Header Ads

ເມືອງທ່າແຕງ ມອບເງິນນະໂຍບາຍຕໍ່ຜູ້ມີຜົນງານໃນພາລະກິດປົດປ່ອຍຊາດ



ໃນວັນທີ 18 ກັນຍາ 2018 ທີ່ຫ້ອງການແຮງງານ ແລະ ສະຫວັດດີການສັງຄົມເມືອງ ທ່າແຕງ ແຂວງເຊກອງໄດ້ຈັດພິທີມອບ-ຮັບເງິນນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ ການປະຕິວັດຊາດ ປະຊາ ທິປະໄຕ ຂຶ້ນໂດຍເປັນປະທານ ຂອງ ທ່ານ ລິນທອງ ພຸດທະບຸນມາ ຮອງຫົວໜ້າ ຫ້ອງການແຮງງານ ແລະ ສະຫວັດດີການສັງຄົມ ເມືອງ ທ່າແຕງ, ເປັນກຽດເຂົ້າຮ່ວມ ຂອງ ທ່ານ ອົບມາ ລາດຕະກຸນ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ, ຫົວໜ້າ-ຮອງ ຂະແໜງການກ່ຽວ ຂ້ອງຂັ້ນແຂວງ-ຂັ້ນເມືອງ, ພະນັກງານວິຊາການ ພ້ອມດ້ວຍ ພະນັກງານບໍານານອາວຸໂສປະຕິວັດ ເຂົ້າຮ່ວມ. 






ທ່ານ ໜູໄໝ ຄໍາປະເສີດ ຫົວໜ້າຂະແໜງນະໂຍບາຍ ພະແນກແຮງງານ ແລະ ສະຫວັດດີການສັງຄົມ ແຂວງ ໄດ້ຜ່ານດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງແຮງງານ ແລະ ສະຫວັດດີການສັງຄົມ ສະບັບເລກທີ 200/ນຍ, ລົງວັນທີ 30 ມິຖຸນາ 2017, ອີງຕາມດໍາລັດວ່າດ້ວຍການປະຕິບັດນະໂຍບາຍ ຕໍ່ຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິ ວັດຊາດ ປະຊາທິປະໄຕ, ສະບັບເລກທີ 272/ລບ, ລົງວັນທີ 16 ກັນຍາ 2015, ອີງຕາມບັນຊີລາຍຊື່ ຜູ້ທີ່ຈະໄດ້ຮັບນະໂຍບາຍເງິນອຸດ ໜູນເສຍສະຫຼະຊີວິດ ຂອງພະແນກແຮງງານ ແລະ ສະຫວັດດິການສັງຄົມ ແຂວງ ເຊກອງ ສະບັບເລກທີ 153/ຮສສຂ, ລົງວັນທີ 26 ມີນາ 2018 ແລະ ບັນຊີລາຍຊື່ ຜູ້ທີ່ຈະໄດ້ຮັບນະໂຍບາຍເງິນອຸດໜູນຍັງມີຊີວິດຈາກພະແນກ, ສະບັບເລກທີ 025/ຮສສຂ, ລົງວັນທີ 15 ມັງກອນ 2018 ດ້ວຍຄວາມເປັນຫ່ວງເປັນໄຍ ແລະ ຮູ້ບຸນຄຸນຢ່າງເລິກເຊິ່ງຂອງພັກ ແລະ ລັດຖະບານເຮົາ ຕໍ່ຜູ້ທີ່ໄດ້ອຸທິດເຮື່ອແຮງ ສະຕິປັນຍາ, ຍອມເສຍສະຫຼະເລືອດເນື້ອຊີວິດ ໃນການດໍາເນີນພາລະກິດປະຕິວັດຊາດໃນເມື່ອກ່ອນ. 

ດັ່ງນັ້ນ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ຈິ່ງໄດ້ຕົກລົງອະນຸມັດເງິນນະໂຍບາຍອຸດໜູນເສຍສະຫຼະຊີວິດ ແລະ ຍັງມີຊີວິດ ໃຫ້ພະແນກ ແຮງງານ ແລະ ສະຫວັດດີການສັງຄົມ ແຂວງ ເຊກອງ ນໍາໄປມອບໃຫ້ພາກສ່ວນຫ້ອງການກ່ຽວຂ້ອງຂອງຕົນ ໃຫ້ສໍາເລັດຕາມແຜນ ການ, ເວົ້າສະເພາະ ຢູ່ເມືອງ ທ່າແຕງ ມີຈໍານວນ 68 ທ່ານເປັນເງິນທັງໝົດ 1 ຕື້ 6 ຮ້ອຍກວ່າລ້ານກີບ ແລະ ເງິນນະໂຍບາຍອຸດໜູນ ຍັງມີຊີວິດຈໍານວນ 17 ທ່ານ, ເປັນເງິນທັງໝົດ 5 ຮ້ອຍ 13 ລ້ານ 6 ແສນກວ່າກີບ ໃຫ້ກຽດກ່າວມອບໂດຍ ທ່ານ ອົບມາ ລາດຕະກຸນ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ແລະ ກ່າວຮັບໂດຍ ທ່ານ ລິນທອງ ພຸດທະບຸນມາ ຮອງຫົວໜ້າ ຫ້ອງການແຮງງານ ແລະ ສະຫວັດດີການສັງຄົມ ເມືອງ ທ່າແຕງ.

ຈາກນັ້ນທ່ານກໍໄດ້ມອບຕໍ່ໃຫ້ຜູ້ຕາງໜ້າຄອບຄົວພະນັກງານອາວຸໂສປະຕິວັດ, ມີບັນດາຄະນະຫ້ອງການ, ຂະແໜ່ງການກ່ຽວ ຂ້ອງ, ພະນັກງານວິຊາການ ພ້ອມດ້ວຍພະນັກງານອາວຸໂສປະຕິວັດເຂົ້າຮ່ວມເປັນສັກຂີພິຍານ.



ຂ່າວ: ພອນ ບຸນອຸທິດ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.