Header Ads

ເລັ່ງຟື້ນຟູຊີວິດການເປັນຢູ່ປະຊາຊົນ ທີ່ຖືກໄພພິບັດ ໃຫ້ເປັນປົກກະຕິໂດຍໄວ


ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ຄະ­ນະ ໄດ້​ຖະ­ແຫຼງ​ຂ່າວ​ກ່ຽວ​ກັບ​ຜົນ​ການ​ຕິດ­ຕາມ ແກ້​ໄຂ​ສະ­ພາບ​ໄພ­ພິ­ບັດ​ທີ່​ເກີດ​ຂຶ້ນ​ໃນ​ທົ່ວ​ປະ­ເທດ ທິດ​ທາງ ແລະ ມາດ​ຕະ­ການ​ແກ້​ໄຂ​ສະ­ເພາະ​ໜ້າ ແລະ ຍາວ​ນານ ໃນ​ວັນ​ທີ 19 ກັນ­ຍາ 2018 ທີ່​ຫໍ​ປະ­ຊຸມ​ແຫ່ງ​ຊາດ​ວ່າ: ນັບ​ແຕ່​ຕົ້ນ​ເດືອນ​ກໍ­ລະ­ກົດ ຫາ​ເດືອນ​ກັນ­ຍາ 2018 ເປັນ­ຕົ້ນ​ມາ ໄດ້​ມີ​ລົມ­ພາ­ຍຸ​ເຂດ​ຮ້ອນ​ຈຳ­ນວນ​ຫຼາຍ​ພັດ​ຜ່ານ​ເຂົ້າ​ມາ​ລາວ​ຢ່າງ​ລຽນ­ຕິດ ເປັນ­ຕົ້ນ ພາ­ຍຸ​ເຊີນ​ຕິນ ແລະ ເບ​ບີ​ກາ​ໄດ້​ສົ່ງ​ຜົນ​ກະ­ທົບ​ຕໍ່​ຊີ­ວິດ ຊັບ​ສິນ ແລະ ເນື້ອ­ທີ່​ການ​ຜະ­ລິດ​ຂອງ​ປະ­ຊາ­ຊົນ​ລວມ​ທັງ​ພື້ນ­ຖານ​ໂຄງ​ລ່າງ​ໃນ 17 ແຂວງ ແລະ 1 ນະ­ຄອນ­ຫຼວງ 115 ເມືອງ 2.409 ບ້ານ 131.507 ຄອບ­ຄົວ 639.437 ຄົນ ເສຍ​ຊີ­ວິດ 55 ຄົນ ບາດ­ເຈັບ 2 ສູນ­ຫາຍ 100 ຄົນ.



ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໄດ້​ຮັບ​ຜົນ​ກະ­ທົບ​ໜັກ​ຈາກ​ສັນ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ ໃນ​ວັນ​ທີ 23 ກໍ­ລະ­ກົດ 2018 ໄດ້​ສ້າງ​ຜົນ​ກະ­ທົບ 19 ບ້ານ ໃນ​ນັ້ນ ໄດ້​ຮັບ​ຜົນ​ກະ­ທົບ 100% ໃນ 6 ບ້ານ 1.611 ຄອບ­ຄົວ 7.095 ຄົນ ສູນ­ຫາຍ​ເບື້ອງ​ຕົ້ນ 131 ຄົນ ຕົວ​ເລກ​ສູນ­ຫາຍ​ປັດ­ຈຸ­ບັນ 66 ຄົນ ຊອກ​ຄົ້ນ​ຜູ້​ສູນ­ຫາຍ ມາ​ຮອດ​ປັດ­ຈຸ­ບັນ ສາ­ມາດ​ພົບ​ເຫັນ​ຜູ້​ເສຍ​ຊີ­ວິດ 34 ຄົນ ມີ​ຜູ້​ອົບ​ພະ​ຍົບ​ບາດ­ເຈັບ​ໜັກ​ຈາກ​ໄພ­ພິ­ບັດ​ນ້ຳ​ຖ້ວມ​ໄປ​ເສຍ​ຊີ­ວິດ​ຢູ່​ໂຮງ­ໝໍ 6 ຄົນ ລວມ​ຜູ້​ເສຍ​ຊີ­ວິດ 40 ຄົນ ແລະ ຜົນ​ກະ­ທົບ​ໄດ້​ສ້າງ​ຄວາມ​ເສຍ​ຫາຍ​ສະ­ເພາະ​ທີ່­ຢູ່​ອາ­ໄສ​ຂອງ​ປະ­ຊາ­ຊົນ 12 ຕື້​ກວ່າ​ກີບ ດ້ານ​ໂຍ­ທາ​ທິ​ການ ແລະ ຂົນ­ສົ່ງ 631,86 ຕື້​ກີບ ກະ­ສິ­ກຳ-ປ່າ­ໄມ້ 1.200 ຕື້​ກວ່າ​ກີບ ແລະ ໄຟ­ຟ້າ 25 ຕື້​ກວ່າ​ກີບ ສ່ວນ​ການ​ສຶກ​ສາ ແລະ ສາ​ທາ ຍັງ​ບໍ່​ສາ­ມາດ​ປະ​ເມີນ​ຄ່າ​ເສຍ​ຫາຍ​ໄດ້.

ພາຍ­ຫຼັງ​ທີ່​ເກີດ​ອຸ​ທົກ​ກະ​ໄພ​ໃນ​ເມືອງ​ສະ­ໜາມ​ໄຊ ລັດ­ຖະ­ບານ​ໄດ້​ແຕ່ງ­ຕັ້ງ​ຄະ­ນະ​ກຳ­ມະ­ການ​ສະ­ເພາະ​ກິດ ແກ້​ໄຂ​ໄພ­ພິ­ບັດ​ລະ­ດັບ​ຊາດ ໂດຍ​ຄະ­ນະ​ໄດ້​ລົງ​ເຄື່ອນ​ໄຫວ​ຊີ້​ນຳ-ນຳ­ພາ​ໃນ​ການ​ປະ­ຕິ­ບັດ​ການ​ຊ່ວຍ­ເຫຼືອ​ສຸກ​ເສີນ ໃນ​ການ​ຊ່ວຍ­ເຫຼືອ​ຄັ້ງ​ນີ້ ໄດ້​ນຳ​ໃຊ້​ກຳ­ລັງ​ຈາກ​ກະ­ຊວງ​ປ້ອງ​ກັນ​ປະ­ເທດ 420 ຄົນ ນຳ​ໃຊ້​ພາ­ຫະ­ນະ ແລະ ອຸ­ປະ­ກອນ​ກອບ​ກູ້​ຊ່ວຍ­ເຫຼືອ​ຍົກ­ຍ້າຍ​ປະ­ຊາ­ຊົນ 4.399 ຄົນ ຄຽງ​ຄູ່​ກັນ​ນັ້ນ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ລະ­ດົມ​ທຶນ​ຊ່ວຍ­ເຫຼືອ​ທັງ​ພາຍ​ໃນ ແລະ ຕ່າງ­ປະ­ເທດ ມີ 844 ພາກ­ສ່ວນ 19 ປະ­ເທດ ນັບ​ແຕ່ 24 ກໍ­ລະ­ກົດ ຫາ 12 ກັນ­ຍາ 2018 ໄດ້​ຮັບ​ເງິນ​ຊ່ວຍ­ເຫຼືອ​ເປັນ​ເງິນ​ກີບ 20 ຕື້​ກວ່າ​ກີບ ເງິນ​ບາດ 85 ລ້ານ​ກວ່າ​ບາດ ເງິນ​ໂດ​ລາ 13 ລ້ານ​ກວ່າ​ໂດ​ລາ (ສະ­ເພາະ​ຈຸດ​ກະ­ຊວງ​ແຮງ​ງານ) ສ່ວນ​ຈຸດ​ບໍ­ລິ­ຈາກ​ແຂວງ​ອັດ​ຕະ​ປື ໄດ້ 50 ຕື້​ກວ່າ​ກີບ ສ່ວນ​ເຄື່ອງ​ອຸ­ປະ­ໂພກ ບໍ­ລິ­ໂພກ ທີ່​ໄດ້​ຮັບ​ການ​ຊ່ວຍ­ເຫຼືອ ໄດ້​ນຳ­ໄປ​ແຈກ​ຢາຍ​ໃຫ້​ປະ­ຊາ­ຊົນ​ຜູ້​ທີ່​ໄດ້​ຮັບ​ຜົນ​ກະ­ທົບ​ໂດຍ​ກົງ ຈາກ​ໄພ­ພິ­ບັດ​ທາງ​ທຳ​ມະ​ຊາດ​ໃນ​ຂອບ​ເຂດ​ທົ່ວ​ປະ­ເທດ ສ່ວນ​ເຄື່ອງ​ທີ່​ເຫຼືອ​ຈະ​ສືບ­ຕໍ່​ແຈກ​ຢາຍ​ໃຫ້​ຜູ້​ປະ­ສົບ​ໄພ.



ການ​ຊ່ວຍ­ເຫຼືອ​ບັນ­ເທົາ​ທຸກ ແລະ ແກ້​ໄຂ​ຊີ­ວິດ​ການ​ເປັນ​ຢູ່: ສະ­ເພາະ​ຢູ່​ເມືອງ​ສະ­ໜາມ​ໄຊ ໄດ້​ແຈກ​ຢາຍ​ເຂົ້າ​ກິນ​ຈຳ­ນວນ 20 ກິ​ໂລ​ຕໍ່​ຄົນ​ຕໍ່​ເດືອນ ເກືອ​ແປ້ງ​ນົວ ປາ­ແດກ ປາ­ກະ­ປ໋ອງ 12 ກະ​ປອງ​ຕໍ່​ຄອບ­ຄົວ​ຕໍ່ 3 ວັນ ໝີ່ 35 ຫໍ່​ຕໍ່​ຄອບ­ຄົວ​ຕໍ່​ອາ­ທິດ ຊີ້ນ​ໝູ​ປະ­ມານ 100 ກຣາມ​ຕໍ່​ຄົນ​ຕໍ່ 3 ວັນ ເຄື່ອງ­ໃຊ້​ເຮືອນ­ຄົວ ແລະ ເຄື່ອງ­ມື​ຫາ​ປາ ໃນ​ເວ­ລາ​ດຽວ​ກັນ ກໍ່​ໄດ້​ເບີກ​ຈ່າຍ​ເງິນ​ແຮ​ໃຫ້​ຄອບ­ຄົວ​ລະ 5 ແສນ​ກີບ ມາ​ຮອດ​ປັດ­ຈຸ­ບັນ ໄດ້​ຄົ້ນ­ຄວ້າ​ຕົກ­ລົງ​ຄືນ­ໃໝ່ ໂດຍ​ເບີກ​ຈ່າຍ​ໃຫ້ 1 ແສນ​ກີບ​ຕໍ່​ຄົນ​ຕໍ່​ເດືອນ ເປັນ​ເງິນ​ແຮ​ຖົງ ເຫັນ​ວ່າ​ຈະ​ພຽງ­ພໍ ເພາະ­ວ່າ​ອັນ​ພື້ນ­ຖານ​ໄດ້​ຢາຍ​ໃຫ້​ໝົດ​ແລ້ວ ການ­ແຈກ­ຢາຍ​ບົນ​ພື້ນ­ຖານ​ສະ­ຖິ­ຕິ​ຄົວ​ເຮືອນ​ທີ່​ເກັບ​ກຳ​ການ​ຄິດ­ໄລ່​ສະ­ພາບ​ຄວາມ​ເປັນ​ຈິງ ແລະ ຄວາມ​ຕ້ອງ­ການ ເຊິ່ງ​ໜ່ວຍ​ງານ​ທີ່​ກ່ຽວ­ຂ້ອງ ໄດ້​ຂຶ້ນ​ແຜນ​ເປັນ​ບັນ­ຊີ​ອັນ​ລະ­ອຽດ ຂໍ​ສະ­ເໜີ​ເບີກ​ຈ່າຍ​ໄດ້​ປຸກ­ເຮືອນ​ພັກ­ຊົ່ວ­ຄາວ​ເປັນ​ຫ້ອງ​ແຖວ ແລະ ປະ­ກອບ​ເປັນ​ຫຼັງ ປັດ­ຈຸ­ບັນ ໄດ້​ຍົກ­ຍ້າຍ​ປະ­ຊາ­ຊົນ​ບ້ານ​ໃໝ່​ເຂົ້າ​ຢູ່​ສູນ​ພັກ­ຊົ່ວ­ຄາວ 10 ຫຼັງ 140 ຫ້ອງ​ຕໍ່ 140 ຄອບ­ຄົວ ສຸກ​ເສີນ​ເພື່ອ​ເອື້ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ຄົມ­ມະ­ນາ­ຄົມ​ຂົນ­ສົ່ງ ໃນ​ຂອບ​ເຂດ​ທົ່ວ​ປະ­ເທດ ສະ­ເພາະ​ຢູ່​ແຂວງ​ອັດ​ຕະ​ປື ການ​ສ້ອມ­ແປງ​ເສັ້ນ­ທາງ 18A ແຕ່​ເທ­ສະ​ບານ​ເມືອງ-ບ້ານ​ໃໝ່ ປະ­ຕິ­ບັດ​ໄດ້ 65,5% ແຕ່​ບ້ານ​ຮົມ-ຫ້ວຍ​ອຸກ ປະ­ຕິ­ບັດ​ໄດ້ 45,51% ແຕ່​ເທ­ສະ​ບານ​ເມືອງ-ຫ້ອຍ​ອຸກ ປະ­ຕິ­ບັດ​ໄດ້ 15% ທາງ​ເບີ 9004 ແຕ່ ຕະ​ມໍ​ຢອດ-ໄຊ​ດອນ​ໂຂງ ປະ­ຕິ­ບັດ​ໄດ້ 55% ແລະ ແຕ່​ຕະ​ມໍ​ຢອດ-ບ້ານ​ສະ­ໝອງ ປະ­ຕິ­ບັດ​ໄດ້ 63% ການ​ກໍ່­ສ້າງ​ຂົວ ການ​ເທ​ຮາກ​ຖານ​ເສົາ​ຕໍ​ມໍ​ຂົວ​ຫ້ວຍ​ກັນ​ຈານ ປະ­ຕິ­ບັດ​ໄດ້ 89% ການ​ເທ​ຮາກ​ຖານ​ເສົາ​ຕໍ​ມໍ​ຂົວ​ຫ້ວຍ​ປິນ ປະ­ຕິ­ບັດ​ໄດ້ 75% ການ​ເທ​ຮາກ​ຖານ​ເສົາ​ຕໍ​ມໍ​ຂົວ​ຮອງ​ແຄນ ປະ­ຕິ­ບັດ​ໄດ້ 35% ການ​ບຸກ­ເບີກ​ເນື້ອ­ທີ່​ຈຸດ​ພັກ​ຖາ­ວອນ ເຂດ​ຕະ​ມໍ​ຢອດ ເນື້ອ­ທີ່ 47,5 ເຮັກ­ຕາ ປະ­ຕິ­ບັດ​ໄດ້ 4 ເຮັກ­ຕາ ກວມ​ເອົາ 2,76% ຈຸດ​ດົງ​ບາກ​ເນື້ອ­ທີ່ 120 ເຮັກ­ຕາ ປະ­ຕິ­ບັດ​ໄດ້ 3,1 ເຮັກ­ຕາ ກວມ​ເອົາ 2,58% ຈຸດ​ປິນ​ດົງ ເນື້ອ­ທີ່ 47,5 ເຮັກ­ຕາ ປະ­ຕິ­ບັດ​ໄດ້ 4 ເຮັກ­ຕາ ກວມ​ເອົາ 2,76% ຈຸດ​ດອນ​ບົກ ເນື້ອ­ທີ່ 13,93 ເຮັກ­ຕາ ປະ­ຕິ­ບັດ​ໄດ້ 4,5 ເຮັກ­ຕາ ກວມ​ເອົາ 32,3% ເຊິ່ງ​ໃນ​ນີ້ ບໍ­ລິ­ສັດ SK ກຳ­ລັງ​ເລັ່ງ​ສ້າງ​ເຮືອນ​ພັກ­ຊົ່ວ­ຄາວ​ເປັນ​ຫ້ອງ​ແຖວ ຈຳ­ນວນ 39 ຫຼັງ 12 ຫ້ອງ​ຕໍ່​ຫຼັງ ລວມ​ທັງ​ໝົດ 468 ຫ້ອງ.



ສະ­ຫຼຸບ​ແລ້ວ ສະ­ພາບ​ການ​ແກ້​ໄຂ​ສະ­ພາບ​ໄພ­ພິ­ບັດ​ທີ່​ເກີດ​ຂຶ້ນ​ໃນ​ທົ່ວ​ປະ­ເທດ ໂດຍ​ສະ­ເພາະ ຢູ່​ເມືອງ​ສະ­ໜາມ​ໄຊ ມີ​ຜົນ­ສຳ­ເລັດ​ເປັນ​ກ້າວໆ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໄດ້​ຮັບ​ການ​ປົວ­ແປງ ແລະ ປັບ­ປຸງ​ໃຫ້​ດີ​ຂຶ້ນ​ເທື່ອ​ລະ​ກ້າວ ເລີ່ມ​ຈາກ​ການ​ຊ່ວຍ­ເຫຼືອ​ບັນ­ເທົາ​ທຸກ​ຢ່າງ​ທົ່ວ​ເຖິງ​ໄປ​ເຖິງ​ການ​ຟື້ນ​ຟູ ແລະ ການ​ປະ­ກອບ​ອາ­ຊີບ​ເທື່ອ​ລະ​ກ້າວ ສະ­ພາບ​ຈິດ­ໃຈ​ຂອງ​ປະ­ຊາ­ຊົນ ໄດ້​ຮັບ​ການ​ປົວ­ແປງ​ໃຫ້​ນັບ​ມື້​ນັບ​ດີ​ຂຶ້ນ ສະ­ພາບ​ການ​ປັບ­ປຸງ​ປົວ­ແປງ​ພື້ນ­ຖານ​ໂຄງ​ລ່າງ​ເສດ­ຖະ­ກິດ​ສັງ­ຄົມ ໄດ້​ຮັບ​ການ​ບູ­ລະ­ນະ ສາ­ມາດ​ນຳ​ໃຊ້​ໄດ້​ໄປ​ເຖິງ​ຖາ­ວອນ​ເທື່ອ​ລະ​ກ້າວ ແລະ ອື່ນໆ ເຊິ່ງ​ທັງ​ໝົດ​ນັ້ນ ຍ້ອນ​ຄວາມ​ເອົາ­ໃຈ­ໃສ່​ຢ່າງ​ໃກ້­ຊິດ ແລະ ຈົດ­ຈໍ່​ຈາກ​ຄະ­ນະ​ກຳ­ມະ­ການ​ສະ­ເພາະ​ກິດ ລວມ​ທັງ​ໜ່ວຍ​ງານ​ທີ່​ກ່ຽວ­ຂ້ອງ​ແຕ່​ສູນ​ກາງ​ຮອດ​ທ້ອງ­ຖິ່ນ ຈົນ​ເຖິງ​ປະ­ຊາ­ຊົນ​ໃນ​ຂອບ​ເຂດ​ທົ່ວ​ປະ­ເທດ ໄດ້​ເປັນ​ເຈົ້າ​ການ​ສຸມ​ທຸກ​ກຳ­ລັງ​ຈິດ​ກຳ­ລັງ​ກາຍ ແລະ ເຫື່ອ­ແຮງ​ເຂົ້າ​ໃນ​ການ​ແກ້​ໄຂ​ບັນ­ຫາ​ທີ່​ເກີດ​ຂຶ້ນ.

ສຳ­ລັບ​ວຽກ​ງານ​ຈຸດ​ສຸມ​ໃນ­ຕໍ່­ໜ້າ​ເລັ່ງ​ໃສ່​ປະ​ເມີນ ແລະ ສະ­ຫຼຸບ​ສັງ​ລວມ​ຄວາມ​ເສຍ​ຫາຍ​ທີ່​ເກີດ​ຂຶ້ນ​ຈາກ​ໄພ­ພິ­ບັດ​ທຳ​ມະ​ຊາດ ໃນ​ຂອບ​ເຂດ​ທົ່ວ​ປະ­ເທດ ໃຫ້​ແທດ​ຕົວ​ຈິງ ແລະ ພາຍ­ຫຼັງ​ສຳ­ເລັດ​ການ​ປະ​ເມີນ​ຜົນ​ເສຍ​ຫາຍ​ແລ້ວ ຕ້ອງ​ໄດ້​ມີ​ການ​ວາງ​ແຜນ​ຟື້ນ​ຟູ​ແກ້​ໄຂ​ທັງ​ໄລ­ຍະ​ສຸກ​ເສີນ ໄລ­ຍະ​ກາງ ແລະ ໄລ­ຍະ​ຍາວ ນອກ​ນັ້ນ ຈະ​ໄດ້​ກະ­ກຽມ​ກອງ​ປະ­ຊຸມ​ຖອດ​ຖອນ​ບົດ­ຮຽນ​ວຽກ​ງານ​ປະ​ເມີນ​ຜົນ ແລະ ຟື້ນ​ຟູ​ເພື່ອ​ໃຫ້​ມີ​ຄວາມ​ລະ­ອຽດ ສາ­ມາດ​ຈຳ­ແນກ​ວຽກ​ບຸ­ລິ­ມະ­ສິດ​ຮີບ​ດ່ວນ ໄລ­ຍະ​ສັ້ນ ແລະ ໄລ­ຍະ​ຍາວ ແນ­ໃສ່​ການ​ປະ­ຕິ­ບັດ​ນະ­ໂຍ­ບາຍ​ປະ­ຢັດ ສົມ​ເຫດ​ສົມ​ຜົນ​ຂອງ​ລັດ­ຖະ­ບານ.


ດ້ານ​ກະ­ສິ­ກຳ ຕ້ອງ​ເອົາ­ໃຈ­ໃສ່​ຟື້ນ​ຟູ​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ ສະ­ໜອງ​ແນວ​ພັນ​ພືດ ແລະ ສັດ​ໃຫ້​ພຽງ­ພໍ ເພື່ອ​ສ້າງ​ເງື່ອນ­ໄຂ​ໃຫ້​ແກ່​ການ​ຜະ­ລິດ​ຂອງ​ປະ­ຊາ­ຊົນ ໂດຍ​ສະ­ເພາະ ການ​ປູກ​ເຂົ້າ­ນາ­ແຊງ​ແກ້​ໄຂ​ບັນ­ຫາ​ສັດ­ຕູ​ພືດ​ທີ່​ທຳ­ລາຍ​ຜົນ­ລະ­ປູກ​ຂອງ​ປະ­ຊາ­ຊົນ ສັດ­ຕະ­ວະ­ແພດ ໂດຍ​ຖື​ເອົາ​ວຽກ​ງານ​ກະ­ສິ­ກຳ​ເປັນ​ແນວ​ໜ້າ ສ່ວນ​ຂະ­ແໜງ​ພະ­ລັງ­ງານ ແລະ ບໍ່​ແຮ່ ຕ້ອງ​ໄດ້​ເອົາ­ໃຈ­ໃສ່​ຟື້ນ​ຟູ​ຕາ​ຂ່າຍ​ໄຟ­ຟ້າ​ໃຫ້​ໄດ້​ນຳ​ໃຊ້ ແລະ ກຳ­ນົດ​ນະ­ໂຍ­ບາຍ​ທີ່​ເໝາະ​ສົມ​ໃຫ້​ແກ່​ປະ­ຊາ­ຊົນ​ຜູ້​ທີ່​ໄດ້​ຮັບ​ຜົນ​ກະ­ທົບ ເປັນ­ຕົ້ນ ນະ­ໂຍ­ບາຍ​ການ​ເສຍ​ພາ­ສີ​ທີ່​ດິນ ນະ­ໂຍ­ບາຍ​ໄຟ­ຟ້າ ແລະ ໃຫ້​ເອົາ­ໃຈ­ໃສ່​ໃນ​ການ​ສະ­ໜອງ​ກະ­ແສ​ໄຟ­ຟ້າ​ໃຫ້​ພຽງ­ພໍ​ກັບ​ຄວາມ​ຕ້ອງ­ການ​ຂອງ​ປະ­ຊາ­ຊົນ ເອົາ­ໃຈ­ໃສ່​ວຽກ​ງານ​ບໍ­ລິ­ຫານ ແລະ ຈັດ­ການ​ນ້ຳ​ໃຫ້​ດີ.


ສຳ­ລັບ​ວຽກ​ການ​ເງິນ ແລະ ທະ­ນາ­ຄານ ຕ້ອງ​ໄດ້​ເອົາ­ໃຈ­ໃສ່​ຊຸກ­ຍູ້​ຊ່ວຍ­ເຫຼືອ​ທະ­ນາ­ຄານ​ນະ­ໂຍ­ບາຍ ບັນ­ດາ​ທະ­ນາ­ຄານ​ທຸ­ລະ​ກິດ​ທະ­ນາ­ຄານ​ພັດ­ທະ­ນາ ແລະ ທະ­ນາ­ຄານ​ສົ່ງ­ເສີມ​ກະ­ສິ­ກຳ​ໃຫ້​ສາ­ມາດ​ຜ່ອນ​ໄລ­ຍະ​ຖອກ​ຕົ້ນ​ທຶນ ແລະ ດອກ​ເບ້ຍ​ປ່ອຍ​ເງິນ​ກູ້​ໃຫ້​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ເຊິ່ງ​ໄດ້​ກູ້​ຢືມ​ໃນ​ໄລ­ຍະ​ເວ­ລາ​ຜ່ານ​ມາ ແລະ ໃນ​ເວ­ລາ​ດຽວ​ກັນ​ກໍ່​ປ່ອຍ​ເງິນ​ກູ້​ໃຫ້​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ນອກ­ຈາກ​ນັ້ນ ຂະ­ແໜງ​ສຶກ​ສາ ແລະ ສາ​ທາ ຕ້ອງ​ສູ້​ຊົນ​ໃຫ້​ລູກ​ຫຼານ​ໄດ້​ເຂົ້າ​ຮຽນ​ເປັນ​ປົກ­ກະ­ຕິ ແລະ ເອົາ­ໃຈ­ໃສ່​ໃນ​ການ​ຄວບ​ຄຸມ­ພະ​ຍາດ​ລະ­ບາດ​ທີ່​ອາດ​ຈະ​ເກີດ​ຂຶ້ນ ແລະ ສືບ­ຕໍ່​ປະ­ຕິ­ບັດ​ວຽກ​ຢູ່​ພາກ​ສະ­ໜາມ​ທີ່​ເຄີຍ​ໄດ້​ປະ­ຕິ­ບັດ​ມາ ແລະ ເຊີນ​ຊ່ຽວ­ຊານ​ຈາກ​ສາ­ກົນ ເພື່ອ​ດຳ­ເນີນ​ການ​ກວດ­ກາ​ບັນ­ດາ​ເຂື່ອນ​ທັງ​ໝົດ ທີ່​ໄດ້​ດຳ­ເນີນ​ການ​ຜະ­ລິດ​ເຂື່ອນ​ທີ່​ກຳ­ລັງ​ດຳ­ເນີນ​ການ​ກໍ່­ສ້າງ ແລະ ເຂື່ອນ​ທີ່​ໄດ້​ຜ່ານ​ການ​ເຊັນ MOU ແລ້ວ ເພື່ອ​ຮັບ­ປະ­ກັນ​ຄວາມ​ປອດ​ໄພ ແລະ ຖືກ­ຕ້ອງ​ຕາມ​ມາດ­ຕະ­ຖານ​ເຕັກ­ນິກ​ໃນ​ການ​ກໍ່­ສ້າງ.

ຂໍ້ມູນ: ນສພ ວຽງຈັນໃໝ່
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.