Header Ads

ຈັດເວທີປຶກສາຫາລືກ່ຽວກັບການສົ່ງເສີມການລົງທຶນຂອງຈີນຢູ່ລາວ



ໃນຕອນເຊົ້າມື້ນີ້ ວັນທີ 28 ກັນຍາ 2018, ທີ່ໂຮງແຮມແລນມາກ, ນະຄອນຫລວງວຽງຈັນ, ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບ ຄະນະຮັບຜິດຊອບເວທີປຶກສາຫາລື ປົວອ້າວ ສຳລັບອາຊີ ໄດ້ຈັດກອງປະຊຸມເວທີປຶກສາຫາລືປົວອ້າວສຳລັບອາຊີ, ໂດຍມີທ່ານສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ຫລີ ປາວຕົ່ງ, ເລຂາທິ ການກອງປະຊຸມປົວອ້າວສຳລັບອາຊີ, ພ້ອມດ້ວຍນັກທຸລະກິດ ລາວ-ຈີນ ແລະ ແຂກຮັບເຊີນ ເຂົ້າຮ່ວມ 200 ຄົນ. 





ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເປັນການສ້າງເຄືອຂ່າຍໃຫ້ແກ່ນັກທຸລະກິດ, ແລະ ສົ່ງເສີມໃຫ້ມີການຮ່ວມມືທາງດ້ານການຄ້າ ແລະ ການລົງທຶນ ລະຫວ່າງນັກທຸລະກິດລາວ-ຈີນ, ທັງເປັນການສ້າງໂອກາດໃຫ້ນັກທຸລະກິດລາວ-ຈີນ ໄດ້ພົບປະເຈລະຈາ ແລະ ປຶກສາຫາລືເພື່ອຊອກຫາຊ່ອງທາງຮ່ວມມືກັນ ໃນຮູບແບບຕ່າງໆ ໃຫ້ຫລາຍຂຶ້ນກ່ວາເກົ່າ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ. ໃນກອງປະຊຸມຄັ້ງນີ້, ສະພາການຄ້າ ແລະ ອຸດສາ ຫະກຳແຫ່ງຊາດລາວ ໄດ້ນຳເອົາ 80 ກ່ວາບໍລິສັດຂອງລາວເຂົ້າຮ່ວມ ເພື່ອໃຫ້ບໍລິສັດເຫລົ່ານີ້ ໄດ້ມີໂອກາດພົບປະ ແລະ ປຶກສາຫາລື ເພື່ອຫາວິທີຮ່ວມມືກັບບັນດາບໍລິສັດຈາກຈີນໃນຮູບແບບຕ່າງໆ ເພື່ອຜົນປະໂຫຍດ ຮ່ວມກັນ, ທັງເພື່ອເປັນການດຶງດູດນັກລົງທຶນຈາກຈີນເຂົ້າມາລົງທຶນຢູ່ລາວ ໃຫ້ນັບມື້ເພີ່ມຂຶ້ນ. ໃນໂອກາດນີ້, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ກຽດກ່າວຄຳເຫັນຕໍ່ກອງປະຊຸມ. 


ທ່ານໄດ້ຍົກໃຫ້ເຫັນໂດຍຫຍໍ້ ສະພາບການພັດທະນາເສດຖະກິດ-ສັງຄົມຂອງລາວ ທີ່ນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງໃນລະດັບສະເລ່ຍ 7 ສ່ວນຮ້ອຍຕໍ່ປີ, ໃນຂະນະທີ່ ລາຍຮັບສະເລ່ຍຂອງພົນລະເມືອງລາວ ແມ່ນ 2.400 ໂດລາສະຫະລັດຕໍ່ຄົນ ຕໍ່ປີ. ປັດຈຸບັນ, ນັກລົງທຶນຈາກປະເທດຈີນ ເຂົ້າມາລົງທຶນຢູ່ລາວເປັນຈຳນວນຫລວງ ຫລາຍ ໃນຂະນະທີ່ລັດຖະບານລາວ ພວມເລັ່ງປັບປຸງສິ່ງທີ່ເປັນອຸປະສັກກີດຂວາງການລົງທຶນຢູ່ລາວ ໂດຍສະເພາະ ແມ່ນດ້ານນິຕິກຳ ແລະ ພື້ນຖານໂຄງລ່າງຕ່າງໆ ໃຫ້ ສະດວກສະບາຍກ່ວາເກົ່າ; ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ຮຽກຮ້ອງໃຫ້ນັກລົງທຶນຈາກຈີນ ກໍ່ຄື ນັກລົງທຶນຈາກປະເທດອື່ນໆ ໃຫ້ຫັນມາລົງທຶນຢູ່ລາວໃຫ້ຫລາຍຂຶ້ນ ເນື່ອງຈາກມີຫລາຍດ້ານທີ່ນ່າສົນໃຈ, ເປັນຕົ້ນ ກໍ່ແມ່ນ ດ້ານພະລັງງານ ແລະ ບໍ່ແຮ່, ອະສັງຫາລິມະຊັບ, ແລະ ກະສິກຳ.


ຂ່າວ: ບຸນຕຽງ ຈັນທະວົງ (Via Lao national Radio )
© ໂຕະນໍ້າຊາຂ່າວ |  www.tonamcha.com | www.tonamchanews.com
_____


No comments

Powered by Blogger.