ເນື້ອທີ່ການຜະລິດກະສິກຳທົ່ວປະເທດ ໄດ້ຮັບຜົນກະທົບຈາກໄພນໍ້າຖ້ວມ ປະມານ 100.000 ເຮັກຕາ

ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຄະ­ນະ​ປະ­ຈຳ​ພັກ​ກະ­ຊວງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ໃນ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ​ກະ­ຊວງ​ກະ­ສິ­ກຳ ແລະ ປ່າ­ໄມ້ ເປີດ​ກວ້າງ ຄັ້ງ​ທີ 6 ສະ­ໄໝ​ທີ V ວ່າ: ປີ 2018 ທົ່ວ​ປະ­ເທດ​ໄດ້​ຮັບ​ຜົນ​ກະ­ທົບ​ຮ້າຍ​ແຮງ​ເກີນ​ຄາດ​ຄະ­ເນ​ໄວ້ ເຊິ່ງ​ເຮັດ​ໃຫ້​ເນື້ອ­ທີ່​ການ​ຜະ­ລິດ​ກະ­ສິ­ກຳ​ຖືກ​ນ້ຳ​ຖ້ວມ 108.000 ເຮັກ­ຕາ ໃນ​ນີ້ ເນື້ອ­ທີ່​ປູກ​ເຂົ້າ 101.000 ເຮັກ­ຕາ ເທົ່າ​ກັບ 12% ຂອງ​ເນື້ອ­ທີ່​ແຜນ​ປູກ​ເຂົ້າ­ນາ​ປີ​ທົ່ວ​ປະ­ເທດ (817.000 ເຮັກ­ຕາ) ປັດ­ຈຸ­ບັນ​ເສຍ​ຫາຍ 66.000 ເຮັກ­ຕາ ເທົ່າ​ກັບ 8% ຂອງ​ເນື້ອ­ທີ່​ນາ​ທັງ​ໝົດ (ເກີນ​ຄ່າ​ເຕືອນ​ໄພ 3%) ພືດ​ໄດ້​ຮັບ​ຜົນ​ກະ­ທົບ 7.400 ເຮັກ­ຕາ ຄາດ​ວ່າ​ເສຍ​ຫາຍ 3.000 ເຮັກ­ຕາ ທຽບ­ໃສ່​ຜົນ​ກະ­ທົບ​ຈາກ​ພາ­ຍຸ​ໄຮ​ມາ ແລະ ນົກ​ເຕັນ​ໃນ​ປີ 2011 ຜົນ​ເສຍ​ຫາຍ​ຫຼຸດ​ລົງ 2% ຊົນ­ລະ­ປະ­ທານ​ຖືກ​ກະ­ທົບ 586 ໂຄງ­ການ ໃນ​ນີ້ ຫົວ​ງານ 188 ແຫ່ງ ຄອງ­ເໝືອງ 236 ແຫ່ງ ເນື້ອ­ທີ່​ລວມ 10.057 ເຮັກ­ຕາ ຖືກ​ນ້ຳ​ຖ້ວມ 3.600 ເຮັກ­ຕາ ຄວາມ​ເສຍ​ຫາຍ​ຈາກ​ນ້ຳ​ຖ້ວມ ດິນ​ເຈື່ອນ ເປ່​ເພ 4.100 ເຮັກ­ຕາ ນອກ​ນີ້​ຍັງ​ມີ​ສັດ​ທີ່​ຖືກ​ຜົນ​ກະ­ທົບ ເປັນ­ຕົ້ນ ຄວາຍ 5.871 ໂຕ ງົວ 13.500 ໂຕ ແຂວງ​ຖືກ​ກະ­ທົບ​ຫຼາຍ​ກວ່າ​ໝູ່​ນອກ­ຈາກ​ແຂວງ​ອັດ​ຕະ​ປື​ແມ່ນ​ແຂວງ​ຄຳ​ມ່ວນ ເນື້ອ­ທີ່​ການ​ຜະ­ລິດ 37.000 ເຮັກ­ຕາ ເສຍ​ຫາຍ 21.400 ເຮັກ­ຕາ ສະ­ຫວັນ​ນະ​ເຂດ 34.600 ເຮັກ­ຕາ ເສຍ​ຫາຍ 25.900 ເຮັກ­ຕາ ຈຳ­ປາ​ສັກ 12.900 ເຮັກ­ຕາ ເສຍ​ຫາຍ 7.900 ເຮັກ­ຕາ ບໍ​ລິ​ຄຳ​ໄຊ 7.500 ເຮັກ­ຕາ ເສຍ​ຫາຍ 2.800 ເຮັກ­ຕາ.

ສັງ​ລວມ​ມູນ​ຄ່າ​ຄວາມ​ເສຍ​ຫາຍ​ເບື້ອງ​ຕົ້ນ​ປີ​ນີ້ ປະ­ມານ 504 ຕື້​ກີບ ໃນ​ນີ້ ດ້ານ​ປູກ­ຝັງ​ເສຍ​ຫາຍ 315 ຕື້​ກີບ ດ້ານ​ລ້ຽງ­ສັດ ແລະ ການ​ປະ­ມົງ 6 ຕື້​ກີບ ດ້ານ​ຊົນ­ລະ­ປະ­ທານ 183 ຕື້​ກີບ ນອກ​ນີ້ ບາງ​ແຂວງ​ກໍ່​ຍັງ​ບໍ່​ໄດ້​ປະ​ເມີນ​ຜົນ​ເສຍ​ຫາຍ​ຄື: ຈຳ­ປາ​ສັກ ໄຊ​ຍະ​ບູ​ລີ ແລະ ອຸ­ດົມ​ໄຊ ເຊິ່ງ​ໄລ­ຍະ​ຜ່ານ​ມາ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຮັບ​ງົບ­ປະ­ມານ​ບ້ວງ​ໄພ­ພິ­ບັດ​ທັງ​ໝົດ 171,2 ຕື້​ກີບ ໃນ​ສົກ​ປີ 2012-2013 ໄດ້​ຮັບ 130 ຕື້​ກີບ ສົກ​ປີ 2013-2014 ໄດ້​ຮັບ 30 ຕື້​ກີບ ສົກ​ປີ 2014-2015 ໄດ້​ຮັບ 1,5 ຕື້​ກີບ ສົກ​ປີ 2015-2016 ໄດ້​ຮັບ 3,5 ຕື້​ກີບ ແລະ ປີ 2017 ໄດ້​ຮັບ 6,2 ຕື້​ກີບ.

ສັງ​ລວມ​ແລ້ວ ຜົນ​ເສຍ​ຫາຍ​ຈາກ​ໄພ­ພິ­ບັດ​ຄັ້ງ​ນີ້​ແມ່ນ​ກວ້າງ­ຂວາງ ກວມ​ເອົາ​ຂອບ​ເຂດ​ທົ່ວ​ປະ­ເທດ ຜົນ​ກະ­ທົບ​ເປັນ​ວົງ​ກວ້າງ ແລະ ສິ່ງ​ທ້າ​ທາຍ​ທີ່​ສຸດ​ແມ່ນ​ການ​ສະ­ໜອງ​ແນວ​ພັນ​ທັງ​ລະ­ດູ­ຝົນ​ປີ­ໜ້າ ແລະ ແລ້ງ​ປີ​ນີ້​ອາດ​ຈະ​ບໍ່​ພຽງ­ພໍ. ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ​ກະ­ຊວງ​ກະ­ສິ­ກຳ ແລະ ປ່າ­ໄມ້ ເປີດ​ກວ້າງ ຄັ້ງ​ທີ 6 ສະ­ໄໝ​ທີ V ຂຶ້ນ​ວັນ​ທີ 27-28 ສິງ­ຫາ 2018 ຢູ່​ກະ­ຊວງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ສະ­ຫາຍ ລຽນ ທິ​ແກ້ວ ກຳ­ມະ­ການ​ສູນ​ກາງ​ພັກ ເລ­ຂາ​ຄະ­ນະ​ພັກ​ກະ­ຊວງ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ຮອງ​ເລ­ຂາ​ຄະ­ນະ​ພັກ ຄະ­ນະ​ປະ­ຈຳ​ພັກ ຄະ­ນະ​ພັກ ເລ­ຂາ​ຄະ­ນະ​ພັກ​ຮາກ​ຖານ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວ: ນສພ ວຽງຈັນໃຫ່ມ

© ໂຕະນໍ້າຊາຂ່າວ |  www.tonamcha.com

_____