Header Ads

ທ່ານຮອງນາຍົກລັດຖະມົນຕີ ສືບຕໍ່ຊີ້ນຳການແກ້ໄຂວຽກງານຟື້ນຟູໄພພິບັດເມືອງສະໜາມໄຊ



ໃນຕອນເຊົ້າຂອງວັນທີ 25 ກັນຍາ 2018 ທີ່ຫ້ອງວ່າການປົກຄອງແຂວງອັດຕະປື, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດ ແກ້ໄຂໄພພິບັດລະດັບຊາດ ໄດ້ຊີ້ນຳວຽກງານລວມ ໃນການແກ້ໄຂໄພພິບັດນໍ້າຖ້ວມ ຢູ່ເມືອງສະໜາມໄຊ.

ກ່ອນອື່ນ, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານ ຄວາມຄືບໜ້າໃນການແກ້ໄຂວຽກງານດັັ່ງກ່າວ ໃນໄລຍະຜ່ານມາ ຈາກທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ, ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດ ແຂວງອັດຕະປື ຊຶ່ງເຫັນວ່າ: ຜ່ານການເກັບກຳຂໍ້ມູນ ແລະ ແກ້ໄຂວຽກງານດັ່ງກ່າວ ມາຮອດປະຈຸບັນ ສາມາດສັັງລວມຂໍ້ມູນເບື້ອງຕົ້ນໄດ້ ຄື: ຈາກເຫດການຄູກັນນໍ້າເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກພັງ ໄດ້ສົ່ງຜົນກະທົບຕໍ່ປະຊາຊົນ ຈຳນວນ 19 ບ້ານ, ມີ 3.081 ຫຼັງຄາເຮືອນ, 3.657 ຄອບຄົວ, ພົນລະເມືອງ 14.108 ຄົນ, ຍິງ 7.705 ຄົນ, ມູນຄ່າການເສຍຫາຍເບື້ອງຕົ້ນ 400 ກວ່າຕື້ກີບ (ໃນນັ້ນ ບໍ່ທັນໄດ້ນັບມູນຄ່າການເສຍຫາຍດ້ານພື້ນຖານໂຄງລ່າງ, ພື້ນຖານເສດຖະກິດ-ສັງຄົມ ແລະ ສິ່ງແວດລ້ອມ), ໃນນີ້ ໄດ້ຮັບຜົນກະທົບໜັກ ຈຳນວນ 6 ບ້ານ, ມີ 1.124 ຄອບຄົວ, ພົນລະເມືອງ 4.571 ຄົນ, ຍິງ 2.224 ຄົນ. ສໍາລັບຈໍານວນທີ່ໄດ້ຮັບແຈ້ງສູນຫາຍ ໃນເບື້ອງຕົ້ນ ຈຳນວນ 131 ຄົນນັ້ນ, ແມ່ນໄດ້ກັບຄືນສູ່ຄອບຄົວແລ້ວ ຈຳນວນ 66 ຄົນ, ຊອກຄົ້ນພົບຜູ້ເສຍຊີວິດ ຈໍານວນ 34 ສົບ (ຍັງບໍ່ຮູ້ຍາດພີ່ນ້ອງ ຈໍານວນ 2 ສົບ) ແລະ ຍັງສູນຫາຍບໍ່ຮູ້ຮ່ອງຮອຍ ຈຳນວນ 31 ຄົນ, ນອກນັ້ນ ຍັງມີຜູ້ໄດ້ຮັບຜົນກະທົບ ແລ້ວໄປປິ່ນປົວຢູ່ໂຮງໝໍ ແລະ ເສຍຊີວິດໃນເວລາຕໍ່ມາ ຈຳນວນ 6 ຄົນ. ດ້ານການຟື້ນຟູພື້ນຖານໂຄງລ່າງຄົມມະນາຄົມ ແມ່ນສຳເລັດການກໍ່ສ້າງຂົວເຫຼັກ ຈໍານວນ 4 ແຫ່ງ ແລະ ກຳລັງກໍ່ສ້າງ ຈໍານວນ 8 ແຫ່ງ. 

ສະເພາະການປຸກສ້າງທີ່ຢູ່ຊົ່ວຄາວ: ຢູ່ຈຸດບ້ານຫາດຍາວ ມີຈຳນວນ 140 ຫ້ອງ ແມ່ນສຳເລັດ 100% ແລະ ໄດ້ຍົກຍ້າຍປະຊາຊົນເຂົ້າໄປຢູ່ແລ້ວ ແລະ ຈຸດດົງບາກ ມີແຜນກໍ່ສ້າງ ຈຳນວນ 468 ຫ້ອງ, ສຳເລັດໄປແລ້ວ 38% ຊຶ່ງສອງຈຸດດັ່ງກ່າວແມ່ນບໍລິສັດ SK ເປັນຜູ້ຈັດຕັ້ງປະຕິບັດ; ສ່ວນຢູ່ຈຸດຕະມໍຢອດ ແລະ ດອນບົກ ແມ່ນປຸກສ້າງແບບເຮືອນສຳເລັດຮູບ ມີຈຳນວນ 450 ຫຼັງ, ປະຈຸບັນ ໄດ້ນໍາເຂົ້າມາຮອດພື້ນທີ່ປຸກສ້າງແລ້ວ ຈຳນວນ 24 ຫຼັງ, ສໍາເລັດການປະກອບ ແລະ ຕິດຕັ້ງແລ້ວ ຈຳນວນ 12 ຫຼັງ, ສ່ວນຍັງເຫຼືອ ຈໍານວນ 426 ຫຼັງ ແມ່ນກໍາລັງນໍາເຂົ້າມາຈາກຕ່າງປະເທດ. ຕໍ່ວຽກບຸກເບີກພື້ນທີ່ ຢູ່ຖາວອນ ມີຈຳນວນ 4 ຈຸດ ຄື: ຈຸດດົງບາກ ສຳເລັດ 25%, ຈຸດດອນບົກ ສໍາເລັດ 30%, ຈຸດປິນດົງ ສໍາເລັດ 30% ແລະ ຈຸດຕະມໍຢອດ ສໍາເລັດ 40%. ນອກຈາກນັ້ນ, ຍັງໄດ້ຮັບຟັງການປະກອບຄໍາຄິດເຫັນ ແລະ ຂໍ້ສະເໜີຕ່າງໆ ຈາກຜູ້ຕາງໜ້າ ບັນດາອະນຸກຳມະການ ຮັບຜິດຊອບຟື້ນຟູ ແລະ ແກ້ໄຂຜົນກະທົບ ຕື່ມອີກ.

ໃນໂອກາດດຽວກັນ, ທ່ານ ສອນໄຊ ສີພັນດອນ ໄດ້ມີຄຳເຫັນໂອ້ລົົມ ແລະ ຊີ້ນຳຕໍ່ອົງການປົກຄອງແຂວງອັດຕະປື ກໍ່ຄື ຄະນະຮັບຜິດຊອບຟື້ນຟູ ແລະ ແກ້ໄຂຜົນກະທົບ ຈາກໄພພິບັດເມືອງສະໜາມໄຊ. ຊຶ່ງທ່ານໄດ້ເນັ້ນໜັກບາງດ້ານ ເປັນຕົ້ນ ໃຫ້ເອົາໃຈໃສ່ໄປພົບປະໂອ້ລົມ, ປຸກລະດົມ, ລົງໃກ້ສິດຕິດແທດ, ສະໜອງຂໍ້ມູນຂ່າວສານ ແລະ ອະທິບາຍຊີ້ແຈງໃຫ້ປະຊາຊົນ ໄດ້ເຂົ້າໃຈແຈ້ງ ຕໍ່ການຈັດຕັ້ງປະຕິບັດວຽກງານຕ່າງໆ ໂດຍສະເພາະ ແຜນການພັດທະນາ, ການປະຕິບັດນະໂຍບາຍ, ການມີສ່ວນຮ່ວມຂອງປະຊາຊົນ, ຄວາມຄືບໜ້າຕ່າງໆ ບົນພື້ນຖານສອດຄ່ອງກັບແນວທາງຂອງພັກ, ນະໂຍບາຍຂອງລັດ, ທັງສອດຄ່ອງ ແລະ ແທດເໝາະກັບຄວາມເປັນຈິງ, ມີຄວາມໂປ່ງໃສ, ຍຸຕິທຳ ແລະ ສົມເຫດສົມຜົນ, ຮັບປະກັນໄດ້ ຜົນປະໂຫຍດລວມຂອງປະເທດຊາດ ແລະ ປະຊາຊົນ; ພ້ອມກັນນັ້ນ ກໍ່ໃຫ້ສຸມໃສ່ຊຸກຍູ້ການປຸກສ້າງເຮືອນພັກຊົ່ວຄາວ ແລະ ພື້ນຖານໂຄງລ່າງ ທີ່ຕິດພັນກັບການດໍາລົງຊີວິດປະຈໍາວັນ ໃນຄົວເຮືອນຂອງປະຊາຊົນ ໃຫ້ສຳເລັດໂດຍໄວ; ເອົາໃຈໃສ່ປັບປຸງແກ້ໄຂບາງວຽກງານທີ່ຍັງຄົງຄ້າງ ລວມທັງ ຂໍ້ສະເໜີຕ່າງໆຂອງປະຊາຊົນ ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້, ອັນສຳຄັນ ແມ່ນພ້ອມກັນຈັດຕັ້ງຜັນຂະຫຍາຍ ບັນດາວຽກງານທີ່ໄດ້ຕົກລົງເປັນເອກະພາບກັນແລ້ວນັ້ນ ໃຫ້ປະກົດຜົນເປັນຈິງ ແລະ ທັນຕາມກຳນົດເວລາ.



ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ 
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.