Header Ads

ໄພພິບັດນໍ້າຖ້ວມຄັ້ງໃຫຍ່ຫຼວງປີນີ້ອາດກະທົບປີທ່ອງທ່ຽວລາວ ບໍ່ບັນລຸຕາມຄາດໝາຍທີ່ວາງໄວ້



ອີງຕາມການລາຍງານຂອງ ວສລ ວ່າ: ສະພາບນໍ້າຖ້ວມທີ່ເກີດຂຶ້ນຢູ່ທຸກແຂວງໃນທົ່ວປະເທດເຮົາໃນໄລຍະລະດູຝົນປີນີ້ ເຮັດໃຫ້ສະຖານທີ່ທ່ອງທ່ຽວ ແລະ ພື້ນຖານໂຄງລ່າງດ້ານການທ່ອງທ່ຽວຫລາຍແຫ່ງໄດ້ຮັບຄວາມເສຍຫາຍ ເຊິ່ງກາຍເປັນອຸປະສັກ ຫລື ສິ່ງທ້າທາຍອັນສຳຄັນໜຶ່ງທີ່ຈະສົ່ງຜົນກະທົບໂດຍກົງຕໍ່ການດຶງດູດນັກທ່ອງທ່ຽວຕ່າງປະເທດທີ່ຈະເຂົ້າມາທ່ອງທ່ຽວລາວໃຫ້ບັນລຸຕົວເລກ 5 ລ້ານເທື່ອຄົນ ຕາມທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ວາງຄາດໝາຍເອົາໄວ້.



ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ສຳພາດໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ II ປີ 2018 ທີ່ຖືກຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງວັນທີ 17 - 18 ກັນຍາ 2018 ນີ້ ວ່າ: ປັດຈຸບັນ ບັນດາສະຖານທີ່ທ່ອງທ່ຽວທີ່ໄດ້ຮັບຄວາມເສຍຫາຍໃນຂອບເຂດທົ່ວປະເທດ ແມ່ນຍັງບໍ່ທັນສາມາດເກັບກຳຂໍ້ມູນລະອຽດໄດ້ເທື່ອ ເນື່ອງຈາກບາງທ້ອງຖິ່ນຍັງປະສົບກັບນໍ້າຖ້ວມຢູ່ ແຕ່ທາງກະຊວງກໍ່ໄດ້ອອກແຈ້ງການ ເຖິງຂະແໜງການກ່ຽວຂ້ອງປະຈຳແຕ່ລະທ້ອງຖິ່ນ ໃຫ້ເລັ່ງເກັບກຳຂໍ້ມູນຜົນເສຍຫາຍດ້ານການທ່ອງທ່ຽວທ່ຽວຢ່າງລະອຽດ ເພື່ອລັດຖະບານຈະໄດ້ກຳນົດແຜນຟື້ນຟູໃຫ້ໄວເທົ່າທີ່ຈະໄວໄດ້. ສ່ວນໂຄງການທີ່ກ່ຽວພັນກັບການພັດທະນາພື້ນຖານໂຄງລ່າງການທ່ອງທ່ຽວທີ່ໄດ້ເລີ່ມດຳເນີນການມາແລ້ວນັ້ນ, ບ່ອນໃດທີ່ນໍ້າຖ້ວມ ແມ່ນໃຫ້ຢຸດເຊົາໄລຍະໜຶ່ງກ່ອນ ຈົນກ່ວາ ນໍ້າຈະບົກແຫ້ງດີແລ້ວ ຈຶ່ງຄ່ອຍໃຫ້ສືບຕໍ່ຈັດຕັ້ງປະຕິບັດຕໍ່ໄປ ເພື່ອໃຫ້ບັນລຸຕາມແຜນການທີ່ໄດ້ວາງໄວ້.


ທ່ານລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ຮູ້ຕື່ມອີກວ່າ: ໃນໄລຍະ 6 ເດືອນຕົ້ນປີ 2018 ນີ້ ມີນັກທ່ອງທ່ຽວຕ່າງປະເທດເຂົ້າມາທ່ອງທ່ຽວລາວຈຳນວນຫລາຍ 2 ລ້ານ 1 ແສນກ່ວາຄົນ, ເຊິ່ງເພີ່ມຂຶ້ນ 6 % ເມື່ອທຽບໃສ່ໄລຍະດຽວກັນຂອງປີ 2017 ຜ່ານມາ. ແຕ່ເນື່ອງຈາກ ໃນໄລຍະ 6 ເດືອນທ້າຍປີ 2018 ນີ້ ບັນດາ ແຂວງໃນທົ່ວປະເທດເຮົາ ຕ້ອງປະສົບກັບໄພນໍ້າຖ້ວມຢ່າງໜັກໜ່ວງ, ຈຶ່ງອາດຈະສົ່ງຜົນກະທົບຕໍ່ການດຶງດູດນັກທ່ອງທ່ຽວຕ່າງປະເທດເຂົ້າມາລາວໃຫ້ໄດ້ຕາມທີ່ວາງຄາດໝາຍໄວ້ສຳລັບປີທ່ອງທ່ຽວລາວ 2018 ນີ້. ດ້ວຍເຫດນີ້, ໃນໄລຍະທ້າຍປີນີ້ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈຶ່ງຈະໄດ້ດຳເນີນຫລາຍມາດຕະການເພື່ອຊ່ວຍກະຕຸ້ນເຮັດໃຫ້ນັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວລາວ ໃຫ້ຫລາຍຂຶ້ນ ເປັນຕົ້ນ: ສືບຕໍ່ຈັດຕັ້ງບັນດາກິດຈະກຳສົ່ງເສີມການທ່ອງທ່ຽວ ຢູ່ທັງຂັ້ນສູນກາງ ແລະ ທ້ອງຖິ່ນຕາມແຜນທີ່ກຳນົດໄວ້ໃຫ້ຄົບ, ສືບຕໍ່ຊຸກຍູ້ສົ່ງເສີມພາກເອກະຊົນໃຫ້ປັບປຸງ ແລະ ກໍ່ສ້າງພື້ນຖານໂຄງລ່າງຮັບໃຊ້ການທ່ອງທ່ຽວໃຫ້ຫລາຍຂຶ້ນ, ສືບຕໍ່ໂຄສະນາກ່ຽວກັບການທ່ອງທ່ຽວລາວຜ່ານສື່ມວນຊົນທັງພາຍໃນ ແລະ ຕ່າງປະເທດໃຫ້ຫລາຍຂຶ້ນກ່ວາເກົ່າ ແລະ ອື່ນໆ.






ໂດຍ: ບຸນຕຽງ ຈັນທະວົງ (ວສລ)
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.