Header Ads

ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ລົງຢ້ຽມຢາມຜູ້ປະສົບໄພ ທ່າມກາງສາຍຝົນ



ໃນວັນທີ 15 ສິງຫາ 2018, ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ຊຶ່ງນຳໂດຍ ທ່ານ ຄຳແພງ ໄຊສົມແພງ ປະທານຄະນະກຳມະການດັ່ງກ່າວ ທັງເປັນລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ລົງໄປຢ້ຽມຢາມ, ຊຸກຍູ້ ແລະ ໃຫ້ກຳລັງໃຈ ຜູ້ປະສົບໄພພິບັດ ທີ່ເມືອງສະໜາມໄຊ, ແຂວງ ອັດຕະປື ທ່າມກາງສາຍຝົນທີ່ຕົກລິນຕະຫລອດທັງວັນ.


ຄະນະດັ່ງກ່າວ ໄດ້ໄປຢ້ຽມຢາມສູນພັກຊົ່ວຄາວ ໂຮງຮຽນປະຖົມມິດສຳພັນ ແລະ ສະຖານທີ່ປຸກສ້າງທີ່ພັກຊົ່ວຄາວຢູ່ບ້ານຫາດຍາວ ຊຶ່ງການເດີນທາງເຂົ້າຫາສະຖານທີ່ດັ່ງກ່າວຕ້ອງໄດ້ຂີ່ເຮືອກູ້ໄພເຂົ້າໄປໂດຍໃຊ້ເວລາປະມານ 2 ຊົ່ວໂມງ ຈຶ່ງຈະສາມາດເຂົ້າເຖິງໄດ້ ເນື່ອງຈາກວ່າລະດັບນ້ຳສູງຂຶ້ນ ແລະ ຫົນທາງຖືກຕັດຂາດ.

ການເດີນທາງດ້ວຍເຮືອບໍ່ແມ່ນເລື່ອງງ່າຍເລີຍ ຄົນຂັບຕ້ອງມີຄວາມຊຳນານ ແລະ ໃຈກ້າ ເພາະວ່າກະແສນ້ຳໄຫລແຮງ ແລະ ມີຕົ້ນໄມ້, ຂອນໄມ້ ໄຫລມານຳນ້ຳເປັນຈຳນວນຫລວງຫລາຍ ແລະ ບໍ່ຂາດສາຍ, ສະນັ້ນ ຖ້າບໍ່ມີຄວາມຊຳນານພໍ ຫລື ບໍ່ມີຄວາມລະມັດລະວັງສູງ ກໍອາດຈະສາມາດເຮັດໃຫ້ເຮືອຫລົ້ມກໍໄດ້. ຕະຫລອດໄລຍະຂອງການຂີ່ເຮືອປະມານ 2 ຊົ່ວໂມງ (ໄປ-ກັບເປັນ 4 ຊົ່ວໂມງ), ທຸກຄົນໃນຂະນະຕ່າງກໍພາກັນໃຈຈົດໃຈຈໍ່ ແລະ ຮ້ອງຫາສິ່ງສັກສິດໃຫ້ຊ່ວຍຄຸຸ້ມຄອງ ໃຫ້ມີຄວາມປອດໄພຈາກສິ່ງຕ່າງໆນາໆ ຕາມຄວາມເຊື່ອ ແລະ ຄວາມນັບຖືຂອງແຕ່ລະຄົນ.




ໂອກາດລົງຢ້ຽມຢາມ, ທ່ານປະທານຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດກໍໄດ້ໂອ້ລົມກັບພໍ່ແມ່ປະຊາຊົນ, ຖາມກ່ຽວກັບການກິນຢູ່ຕ່າງໆ, ພ້ອມທັງໃຫ້ກຳລັງໃຈ ແລະ ບອກໃຫ້ພໍ່ແມ່ພີ່ນ້ອງທີ່ປະສົບໄພ ໃຫ້ມີຄວາມອຸ່ນອຽນທຸ່ນທ່ຽງ, ເຊື່ອໝັ້ນພັກ-ລັດ, ເພາະວ່າພັກ-ລັດຈະບໍ່ປະບໍ່ຖີ້ມປະຊາຊົນ ແລະ ໃນຕອນນີ້ກໍກຳລັງເລັ່ງສ້າງສະຖານທີ່ພັກຊົ່ວຄາວໃຫ້ສຳເລັດໂດຍໄວ ເພື່ອເຮັດໃຫ້ຜູ້ປະສົບໄພມີຄວາມສະດວກສະບາຍຫລາຍກວ່ານີ້.


ຂ່າວ: ສິງຄຳ, ພາບ: ເພັດສະໄໝ (ຂປລ)
© ໂຕະນໍ້າຊາ  | www.tonamcha.com | www.tonamchanews.com
_______



No comments

Powered by Blogger.