Header Ads

ທາບທາມຄໍາຄິດຄໍາເຫັນ ຕໍ່ຮ່າງດຳລັດ ວ່າດ້ວຍການຄຸ້ມຄອງດ່ານຊາຍແດນ



ໃນຕອນເຊົ້າຂອງວັນທີ 15 ສິງຫາ 2018 ຢູ່ທີ່ຫໍປະຊຸມແຫ່ງຊາດ, ໄດ້ຈັດກອງປະຊຸມທາບທາມຄຳຄິດຄໍາເຫັນ ກ່ຽວກັບຮ່າງດຳລັດ ວ່າດ້ວຍການຄຸ້ມຄອງ ດ່ານຊາຍແດນຢູ່ຂັ້ນສູນກາງ ແລະ 4 ແຂວງພາກກາງ, ພາຍໃຕ້ການເປັນປະທານຂອງ ທ່ານ ສົົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີທ່ານລັດຖະມົນຕີປະຈໍາສໍານັກງານນາຍົກລັດຖະມົນຕີ, ບັນດາທ່ານຮອງລັດຖະມົນຕີ, ບັນດາທ່ານຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພະນັກງານຈາກພາກສ່ວນທີ່ກ່ຽວ ຂ້ອງເຂົ້າຮ່ວມ.



ໂອກາດກ່າວເປີດກອງປະຊຸມ ທ່ານ ສົມດີ ດວງດີ ໄດ້ກ່າວວ່າ: ຈຸດປະສົງ ແລະ ເນື້ອໃນຕົ້ນ ຕໍຂອງຮ່າງດຳລັດສະບັບນີ້ ເພື່ອເປັນບ່ອນອີງທາງດ້ານນິຕິກຳ ໃນການຄຸ້ມຄອງ ແລະ ຈັດຕັ້ງປະຕິບັດວຽກງານຄຸ້ມຄອງ ດ່ານຊາຍແດນ ໃນອະນາຄົດ, ທັງເປັນການປັບປຸງແກ້ໄຂບັນຫາຄົງຄ້າງ ໃນການຄຸ້ມຄອງດ່ານຊາຍແດນຂອງປະເທດເຮົາ ທີ່ຍັງບໍ່ທັນເປັນເອກະພາບ ໃນໄລຍະທີ່ຜ່ານມາ ໂດຍສະເພາະ ການຈັດປະເພດດ່ານ, ກົງຈັກການຈັດຕັ້ງ, ໂຄງປະກອບບຸກຄະລາກອນ, ການຄຸ້ມຄອງການເກັບລາຍຮັບ ຜ່ານປະຕູດຽວ, ມາດຖານເງື່ອນໄຂ ແລະ ເຕັກນິກຂອງດ່ານ, ການອະນຸຍາດດໍາເນີນທຸລະກິດ ຢູ່ພາຍໃນດ່ານ ແລະ ອົງກອນຄຸ້ມຄອງລັດດ່ານຊາຍແດນ ຕໍ່ບັນຫາດັ່ງກ່າວນີ້, ເພື່ອເຮັດໃຫ້ວຽກງານການຄຸ້ມຄອງ ດ່ານຊາຍແດນ ມີຄວາມເປັນເອກະພາບ ແລະ ຈັດຕັ້ງປະຕິບັດຢ່າງມີປະສິດທິຜົນ ແລະ ມີຜົນສໍາເລັດເປັນກ້າວໆນັ້ນ, ກອງປະຊຸມຄັ້ງນີ້ ຈະໄດ້ພ້ອມກັນປຶກສາຫາລືກັນ ແລະ ລົງເລິກຄົ້ນຄວ້າໃຫ້ລະອຽດ ຢ່າງກົງໄປກົງກົງມາ ເພື່ອຄວາມເປັນເອກະພາບກັນ ກ່ອນນໍາສະເໜີກອງປະຊຸມລັດຖະບານ ພິຈາລະນາຮັບຮອງ. ພ້ອມດຽວກັນນີ້, ໃນໂອກາດກ່າວເປີດກອງປະຊຸມ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ຍັງໄດ້ເນັ້ນໜັກໃຫ້ຜູ້ເຂົ້າຮ່ວມກອງປະຊຸມ ເອົາໃຈໃສ່ປະກອບຄໍາຄິດຄໍາເຫັນໃນບາງຈຸດ ທີ່ເຫັນວ່າຍັງບໍ່ທັນຊັດເຈນ, ຈະແຈ້ງ ສໍາຄັນເມື່ອດໍາລັດດັ່ງກ່າວ ໄດ້ຖືກຮັບຮອງ ແລະ ປະກາດໃຊ້ແລ້ວ ໃຫ້ຈັດຕັ້ງປະຕິບັດ ​ໄດ້ຢ່າງເປັນເອກະພາບ ແລະ ແທດເໝາະກັບຕົວຈິງ, ຮັບປະກັນໄດ້ຄວາມສະຫງົບປອດໄພ ສາມາດເຊື່ອມໂຍງເສດຖະກິດກັບພາກພື້ນ ແລະ ສາກົນ.


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ 
© ໂຕະນໍ້າຊາ  | www.tonamcha.com | www.tonamchanews.com
_______

No comments

Powered by Blogger.