Header Ads

ເມືອງວຽງຄໍາ ແຂວງຫຼວງພະບາງ ໄດ້ຮັບຜົນກະທົບໜັກຈາກໄພພິບັດທຳມະຊາດ



ເນື່ອງຈາກຝົນຕົກໜັກ ຕິດຕໍ່ກັນນັບແຕ່ວັນທີ່ 28-31 ສິງຫາຜ່ານມາ, ເຮັດໃຫ້ບັນດາບ້ານຢູ່ເມືອງວຽງຄຳ ແຂວງຫຼວງພະບາງ ໄດ້ຮັບຜົນກະທົບໜັກ ຍ້ອນມີນໍ້າປ່າໄຫຼຊຸ, ດິນເຈື່ອນຖົມເສັ້ນທາງ ແລະ ນໍ້າແຊງຂື້ນສູງ ໄຫຼຖ້ວມພື້ນຖານໂຄງລ່າງຕ່າງໆ, ລວມທັງເນື້ອທີ່ທຳການຜະລິດ, ຜົນລະປູກ, ສັດລ້ຽງ ແລະ ເຮືອນຊານຂອງປະຊາຊົນ, ສ້າງຄວາມເສຍຫາຍທາງດ້ານຊັບສິນຂອງປະຊາຊົນເປັນຈຳນວນຫຼວງຫຼາຍ ໂດຍສະເພາະ 7 ບ້ານພາຍໃນເມືອງ ແມ່ນມີດີນເຈື່ອນຖະໄຫຼຖົມເຮືອນຂອງປະຊາຊົນ 45 ຫຼັງຄາ, ເສຍຫາຍໜັກ 15 ຫຼັງຄາ, ນໍ້າປ່າໄຫຼຊຸເຂົ້າຫ້ອງການກອງບັນຊາການປ້ອງກັນຄວາມສະຫງົບເມືອງ ເຮັດໃຫ້ອຸປະກອນຫ້ອງການເສຍຫາຍ, ເປ່ເພ ແລະ ນໍ້າໄຫຼຊຸເອົາດິນຖົມຂົວຂ້າມນໍ້າແຊງເປັນຈຳນວນຫຼວງຫຼາຍ ເຮັດໃຫ້ການສັນຈອນໄປ-ມາ ບໍ່ສະດວກ. ນອກຈາກນັ້ນ, ຍັງມີຮ່ອງນໍ້າອັດຕັນ, ຕົ້ນໄມ້ຫັກລົ້ມ, ດິນເຈື່ອນຖົມເສັ້ນທາງຫຼວງແຫ່ງຊາດ ຢ່າງໜັກໜ່ວງ (ສະເພາະເຂດເທດສະບານເມືອງໜັກໜ່ວງ 21 ຈຸດ) ລົດບໍ່ສາມາດສັນຈອນໄປ-ມາໄດ້ ແລະ ການສັນຈອນລະຫວ່າງ ບ້ານຕໍ່ບ້ານ ຖືກຕັດຂາດ





ສ່ວນເສັ້ນທາງຊົນນະບົດ ຈຳນວນໜື່ງ ກໍ່ບໍ່ສາມາດນຳໃຊ້ໄດ້, ເສົາໄຟຟ້າຫັກລົ້ມຈຳນວນ 25 ຕົ້ນ, ຕາຂ່າຍແຮງຕໍ່າ-ຄົວເຮືອນເສຍຫາຍ ເຮັດໃຫ້ລະບົບໄຟຟ້າຖືກຕັດຂາດ, ສັດລ້ຽງສູນຫາຍ ແລະ ລົ້ມຕາຍ, ຕົ້ນໄມ້ອຸດສາຫະກຳ ແລະ ເນື້ອທີ່ທຳການຜະລິດ, ແລະ ຜົນ ລະປູກຂອງປະຊາຊົນ ເສຍຫາຍຢ່າງຫຼວງຫຼາຍ, ລວມມູນຄ່າຄວາມເສຍຫາຍໃນເບື້ອງຕົ້ນມີທັງໝົດ ສູງເຖິງ 4 ຕື້ 360 ລ້ານກີບ. 





ປັດຈຸບັນ, ຊີວິດການເປັນຢູ່ຂອງປະຊາຊົນແມ່ນມີຄວາມຫຍຸ້ງຍາກທາງດ້ານທີ່ພັກພາອາໄສ ເພາະວ່າເຮືອນຖືກດີນເຈື່ອນທັບຖົມ, ວັດສະດຸເປເພ, ກະເບື້ອງຫັກແຕກ, ສັງກະສີຈີກຂາດ, ອຸປະກອນຮັບໃຊ້ຄົວເຮືອນເສຍຫາຍ, ລວມໄປເຖິງ ຂາດແຄນນໍ້າດື່ມ-ນໍ້າໃຊ້ ແລະ ສັນຍານໂທລະສັບຕິດຕໍ່ສື່ສານຕິດຄັດ ໃຊ້ການບໍ່ໄດ້. ຕໍ່ກັບສະພາບ ການດັ່ງກ່າວ, ທາງຄະນະກຳມະການປ້ອງກັນ ແລະຄວມຄຸມໄພພິບັດຂັ້ນເມືອງ ໄດ້ລົງສົມທົບກັບອົງການປົກຄອງບ້ານ ເພື່ອພ້ອມກັນຕິດຕາມກວດກາ ຄອບຄົວທີ່ໄດ້ຮັບຜົນກະທົບ ໂດຍໄດ້ແນະນຳ ແລະປຸກລະດົມປະຊາຊົນ, ພະນັກງານ, ທະຫານ-ຕໍ່າຫຼວດ ຊ່ວຍເບີ່ງແຍງ ແລະ ຊ່ວຍເຫຼືອທາງດ້ານແຮງງານ ເກັບມ້ຽນສິ່ງເສດເຫຼືອ, ເຄື່ອງໃຊ້ສອຍ ແລະ ວັດຖຸຊັບສິນ ພ້ອມທັງ ສ້ອມແປງອຳນວຍຄວາມສະດວກທາງດ້ານສະຖານທີ່ພັກເຊົາ ເພື່ອແກ້ໄຂຄວາມຈຳເປັນຂອງຄອບຄົວ ແລະ ທັງລະດົມທຸກພາກສ່ວນພາຍໃນເມືອງໃຫ້ຊ່ວຍກັນຂົນດີນອອກຈາກຂົວນໍ້າແຊງ ແລະ ເສັ້ນທາງ ຈຳນວນ 3 ຈຸດ ໃນເທດສະບານເມືອງ ເພື່ອໃຫ້ສາມາດສັນຈອນໄປ-ມາໄດ້.








ຂ່າວ-ພາບ: ອະພຸດເດດ ບຸບຜາ (ວສລ)
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.