Header Ads

ລາວ-ຈີນ ກຽມເປີດປີທ່ອງທ່ຽວຮ່ວມກັນໃນປີ 2019 ເພື່ອຊຸກຍູ້ສົ່ງເສີມທ່ອງທ່ຽວທັງສອງປະເທດ



ອີງຕາມການລາຍງານຂອງ ວສລ ວ່າ: ສປປ ລາວ ແລະ ສປ ຈີນ ພວມກະກຽມເປີດປີທ່ອງທ່ຽວຮ່ວມກັນໃນປີ 2019 ທີ່ຈະມາເຖີງນີ້ ເພື່ອຊຸກຍູ້ສົ່ງເສີມໃຫ້ນັກທ່ອງທ່ຽວຈີນເຂົ້າມາທ່ອງ ທ່ຽວລາວໃຫ້ຫລາຍຂຶ້ນກ່ວາເກົ່າ, ທັງເປັນການສ້າງລາຍຮັບຈາກການທ່ອງທ່ຽວໃຫ້ແກ່ສອງຝ່າຍ ໃຫ້ນັບມື້ເພີ່ມຂຶ້ນ.






ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ສຳພາດ ໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ 2 ປີ 2018 ທີ່ຈັດຂຶ້ນຢູ່ນະຄອນຫລວງວຽງຈັນ ເມື່ອ ບໍ່ດົນມານີ້ ວ່າ: ການກະກຽມເປີດປີທ່ອງທ່ຽວຮ່ວມກັນຂອງສອງປະເທດໃນຄັ້ງນີ້ ມີສອງກະຊວງ ຮ່ວມເຮັດວຽກກະກຽມນຳກັນຄື: ກະຊວງ ຖະແຫລງ ຂ່າວ, ວັດທະນະທຳ ແລະ ທ່ອງທ່ຽວລາວ ແລະ ກະຊວງ ວັດທະນະທຳ ແລະ ທ່ອງທ່ຽວຈີນ, ໂດຍມີການວາງແຜນຈະຈັດຫລາຍກິດຈະກຳ ສຳຄັນຮ່ວມກັນ ເພື່ອສ້າງແຮງດຶງດູດໃຈໃຫ້ແກ່ນັກທ່ອງທ່ຽວຈີນເຂົ້າມາທ່ອງທ່ຽວລາວ, ໂດຍຄາດວ່າ ຈະໄດ້ບໍ່ຕໍ່າກ່ວາ 1 ລ້ານຄົນ.



ສຳລັບນັກທ່ອງທ່ຽວຈາກປະເທດຈີນ ຖືວ່າ ເປັນນັກທ່ອງທ່ຽວອັນດັບໜຶ່ງ ທີ່ຫລາຍປະເທດໃນໂລກ ວາງແຜນຍຸດທະສາດດຶງດູດ ເພື່ອໄປທ່ອງທ່ຽວພາຍໃນປະເທດຂອງຕົນ, ໃນນັ້ນ ລວມທັງ ສປປ ລາວເຮົາ, ເນື່ອງຈາກ ນັກທ່ອງທ່ຽວຈີນມີຈຳນວນຫລາຍ ແລະ ກໍ່ມີຄວາມສາມາດໃຊ້ຈ່າຍສູງ. 

ໃນໄລຍະຜ່ານມາ,ນັກທ່ອງ ທ່ຽວຈີນທີ່ເດີນທາງເຂົ້າມາທ່ອງທ່ຽວລາວນັບມື້ເພີ່ມຂຶ້ນ ແຕ່ສ່ວນໃຫຍ່ ແມ່ນພວກເຂົາຈະນິຍົມນຳໃຊ້ບໍລິການຈາກບໍລິສັດທ່ອງທ່ຽວຂອງຈີນ, ມັກພັກເຊົາຢູ່ໂຮງແຮມຈີນ, ກິນອາຫານຈີນ ແລະ ກໍ່ມີພະນັກງານຈີນນຳພາທ່ຽວ. 
ແນວໃດກໍ່ຕາມ, ເພື່ອໃຫ້ນັກທ່ອງທ່ຽວຈີນສືບຕໍ່ເຂົ້າມາທ່ອງທ່ຽວປະເທດລາວເຮົານັບມື້ເພີ່ມຂຶ້ນ, ລາວເຮົາຈະຕ້ອງໄດ້ປັບປຸງແຜນຮອງຮັບ ກໍ່ຄື ເອົາໃຈໃສ່ປັບປຸງສະຖານທີ່ທ່ອງທ່ຽວ, ແລະ ສິ່ງອຳນວຍຄວາມສະດວກຕ່າງໆ ດ້ານການທ່ອງທ່ຽວ ຢ່າງເປັນລະບົບກ່ວາເກົ່າ ເພື່ອສ້າງຄວາມດຶງດູດໃຈໃຫ້ແກ່ນັກທ່ອງທ່ຽວໂດຍນຳໃຊ້ທຸກທ່າແຮງທີ່ມີ, ໃນນັ້ນ ລວມທັງໂຄງ ການກໍ່ສ້າງທາງລົດໄຟລາວ-ຈີນລວມຢູ່ດ້ວຍ.



ໃນໄລຍະ 6 ເດືອນຕົ້ນປີ 2018 ນີ້, ເຊິ່ງເປັນປີທ່ອງ ທ່ຽວລາວ ມີນັກທ່ອງທ່ຽວຕ່າງປະເທດເຂົ້າມາທ່ອງທ່ຽວລາວແລ້ວ ຈຳນວນ 2 ລ້ານ 1 ແສນກ່ວາຄົນ, ເພີ່ມຂຶ້ນ 6 ສ່ວນ ຮ້ອຍ, ເມື່ອທຽບໃສ່ໄລຍະດຽວກັນຂອງປີ 2017, ໃນນີ້ມີນັກທ່ອງທ່ຽວຈີນປະມານ 5 ແສນກ່ວາຄົນ, ກວມເອົາປະມານ 20 ກ່ວາສ່ວນຮ້ອຍຂອງນັກທ່ອງທ່ຽວຕ່າງປະເທດທັງ ຫມົດ ທີ່ເຂົ້າມາທ່ອງທ່ຽວລາວ.


ຂ່າວ: ບຸນຕຽງ ຈັນທະວົງ (Lao National Radio)
© ໂຕະນໍ້າຊາຂ່າວ |  www.tonamcha.com | www.tonamchanews.com
_____


No comments

Powered by Blogger.