Header Ads

ເຈົ້າໜ້າທີ່ກອງຄຸ້ມຄອງພາສີ VI ຢຶດສັດປາ ຫວງຫ້າມປະເພດງູຈົງອາງ ແລະເຕົ່າ ທີ່ກຽມນຳອອກຫວຽດນາມ



ເຈົ້າໜ້າທີ່ພາສີຂະແໜງການຕ້ານ ແລະ ກວດສອບຄືນການແຈ້ງພາສີ ຂຶ້ນກັບກອງກຸ້ມຄອງພາສີ VI (ແຂວງຄຳມ່ວນ, ສະຫວັນນະເຂດ) ໄດ້ເຂັ້ມງວດກວດເຂັ້ມ ແລະ ໄລ່ລ່າພວກຄ້າຂາຍສິນຄ້າເກືອດຫ້າມປະເພດຕ່າງໆ… ຫລ້າສຸດໃນວັນທີ 17 ສິງຫາ 2018 ເຈົ້າໜ້າທີ່ກອງຄຸ້ມຄອງພາສີ VI ສາມາດກວດຢຶດສັດປ່າຫວງຫ້າມປະເພດ: ງູຈົງອາງ ມີຊີວິດ ຈຳນວນ 32 ແກັດ ນໍ້າໜັກ 266 ກິໂລ, ເຕົ່າງັບ ມີຊີວິດ ຈຳນວນ 48 ໂຕ ນໍ້າໜັກ 44 ກິໂລ.



ດັ່ງນັ້ນ, ໃນວັນເສົາທີ 18 ສິງຫາ 2018 ຜ່ານມາ, ຈຶ່ງໄດ້ເຮັດບົດບັນທຶກມອບ-ຮັບປະເພດສັດດັ່ງກ່າວໃຫ້ກອງກວດກາປ່າໄມ້ ປະຈຳແຂວງສະຫວັນນະເຂດ ເພື່ອນນຳໄປດຳເນີນຄະດີຕາມລະບຽບກົດໝາຍ ແລະ ເອົາສັດ ປ່າດັ່ງກ່າວໄປປ່ອຍຄືນສູ່ທຳມະຊາດ, ໂດຍການມອບຂອງທ່ານ ສີເມືອງ ສີຫາລາດ ຫົວໜ້າຂະແໜງຕ້ານ ແລະ ກວດສອບຄືນການແຈ້ງພາສີ ກອງກຸ້ມຄອງພາສີ VI ແລະ ກ່າວຮັບຂອງທ່ານ ວໍລະສິດ ສີວົງດາວ ຫົວໜ້າກອງກວດກາປ່າໄມ້ ປະຈຳແຂວງສະຫວັນນະເຂດ, ໂດຍການເຂົ້າຮ່ວມຂອງທ່ານ ພົມມະຈັກ ສີພັນດອນ ຫົວໜ້າກອງກຸ້ມຄອງພາສີ VI ແລະ ພະນັກງານວິຊາການທັງສອງພາກສ່ວນເຂົ້າຮ່ວມ.

ອີງຕາມການລາຍງານຈາກທ່ານ ສີເມືອງ ສີຫາລາດ ຫົວໜ້າຂະແໜງຕ້ານ ແລະ ກວດສອບຄືນການແຈ້ງພາສີ ກອງກຸ້ມຄອງພາສີ VI ໃຫ້ຮູ້ວ່າ: ໃນວັນທີ 17 ສິງຫາ 2018 ເຈົ້າທີ່ພາສີ, ເຈົ້າໜ້າທີ່ຕໍາຫຼວດ ໄດ້ອອກລາດຕະເວນເຂັ້ມງວດໃນການກວດກາ, ຕ້ານ ແລະ ສະກັດກັ້ນການລັກລອບສິນຄ້າໜີພາສີ ແລະ ກຸ່ມຄົນບໍ່ດີທີ່ລັກລອບສິນຄ້າເກືອດຫ້າມປະເພດຕ່າງໆ…ຈິ່ງໄດ້ພົບເຫັນປະເພດ: ງູຈົງອາງ ມີຊີວິດ ຈຳນວນ 32 ແກັດ ນໍ້າໜັກ 266 ກິໂລ, ເຕົ່າງັບ ມີຊີວິດ ຈຳນວນ 48 ໂຕ ນໍ້າໜັກ 44 ກິໂລ, ຢູ່ຈຸດກວດກາເຂດບ້ານດົງ (ທາງເລກທີ 9) ເມືອງເຊໂປນ ແຂວງສະຫວັນນະເຂດ, ເປົ້າໝາຍແມ່ນກຽມນຳອອກໄປ ສສ ຫວຽດນາມ (ການນຳອອກໄປ ສສ ຫວຽດນາມ ລັກສະນະແບບກອງທັບໝົດ), ຊຶ່ງການກວດກາ ແລະ ຢຶດສັດປ່າຫວງຫ້າມໃນຄັ້ງນີ້ບໍ່ສາມາດກັກຕົວຜູ້ກະທຳຜິດໄດ້, ເນື່ອງຈາກວ່າຜູ້ກະທຳຜິດໄຫວຕົວທັນ, ຈິ່ງໄດ້ຖີ່ມຂອງກາງໄວ້ແລ້ວເອົາຕົວລົບໜີໄປ, ຈິ່ງບໍ່ສາມາດຮູ້ໄດ້ວ່າສັດປ່າດັ່ງກ່າວແມ່ນນຳມາຈາກໃສ.


ທ່ານ ສີເມືອງ ສີຫາລາດ ຫົວໜ້າຂະແໜງຕ້ານ ແລະ ກວດສອບຄືນການແຈ້ງພາສີ ກອງກຸ້ມຄອງພາສີ VI ໃຫ້ຮູ້ອີກວ່າ: ການກວດກາ ແລະ ຢຶດສັດປ່າຫວງຫ້າມປະເພດເຕົ່າ, ງູຈົງອາງ ໃນສະເພາະເດືອນສິງຫາເປັນທີ່ສອງແລ້ວເນື່ອງຈາກວ່າໃນວັນທີ 5 ສິງຫາ 2018 ໄດ້ຮັບແຈ້ງຂອງພົນລະເມືອງດີວ່າຈະມີການນຳສັດປ່າອອກຂາຍຢູ່ຕ່າງປະເທດ.

ສະນັ້ນ, ເຈົ້າໜ້າທີ່ພາສີຂະແໜງການຕ້ານກໍ່ໄດ້ອອກຕິດຕາມຢູ່ຈຸດບ້ານໜອງນົກຂຽນ ເມືອງສອງຄອນ ແຂວງສະຫວັນນະເຂດ,ຊຶ່ງເປົ້າໝາຍແມ່ນລົດໂດຍສານ, ພໍເຖິງເວລາປະມານ 23:30 ໂມງຈຶ່ງໄດ້ເຫັນລົດໂດຍສານເປົ້າໝາຍແລ່ນມາເຈົ້າໜ້າທີ່ຈຶ່ງໄດ້ອອກລັດລົດຄັນດັ່ງກ່າວ, ເມື່ອຄົນຂັບເຫັນເຈົ້າໜ້າທີ່ກໍ່ໄດ້ລ້ຽວລົດກັບຄືນຫວັງຈະຫຼົບໜີເຈົ້າໜ້າທີ່,ເມື່ອເປັນເຊັ່ນນັ້ນທາງເຈົ້າໜ້າທີ່ຈຶ່ງໄດ້ໄລ່ຕິດຕາມແລ້ວສະກັດລົດໃຫ້ຈອດແລ້ວສະແດງການກວດຄົ້ນໄດ້ພົບເຫັນສັດປ່າຫວງຫ້າມຈຳນວນໜຶ່ງ.


ຈາກນັ້ນທາງເຈົ້າໜ້າທີ່ຈຶ່ງໄດ້ຂໍຄວາມຮ່ວມມືນຳເຈົ້າຂອງລົດ ເພື່ອຈະໄດ້ນຳເອົາລົດຄັນດັ່ງກ່າວມາກວດກາຢ່າງລະອຽດຢູ່ຫ້ອງການກອງຄຸ້ມຄອງພາສີ VI ຈຶ່ງພົບເຫັນສັດປ່າຫວງຫ້າມຕື່ມອີກທີ່ຊຸກເຊື່ອງໄວ້ດ້ານລຸ້ມບ່ອນນັ່ງແຖວສຸດທ້າຍເປັນຈຳນວນຫຼວງຫຼາຍປະກອບມີ: ເຕົ່າເປັນຈຳນວນ 18 ໂຕ ນ້ຳໜັກ 25 ກິໂລ, ງູຈົງອາງ 14 ກິໂລ, ລິ່ນ 19 ກິໂລ, ງູສິງຈຳນວນ 29 ກິໂລ, ຊຶ່ງລົດໂດຍສານທີ່ຂົນສັດຈຳນວນດັ່ງກ່າວແມ່ນໝາຍເລກທະບຽນ ບຂ 0299 ຈຳປາສັກ, ຂັບໂດຍຄົນຫວຽດນາມ, ລົດຄັນນີ້ ນັ່ງມານຳກັນ 6 ຄົນ, ຍິງ 2 ຄົນ, ເປັນຄົນຫວຽດນາມທັງໝົດ ໂດຍມີປາຍທາງຈະໄປ ສສ ຫວຽດນາມ, ຜ່ານທາງດ່ານສາກົນແດນສະຫວັນ-ລາວບາວ ແລະ ທາງເຈົ້າໜ້າທີ່ພາສີຈຶ່ງໄດ້ເຮັດບົດບັນທຶກກັບເຈົ້າຂອງລົດພ້ອມຢຶດສັດປ່າຫວງຫ້າມ ແລະ ປັບໃໝຕາມລະບຽບກົດໝາຍ.


ຂ່າວ-ພາບ: ນັກຂ່າວກະຊວງການເງິນ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.