Header Ads

ຕົວະໂອນເງິນຜ່ານລະບົບອອນລາຍ ແລ້ວປອມແປງຕົວເລກການໂອນ ສຸດທ້າຍຖືກຈັບດໍາເນີນຄະດີ



ເຈົ້າໜ້າທີ່ ປກສ ເມືອງຈໍາພອນ ແຂວງສະຫວັນນະເຂດ ໃຫ້ຮູ້ວາ: ໃນວັນທີ 9 ສິງຫາ 2018, ນາງ ພູວຽງ ອາຍຸ 43 ປີ ບ້ານບາກ ເມືອງຈໍາພອນ ແຈ້ງຄວາມໃຫ້ດໍາເນີນຄະດີກັບຜູ້ຍິງຄົນໜຶ່ງອາຍຸປະມານ 20 ປີ ທີ່ຕົວະໃຫ້ໂອນເງິນຜ່ານລະບົບອອນລາຍ, ພາຍຫຼັງກວດເບິ່ງບໍ່ມີ ເງິນ ເຂົ້າບັນຊີ; ຜູ້ເສຍຫາຍໃຫ້ການວ່າ: ກ່ອນໜ້ານັ້ນມີຜູ້ຍິງຄົນໜຶ່ງຂັບຂີ່ລົດຈັກບໍ່ມີໝາຍເລກທະບຽນມາຈອດຢູ່ໜ້າເຮືອນ ພ້ອມຖາມວ່າຕ້ອງການ ໂອນເງິນບໍ ແລະ ຕົນເອງກໍ່ຕອບວ່າຕອງການ. ຈາກນັ້ນ, ຜູ້ກໍເຫດຂໍເລກບັນຊີ ແລະ ທໍາການໂອນເງິນ ຈໍານວນ 65.500 ບາດ ສໍາເລັດ ແລະ ບອກວ່າເງິນເຂົ້າບັນຊີແລ້ວ; ຈາກນັ້ນ, ກໍ່ຈ່າຍເງິນຄ່າໂອນໃຫ້ຍິງຄົນດັ່ງກ່າວ, ພາຍຫຼັງໄປກວດບໍ່ພົບເຫັນເງິນເຂົ້າບັນຊີ ຈຶ່ງຮູ້ວ່າຖືກຕົວະ ແລະ ເຂົ້າແຈ້ງຄວາມຕໍ່ເຈົ້າ ໜ້າທີ່.




ຜ່ານການເກັບກໍາຂໍ້ມນ ແລະ ກວດສອບບັນຊີ ຮູ້ວ່າ: ເຈົ້າຂອງບັນຊີດັ່ງກ່າວອອກຊື່ ນາງ ນິລັນດອນ ຫຼື ຈ່ອຍ ອາຍຸ 22 ປີ, ບ້ານຈອມເພັດ ເມືອງອຸທຸມພອນ ແຂວງສະຫວັນນະເຂດ. ຈາກນັ້ນ, ເຈົ້າໜ້າທີ່ຈຶ່ງນໍາຕົວມາສອບສວນ ແລະ ຜູ້ກ່ຽວສາລະພາບວ່າ ເປັນຜູ້ກໍ່ເຫດແທ້ ໂດຍໃຊ້ ວິທີຕົວະໂອນເງິນຜ່ານລະບົບອອນລາຍດ້ວຍການຂໍເລກບັນຊີນໍາຜູ້ເສຍຫາຍແລ້ວມີການປອມແປງຕົວເລກການໂອນ ເພື່ອຕົວະ ໃຫ້ຜູ້ເສຍຫາຍຫຼົງ ເຊື່ອ, ເຊິ່ງຜ່ານມາ ກໍ່ໄດກໍ່ເຫດມາແລ້ວຫຼາຍຄັ້ງ.

ເຈົ້າໜ້າທີ່ຍັງໃຫ້ຮູ້ຕື່ມວາ: ປັດຈຸບັນນີ້, ມີຜູ້ເສຍຫາຍທີ່ເຂົ້າແຈ້ງຄວາມຕໍ່ເຈົ້າໜ້າທີ່ຈໍາ ນວນ 5 ຄົນ ມີມູນຄ່າເສຍຫາຍ 176.000 ບາດ ແລະ ຜູ້ກ່ຽວກໍ່ເຄີຍຖືກເຈົ້າໜ້າທີ່ ປກສ ເມືອງຈໍາພອນ ກັກຕົວສຶກສາອົບຮົບໃນວັນທີ 22 ພະຈິກ 2017 ຂໍ້ຫາສໍ້ໂກງຊັບພົນລະເມືອງ. ຕໍ່ກັບ ບັນຫາດັງກ່າວນີ້, ຈຶ່ງໄດ້ຮຽກຮ້ອງໃຫ້ຜູ້ທີ່ໃຊລະບົບໂອນເງິນທາງອອນລາຍ ຈົ່ງມີສະຕິລະວັງຕົວ ແລະ ກວດເຊັກເບິ່ງເງິນໃນບັນຊີ ແລະ ລະບົບ ໂອນຂອງບັນຊີຢ່າງຄັກແນ່ກ່ອນຈະຕົກເປັນເຫຍື່ອຂອງຄົນບໍ່ດີ.


ພາບ ແລະ ຂ່າວ: ນສພ ຄວາມສະຫງົບ
© ໂຕະນໍ້າຊາຂ່າວ |  www.tonamcha.com
_____



No comments

Powered by Blogger.