Header Ads

ຈັບແກ້ງ ເຄືອຂ່າຍຄ້າຂາຍສິ່ງເສບຕິດ ພ້ອມຂອງກາງ 7.000 ກວ່າເມັດ



ເຈົ້າໜ້າທີ່ໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງທ່າແຂກ ແຂວງຄຳມ່ວນ ໄດ້ຈັບກຸ່ມເປົ້າໝາຍຄ້າຂາຍຢາເສບຕິດ ໄດ້ 1 ຄົນ ຢູ່ບ້ານຫ້ວຍນາງລີ້ ເມືອງທ່າແຂກ ກ່ອນຂະຫຍາຍຜົນຕິດຕາມຈັບໄດ້ໝົດກຸ່ມແກ້ງອີກ 5 ຄົນ ລວມຂອງກາງຢາບ້າ 7.000 ກວ່າເມັດ ໃນວັນທີ 20 ສິງຫາ 2018.

ຫົວໜ້າໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງທ່າແຂກ ແຂວງຄຳມ່ວນ ໄດ້ເປີດເຜີຍວ່າ: ເບື້ອງຕົ້ນ ແມ່ນໄດ້ເຂົ້າກັກປົ້າໝາຍຊື່ ທ້າວ ວົງສັກ ຫຼື ດຳ ອາຍຸ 27 ປີ ຢູ່ບ້ານຫ້ວຍນາງລີ້ ເມືອງທ່າແຂກ. ຈາກນັ້ນ, ຜູ້ກ່ຽວໄດ້ຊັດທອດຫາພັກພວກຮ່ວມຂະບວນການດຽວກັນອີກ 5 ຄົນ. ດັ່ງນັ້ນ, ເຈົ້າໜ້າທີ່ຈຶ່ງຕິດຕາມກັກຕົວຜູ້ທີ່ຖືກຊັດຖອດຫາໄດ້ທັງໝົດ ຄື: ທ້າວ ທິບພາພອນ ຫຼື ຕິກ ອາຍຸ 27 ປີ ຢູ່ບ້ານໂພນພິມ, ນາງ ສຸນິລັນ ຫຼື ມຸ້ຍ ອາຍຸ 27 ປີ ຢູ່ບ້ານຈອມແກ້ວ ທັງສອງຢູ່ເມືອງທ່າແຂກ, ທ້າວ ໄຊຍະສິດ ຫຼື ຍາ ອາຍຸ 30 ປີ ຢູ່ບ້ານຍົມມະລາດເໜືອ ເມືອງຍົມມະລາດ ແຂວງຄຳມ່ວນ, ທ້າວ ເຢຍ ຫຼື ຄຳສີ ອາຍຸ 30 ປີ ແລະ ທ້າວ ເຕຍຊົງ ຫຼື ຄຳໝັ້ນ ອາຍຸ 30 ປີ ທັງສອງແມ່ນຢູ່ບ້ານໂພນຄຳ ເມືອງຄຳເກີດ ແຂວງບໍລິຄຳໄຊ ພ້ອມຂອງກາງຢາບ້າ 7.640 ເມັດ.

ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວ ໄດ້ຮັບສາລະພາບວ່າ: ຢາບ້າຈຳນວນດັ່ງກ່າວ ແມ່ນເປັນຂອງພວກກ່ຽວແທ້ ເຊິ່ງພວກກ່ຽວໄດ້ພົວພັນຊື້-ຂາຍຢາເສບຕິດນຳກັນມາແລ້ວຫຼາຍຄັ້ງແລ້ວ ສ່ວນຫຼາຍແມ່ນໄດ້ນັດຊື້-ຂາຍນຳກັນຢູ່ຕາມບ້ານ, ເຂດບ້ານໃກ້ຄຽງ ຢູ່ຕາມເທດສະບານເມືອງທ່າແຂກ ແລະ ຕາມເສັ້ນທາງລະຫວ່າງແຂວງບໍລິຄຳໄຊ ກັບ ແຂວງຄຳມ່ວນ ເພື່ອເອົາໄປຂາຍຕໍ່ໃຫ້ກຸ່ມແກ້ງທີ່ມົ້ວສຸມຢາເສບຕິດທົ່ວໄປ ຢູ່ຕາມເຂດບ້ານໃຜລາວ ແລະ ຕາມເທດສະບານເມືອງທ່າແຂກ.

ຄະດີດັ່ງກ່າວ, ເຈົ້າໜ້າທີ່ຕໍາຫຼວດວິຊາສະເພາະ ປກສ ເມືອງທ່າແຂກ ດຳເນີນການສືບສວນ-ສອບສວນຂະຫຍາຍຜົນຫາກຸ່ມແກ້ງຮ່ວມຂະບວນການນໍາກັນອີກ ເພື່ອຕິດຕາມຈັບຕົວໄປດໍາເນີນຄະດີຕາມກົດໝາຍ.


ພາບ-ຂ່າວ: ນສພ ຄວາມສະຫງົບ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.