສືບຕໍ່ປະສານສົມທົບກັບຄະນະສືບສວນສອບສວນຂອງຝ່າຍ ສປປ ລາວ ເພື່ອເຮັດໃຫ້ການຈັດຕັ້ງປະຕິບັດວຽກງານ ການສືບສວນ-ສອບສວນ ສາເຫດຄູກັນນໍ້າ ຂອງເຂື່ອນໄຟຟ້າເຊປຽນ-ເຊນໍ້ານ້ອຍ ແຕກພັງ ລວມທັງ ບັນດາເຂື່ອນທີ່ສ້າງແລ້ວ ແລະ ກຳລັງດຳເນີນການກໍ່ສ້າງ ຢູ່ ສປປ ລາວ ມີຜົນສຳເລັດຕາມແຜນການທີ່ວາງໄວ້.


ຂ່າວຈາກ: ວັນທອງ ສນຍ (Via Lao National Radio)
© ໂຕະນໍ້າຊາ  | www.tonamcha.com | www.tonamchanews.com
_______



No comments

Powered by Blogger.