Header Ads

ຮອງນາຍົກລັດຖະມົນຕີ ສອນໄຊ ສີພັນດອນ ເຄື່ອນໄຫວຢ້ຽມຢາມແຂວງຈໍາປາສັກ



ໃນໂອກາດໂອ້ລົມຕໍ່ການນໍາ ແລະ ພະນັກງານຫລັກແຫລ່ງແຂວງຈຳປາສັກ ໃນວັນທີ 6 ກັນຍາ 2016, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ ໄດ້ມີທິດຊີ້ນໍາ ແລະ ເນັ້ນໜັກໃຫ້ອໍານາດການປົກຄອງແຂວງຈໍາປາສັກ ສືບຕໍ່ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ; ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃຫ້ບັນລຸຕາມລະດັບຄາດໝາຍທີ່ໄດ້ວາງໄວ້, ໃນນີ້ ໃຫ້ເອົາໃຈໃສ່ໃນການຕິດຕາມກວດກາ ບັນດາໂຄງການລົງທຶນຕ່າງໆຂອງລັດຖະບານ ເພື່ອໃຫ້ດໍາເນີນໄປຢ່າງມີປະສິດທິຜົນ; ສືບຕໍ່ເອົາໃຈໃສ່ວຽກງານຜະລິດເປັນສິນຄ້າ ແລະ ຄໍ້າປະກັນສະບຽງອາຫານຂອງປະຊາຊົນ; ສຳລັບໄພພິບັດທີ່ເກີດຂຶ້ນຢູ່ແຂວງໃນຄັ້ງນີ້, ໃຫ້ເອົາໃຈໃສ່ໃນການຊ່ວຍເຫຼືອປະຊາຊົນທີ່ຖືກຜົນກະທົບທາງດ້ານ ຊີວິດ ແລະ ຊັບສິນ; ຮັກສາສຸຂະ ພາບຂອງປະຊາຊົນ, ຟື້ນຟູທາງດ້ານຈິດໃຈ, ສ້າງທີ່ພັກອາໄສ ແລະ ສະໜອງເຄື່ອງອຸປະໂພກ-ບໍລິໂພກ. ພາຍຫຼັງທີ່ນໍ້າບົກລົງ, ກໍ່ໃຫ້ມີການວາງແຜນເພື່ອຟື້ນຟູຊີວິດການເປັນຢູ່ຂອງຜູ້ທີ່ໄດ້ຮັບຜົນກະທົບ ໃຫ້ກັບຄືສູ່ສະພາບປົກກະຕິ ໂດຍໄວ ເປັນຕົ້ນ ແມ່ນການກະກຽມເນື້ອທີ່ທໍາການຜະລິດ, ການສະໜອງແນວພັນພືດ ແລະ ສັດລ້ຽງໃຫ້ປະຊາຊົນ ໃຫ້ທັນຕາມລະດູການ ທີ່ຈະມາ ເຖິງ.





ທ່ານຮອງນາຍົກລັດຖະມົນຕີ ສອນໄຊ ສີພັນດອນ ຍັງໄດ້ຊີ້ນຳໃຫ້ການນໍາແຂວງຈຳປາສັກ ເອົາໃຈໃສ່ໃນການຝຶກຊ້ອມ ແລະ ຕິດຕາມຢ່າງໃກ້ຊິດກ່ຽວກັບການປ່ຽນແປງຂອງສະພາບດິນຟ້າອາກາດ ແຕ່ລະໄລຍະຈາກກົມອຸຕຸນິຍົມ ແລະ ອຸທຸກກະສາດ ເພື່ອກຽມພ້ອມຮັບມືຕະຫລອດເວລາ. ອັນສຳຄັນແມ່ນ ໃຫ້ເອົາໃຈໃສ່ສຶກສາອົບຮົມໃຫ້ປະຊາຊົນ ມີສະຕິລະວັງຕົວ ຕໍ່ກົນອຸບາຍມ້າງເພ ແລະ ສ້າງຄວາມປັ່ນປ່ວນຂອງກຸ່ມຄົນບໍ່ຫວັງດີ ຜ່ານສື່ສັງຄົມອອນລາຍຕ່າງໆ.


ຕາມການລາຍງານຂອງທ່ານ ບຸນຖອງ ດີວິໄຊ ເຈົ້າແຂວງຈຳປາສັກ, ຈາກສະພາບຝົນຕົກໜັກ ເປັນເວລາຫລາຍວັນ ໄດ້ເຮັດໃຫ້ນໍ້າຖ້ວມບ້ານເຮືອນ ແລະ ພື້ນທີ່ການຜະລິດຂອງປະຊາຊົນ, ໃນນີ້ ມີ 1 ນະຄອນ ແລະ 9 ເມືອງໄດ້ຮັບຜົນກະທົບ, ກວມເອົາ 331 ບ້ານ, 15.069 ຄອບຄົວ, ແລະ ພົນລະເມືອງ 87.238 ຄົນ. ເນື້ອທີ່ນາ ຖືກນໍ້າຖ້ວມ 10.966 ເຮັກຕາ, ເສຍຫາຍ 7.965 ເຮັກຕາ, ເນື້ອທີ່ພືດຜັກຖືກນໍ້າຖ້ວມ 955 ເຮັກຕາ, ເສຍຫາຍ 669 ເຮັກຕາ ແລະ ພື້ນຖານໂຄງລ່າງຈຳນວນຫນຶ່ງ ກໍ່ຖືກເປ່ເພເສຍຫາຍ.
ໃນໂອກາດດຽວກັນນີ້, ທ່ານ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ໄປຢ້ຽມປະຊາຊົນທີ່ຖືກຜົນກະທົບຈາກໄພນໍ້າຖ້ວມ ຢູ່ທີ່ບ້ານປາກຊອນ, ເມືອງຊະນະສົມ ບູນ ແລະ ມອບເງິນຈໍານວນ 50 ລ້ານກີບ ໃຫ້ອໍານາດການປົກຄອງແຂວງຕື່ມອີກ.


ຂໍ້ມູນ: ຂ່າວສານປະເທດລາວ 
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.