Header Ads

ປກສ ແຂວງອຸດົມໄຊ ປ່ອຍສັດປ່າ ປະເພດໂຕຫຼິ່ນ ຈຳນວນ 09 ໂຕ ຄືນສູ່ທຳມະຊາດ


ໃນຕອນບ່າຍຂອງວັນທີ 28 ສິງຫາ 2018 ເຈົ້າໜ້າທີ່ ວິຊາສະເພາະ ປກສ ແຂວງອຸດົມໄຊ ປ່ອຍສັດປ່າຫ່ວງຫ້າມທີ່ກວດກາພົບເຫັນ ແລະ ກັກໄດ້ຈາກພວກລັກລອບຊື້-ຂາຍສັດປ່າ ປະເພດໂຕຫຼິ່ນ ຈຳນວນ 09 ໂຕ ປ່ອຍຄືນສູ່ປ່າທຳມະຊາດ ທີ່ປ່າສະຫງວນນ້ຳກັດ ຢ່າງເປັນທາງການ; ໂດຍການເຂົ້າຮ່ວມເປັນກຽດຂອງ ສະຫາຍ ພັອ ນິລະວົງ ເຈື່ອງຕະວະລາດ ກໍາມະການພັກແຂວງ ຫົວໜ້າກອງບັນຊາການ ປກສ ແຂວງອຸດົມໄຊ ,ສະຫາຍ ພັທ ດວງຈັນ ໄຊວຸດ ຫົວໜ້າຫ້ອງສັນຕິບານ ປກສ ແຂວງ ພ້ອມດ້ວຍພະນັກງານວິຊາສະເພາະ ທີ່ກ່ຽວຂ້ອງເຂົ້າຮ່ວມ.





ເຈົ້າໜ້າທີ່ວິຊາສະເພາະໄດ້ໃຫ້ຮູ້ວ່າ: ໃນຄັ້ງວັນທີ 24 ສິງຫາ 2018 ນີ້; ພະແນກວິຊາສະເພາະຫ້ອງສັນຕິບານ ປກສ ແຂວງອຸດົມໄຊໄດ້ ຮັບລາຍງານຈາກພົນລະເມືອງດີວ່າ: ມີກຸ່ມຄົນຈຳນວນໜຶ່ງໄດ້ມີການຊື້-ຂາຍ ແລະ ເຄື່ອນຍ້າຍສັດປ່າປະເພດຫ່ວງຫ້າມຈາກເສັ້ນທາງເມືອງແບງ-ເມືອງໄຊ ແຂວງອຸດົມໄຊ, ຈາກນັ້ນ ຄະນະພັກ ຄະນະຫ້ອງສັນຕິບານກໍ່ໄດ້ແຕ່ງຕັ້ງພະນັກງານວິຊາສະເພາະລົງກວດກາຢູ່ຈຸດຫຼັກກິໂລແມັດທີ 9 ແລະ ຫຼັກ 14 ເມືອງແບງ – ເມືອງໄຊ ,ມາຮອດ ເວລາ 20 ໂມງ 30 ນາທີ ຂອງວັນດຽວກັນ ຈິ່ງສາມາດພົບເຫັນພວກລັກລອບຊື້-ຂາຍສັດປ່າຫ່ວງຫ້າມ.


ເຈົ້າໜ້າທີ່ວິຊາສະເພາະກໍ່ໄດ້ກັກຕົວຜູ້ຊື້-ຂາຍສັດປະເພດຫ່ວງຫ້າມ( ໂຕຫຼິ່ນ ) ຈໍານວນ 9 ໂຕ,ນໍ້າໜັກ 48 ກິໂລກຣາມ; ເຈົ້າໜ້າທີ່ຈຶງໄດ້ກັກຕົວພ້ອມທັງນໍາຕົວພວກກ່ຽວໄປສຶບສວນ-ສອບສວນ ທັງສາມຄົນຊື່ ທ. ໂດ ວັກບິກ ອາຍຸ 35 ປີ ເຊື້້ອຊາດ-ສັນຊາດຫວຽດນາມ,ປະຈຸບັນໄດ້ມາພັກເຊົ່າຢູ່ບ້ານພັກແຫ່ງໜື່ງເທດສະບານແຂວງອຸດົມໄຊ ສປປ ລາວ (ຖືກກັກຕົວ),ທ. ແດງ ອິນວຸດທິ ອາຍຸ 32 ປີ ອາຊີບຄ້າ-ຂາຍ ຢູ່ບ້ານ ນາຢາງຄຳ ເມືອງເງິນ ແຂວງໄຊຍະບູລີ ແລະ ທ. ວັນເທີ ຫຼື ຕູ້ຍ ຢູ່ບ້ານ ຫຼັກ 10 ເມືອງໄຊ ແຂວງອຸດົມໄຊ(ທັງສອງຄົນແມ່ນບໍ່ຖືກກັກຕົວ) ແຕ່ຖືກສຶກສາອົບຮົມກ່າວເຕືອນຕາມລະບຽບກົດໝາຍວ່າດ້ວຍ ສັດນໍ້າ ແລະ ສັດປ່າ ສະບັດເລກທີ 07/ສພຊ ລົງວັນທີ 24ທັນວາ 2007 ແລະ ທິດຊີ້ນໍາຂອງກອງບັນຊາການ ປກສ ອູດົມໄຊ,ຄັ້ງວັນທີ 27 ສິງຫາ 2018


ຂ່າວ: ສທ ພອນສະຫວັດ ພົມມະເລດ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.