Header Ads

ເຜີຍໂສມໜ້າຂອງຄາຕະກອນໃຈໂຫດໃຊ້ມີດແທງຄົນອື່ນຈົນເສຍຊີວິດ


ຈາກເຫດການຄົນຮ້າຍ ໃຊ້ມີດແທງບໍລິເວນໃຕ້ຕີນນົມເບື້ອງຂວາ ຂອງນາງ ບົວວັນ ອາຍຸ 36 ປີ, ປະຊາຊົນບ້ານໜອງບຶງ ເມືອງປະທຸມພອນ ແຂວງຈໍາປາສັກ ເສຍຊີວິດ ເມື່ອຂ້ອນແຈ້ງຂອງວັນທີ 23 ສິງຫາ 2018 ທີ່ຜ່ານມາ. ວັນທີ 26 ສິງຫາ ຄົນຮ້າຍໄດ້ເຂົ້າມອບຕົວຕໍ່ເຈົ້າໜ້າທີ່ ເພື່ອດໍາເນີນຄະດີຕາມຂັ້ນຕອນຂອງກົດໝາຍ. ເຈົ້າໜ້າທີ່ພະແນກສືບສວນ-ສອບສວນ ກອງບັນຊາການ ປກສ ແຂວງຈໍາປາສັກ ລາຍງານວ່າ: ຜູ້ຖືກຫາ ຊື່ ທ້າວ ຕູບ ມຸນມະນີວົງ ອາຍຸ 20 ປີ, ເຊື້ອຊາດ ລາວ, ສັນຊາດ ລາວ, ອາຊີບ ຊາວນາ, ຖືສາສະໜາ ກາໂຕລິກ. ບ້ານເກີດ ແລະ ບ້ານຢູ່ປັດຈຸບັນ ບ້ານໜອງບຶງ ເມືອງປະທຸມພອນ ແຂວງຈໍາປາສັກ.



ຈາກການສືບສວນ-ສອບສວນຂອງເຈົ້າໜ້າທີ່ ທ້າວ ຕູບ ມຸນມະນີວົງ ຮັບສາລະພາບວ່າ: ວັນທີ 22 ສິງຫາ 2018 ເວລາ 18 ໂມງ ທ້າວ ຕູບ ໄດ້ໄປຊື້ຢາເສບຕິດ ປະເພດຢາບ້າ ນໍາຜູ້ຊາຍບໍ່ຮູ້ຊື່ ຢູ່ເຂດເມືອງປະທຸມພອນ ຈໍານວນ 2 ເມັດ ແລ້ວມາເສບຄົນດຽວ, ແລ້ວເຂົ້າມານອນຢູ່ເຮືອນ ແຕ່ນອນບໍ່ຫຼັບ ຈິ່ງເກີດມີແນວຄິດ ຢາກໄດ້ເງິນຂອງ ນາງ ບົວວັນ ເຮືອນໃກ້ກັນ ເພາະຕອນກາງເວັນ ເຫັນຜູ້ກ່ຽວພາລູກສາວໄປຊື້ເຄື່ອງນຸ່ງຫົ່ມ ຢູ່ນະຄອນປາກເຊ ແລະ ຜົວຂອງນາງ ບົວວັນ ກໍ່ບໍ່ຢູ່ເຮືອນ ໄປເຮັດວຽກຢູ່ເມືອງໂຂງ. ຮອດເວລາ 3 ໂມງເຊົ້າຂອງວັນທີ 23 ສິງຫາ, ທ້າວ ຕູບ ໄດ້ຈັບເອົາມີດຢູ່ກ້ອງເຊື່ອນອນ ຍາວປະມານ 30 ຊັງຕີແມັດ ແລ້ວຍ່າງອອກຈາກຫ້ອງ ພ້ອມທັງຈັບໂທລະສັບໃສ່ຖົງເສື້ອໄປນໍາ ແລ້ວຍ່າງໄປເຮືອນຂອງນາງ ບົວວັນ ເມື່ອໄປຮອດ ກໍ່ໄຂປະຕູເຂົ້າທາງເຮືອນຄົວ ເພາະປະຕູບໍ່ໄດ້ໃສ່ໄລກອນ ເຫັນນາງ ບົວວັນ ແລະ ລູກຊາຍ ອາຍຸ 6 ປີ ນອນຮຽງກັນຢູ່ຫ້ອງນອນຜູ້ກ່ຽວ(ຫ້ອງບໍ່ມີປະຕູອັດ) ຈິ່ງຊ່ອງຫາກະເປົ໋າເງິນຕາມຝາເຮືອນ ແຕ່ບໍ່ເຫັນ ຈິ່ງລອດມຸ້ງຄານເຂົ້າໄປຕີນບ່ອນນອນ ເພື່ອຈະຊອກຫາເງິນຢູ່ຫົວບ່ອນນອນ ເວລານັ້ນ ນາງ ບົວວັນ ໄດ້ພິກຄີງ ຂາຂອງຜູ້ກ່ຽວມາຕໍາເອົາຂາຂອງ ທ້າວ ຕູບ, ນາງ ບົວວັນ ໄດ້ຍໍຄໍຊ່ອງເບິ່ງ ພ້ອມທັງຈະລຸກນັ່ງ, ທ້າວ ຕູບ ຢ້ານນາງ ບົວວັນ ເຫັນໜ້າ ຈິ່ງໃຊ້ມີດທີ່ຖືມານໍານັ້ນ ແທງໃສ່ບໍລິເວນໃຕ້ຕີນນົມເບື້ອງຂວາ ຂອງ ນາງ ບົວວັນ 1 ບາດ ແລ້ວ ນາງ ບົວວັນ ໄດ້ຮ້ອງໃຫ້ຄົນຊ່ວຍ, ທ້າວ ຕູບ ຈິ່ງໄດ້ແລ່ນຖືມີດອອກປະຕູທາງເກົ່າ ໄປທາງຫຼັງເຮືອນນາງ ບົວວັນ ແລ້ວມື່ນລົ້ມ ເຮັດໃຫ້ໂທລະສັບຕົກອອກຈາກຖົງເສື້ອ. ຈາກນັ້ນ ຜູ້ກ່ຽວໄດ້ເອົາໂຕຫຼົບໜີເຂົ້າປ່າ ຫ່າງຈາກບ້ານປະມານ 4 ກິໂລແມັດ. 

ຮອດເວລາ 5 ໂມງເຊົ້າ ຂອງວັນທີ 26 ສິງຫາ 2018, ທ້າວ ຕູບ ຈິ່ງໄດ້ເຂົ້າມອບຕົວນໍາເຈົ້າໜ້າທີ່ ປກສ ເມືອງປະທຸມພອນ ເພື່ອດໍາເນີນຄະດີຕາມຂັ້ນຕອນຂອງກົດໝາຍ.



ຜ່ານການສືບສວນ-ສອບສວນຂອງເຈົ້າໜ້າທີ່ວິຊາສະເພາະ ສາມາດຕີລາຄາໄດ້ວ່າ: ທ້າວ ຕູບ ແມ່ນມີເຈຕະນາຄາຕະກໍາ ນາງ ບົວວັນ ແທ້. ນອກນັ້ນ ທ້າວ ຕູບ ຍັງໄດ້ເຄື່ອນໄຫວເສບຢາເສບຕິດ ປະເພດຢາບ້າ ນໍາອີກ. ການກະທໍາດັ່ງກ່າວ ຜິດຕໍ່ມາດຕາ 88 ແລະ ມາດຕາ 146 ຂອງກົດໝາຍອາຍາ ແຫ່ງ ສປປ ລາວ ເຊິ່ງແຕະຕ້ອງເຖິງຊີວິດຂອງບຸກຄົນອື່ນ ທັງສ້າງຄວາມບໍ່ສະຫງົບສຸກ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ. ດັ່ງນັ້ນ, ທ້າວ ຕູບ ຈິ່ງຖືກກັກຕົວ ເພື່ອດໍາເນີນຄະດີ ແລະ ລົງໂທດຕາມຂັ້ນຕອນຂອງກົດໝາຍ.

ຂ່າວ: ທູນທອງໃຈ  (ນສພ ຈຳປາໃຫ່ມ) |  ພາບ: ເຈົ້າໜ້າທີ່ພະແນກສືບສວນ-ສອບສວນແຂວງ
© ໂຕະນໍ້າຊາຂ່າວ |  www.tonamcha.com
_____





No comments

Powered by Blogger.