Header Ads

ລັດຖະບານລາວ ມອບຫລຽນກາມິດຕະພາບ ໃຫ້ແກ່ ຜູ້ຕາງໜ້າອົງການອະນາໄມໂລກ (WHO) ປະຈຳ ສປປ ລາວ



ໃນວັນທີ 20 ກັນຍາ 2018 ຢູ່ທີ່ ກະຊວງການຕ່າງປະເທດ ໄດ້ມີພິທີປະດັບຫລຽນກາມິດຕະພາບ ໃຫ້ແກ່ ທ່ານ ດຣ. ນາງ ຈູລຽດ ຟຣາຍໂຊ (Dr. Juliet Fleischl), ຜູ້ຕາງໜ້າອົງການອະນາໄມໂລກ (WHO) ປະຈຳ ສປປ ລາວ ເພື່ອເປັນການຍ້ອງຍໍຊົມເຊີຍຜົນງານ ຂອງຜູ້ກ່ຽວໃນໂອກາດ ສິ້ນສຸດການປະຕິບັດໜ້າທີ່ຢູ່ ສປປ ລາວ, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ໃຫ້ກຽດຕາງໜ້າລັດຖະບານລາວ ເປັນຜູ້ປະດັບຫລຽນກາມິດຕະພາບໃນຄັ້ງນີ້, ເຊິ່ງມີພະນັກງານຂັ້ນສູງ ຈາກບັນດາກະຊວງຂະແໜງການກ່ຽວຂ້ອງເຂົ້າຮ່ວມ. 



ໃນໂອກາດດັ່ງກ່າວ, ທ່ານລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ວຽກງານໃນໄລຍະຜ່ານມາຂອງ ທ່ານ ດຣ. ນາງ ຈູລຽດ ຟຣາຍໂຊ ທີ່ໄດ້ເສີມຂະຫຍາຍການພົວພັນຮ່ວມມື ແລະ ຊ່ວຍເຫລືອໃນດ້ານວຽກງານສາທາລະນະສຸກ ຢູ່ ສປປ ລາວ. ດັ່ງນັ້ນ, ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງຍ້ອງຍໍປະດັບ ຫລຽນກາມິດຕະພາບ ເພື່ອເປັນການຈາລຶກຜົນງານການປະກອບສ່ວນໃນການສ້າງສາພັດທະນາ ຢູ່ ສປປ ລາວ ຂອງຜູ້ກ່ຽວ. ພ້ອມດຽວກັນ ທ່ານ ດຣ. ນາງ ຈູລຽດ ຟຣາຍໂຊ ກໍໄດ້ສະແດງຄວາມຂອບອົກຂອບໃຈ ຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫລອດໄລຍະການປະຕິບັດໜ້າທີ່ ຂອງທ່ານ ໃນໄລຍະ 04 ປີ ທີ່ຜ່ານມາ, ພ້ອມທັງຢືນຢັນຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນການຮ່ວມມື ລະຫວ່າງ ສປປ ລາວ ກັບ ອົງການ WHO ຕໍ່ໄປ.




ພາບ ແລະ ຂ່າວ: ກະຊວງການຕ່າງປະເທດ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.