Header Ads

ຍອດຜູ້ສູນຫາຍມີພຽງແຕ່ 66 ຄົນ ຈາກເຫດການຄູກັນນໍ້າ ເຂື່ອນເຊປຽນ-ເຊນໍ້ານ້ອຍແຕກ ທີ່ແຂວງອັດຕະປື



ອີງຕາມການລາຍງານຂອງ ວິທະຍຸກະຈາຍສຽງແຫ່ງຊາດ ລະບຸວ່າ: ຈຳນວນຜູ້ສູນຫາຍ ຈາກເຫດສັນເຂື່ອນກັນນໍ້າຂອງອ່າງເກັບນໍ້າສຳຮອງຂອງເຂື່ອນໄຟຟ້າເຊປຽນ-ເຊນໍ້ານ້ອຍແຕກຢູ່ເມືອງ ສະໜາມໄຊ, ແຂວງ ອັດຕະປື ຫລຸດລົງຈາກ 131 ຄົນ ຍັງເຫລືອ 66 ຄົນ, ໃນຂະນະທີ່ຈຳນວນຜູ້ເສຍຊີວິດທັງຫມົດທີ່ເກັບກຳໄດ້ ແມ່ນ 40 ສົບ, ໃນນີ້ຄົ້ນພົບຢູ່ພາກສະໜາມ 34 ສົບ ແລະ ເສຍຊີວິດຢູ່ໂຮງໝໍແຂວງອັດຕະປື 6 ສົບ, ເຮັດໃຫ້ຈຳນວນຜູ້ສູນຫາຍຕົວຈິງທັງຫມົດ ຍັງເຫລືອພຽງ 32 ຄົນ, ແຕ່ບໍ່ແມ່ນ 97 ຄົນ ຕາມທີ່ເຄີຍໄດ້ລາຍງານອອກໄປໃນເບື້ອງຕົ້ນ.

ຂໍ້ມູນນີ້ ໄດ້ຮັບການເປີດເຜີຍໃນໂອກາດທີ່ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ, ພ້ອມດ້ວຍຄະນະ ເຊິ່ງປະກອບມີບັນດາລັດຖະມົນຕີ, ແລະ ຮອງລັດຖະມົນຕີຈາກ 4 ກະຊວງ ຄື: ກະຊວງ ແຮງງານ ແລະ ສະຫວັດດີການສັງຄົມ, ກະຊວງ ກະສິກຳ ແລະ ປ່າໄມ້, ກະຊວງ ພະລັງງານ ແລະ ບໍ່ແຮ່ ແລະ ກະຊວງ ໂຍທາທິການ ແລະ ຂົນສົ່ງ, ພ້ອມດ້ວຍເຈົ້າແຂວງອັດຕະປື ໄດ້ເປີດຖະແຫລງຂ່າວກ່ຽວກັບການຊ່ວຍເຫລືອ ແລະ ການແກ້ໄຂໄພພິບັດແຫ່ງຊາດ ໃນວັນທີ 19 ກັນຍາ 2018, ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ.

ທ່ານ ສອນໄຊ ສີພັນດອນ ໃຫ້ຮູ້ວ່າ: ເຫດຜົນທີ່ເຮັດໃຫ້ຕົວເລກຜູ້ສູນຫາຍມີການຄາດເຄື່ອນ ຍ້ອນວ່າ ໃນໄລຍະທຳອິດທີ່ສັນເຂື່ອນກັນນໍ້າຂອງອ່າງເກັບນໍ້າສຳຮອງຂອງເຂື່ອນໄຟຟ້າເຊປຽນ-ເຊນໍ້ານ້ອຍແຕກນັ້ນ, ຫລາຍຄອບຄົວໄດ້ພັດພາກຈາກກັນ, ແລະ ໄດ້ແຍກກັນໄປຢູ່ຫລາຍບ່ອນ; ບາງຄົນກໍ່ໄປອາໃສຢູ່ສູນທີ່ພັກຊົ່ວຄາວຢູ່ເມືອງ ສະໜາມໄຊ, ບາງຄົນກໍ່ໄປອາໃສຢູ່ສູນທີ່ພັກຊົ່ວຄາວຢູ່ເມືອງ ປາກຊ່ອງ ແລະ ອີກຈຳນວນຫນຶ່ງກໍ່ໄປຢູ່ສູນທີ່ພັກຊົ່ວຄາວຢູ່ເມືອງ ປະທຸມພອນ, ແຂວງ ຈຳປາສັກ, ແລະ ຈຸດທີ່ພັກອື່ນໆ, ລວມທັງ ມີອີກຈຳນວນຫນຶ່ງທີ່ໄດ້ໜີນໍ້າຖ້ວມໄປອາໃສຢູ່ກັບພີ່ນ້ອງ. 

ຕໍ່ມາ, ພາຍຫລັງທີ່ຄະນະກຳມະການກ່ຽວຂ້ອງໄດ້ສັບຊ້ອນ ແລະ ເກັບກຳຂໍ້ມູນລະອຽດຄືນໃຫມ່ແລ້ວ ຈຶ່ງພົບວ່າ ຈຳນວນຜູ້ສູນຫາຍຕົວຈິງມີເຫຼືອທັງໝົດພຽງແຕ່ 66 ຄົນ ເທົ່ານັ້ນ.  ປັດຈຸບັນ, ຄະນະກຳມະການສະເພາະກິດແກ້ໄຂໄພພິບັດລະດັບຊາດ ກຳລັງກະກຽມຂໍ້ມູນເພື່ອສະເໜີຕົວເລກທີ່ເປັນເອະກະພາບກັນໃຫມ່ນີ້ ໃຫ້ລັດຖະບານຮັບຮອງເອົາຢ່າງເປັນທາງການແລ້ວ ຈຶ່ງນຳສະເໜີໃຫ້ສັງຄົມຮັບຮູ້ຕໍ່ໄປ.

ທ່ານຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ ໃຫ້ຮູ້ຕື່ມວ່າ: ຈາກສະພາບນໍ້າຖ້ວມເກີດຂຶ້ນຢູ່ທົ່ວປະເທດ, ນັບແຕ່ກາງເດືອນ ກໍລະກົດ ຫາ ເດືອນ ສິງຫາ 2018 ນີ້ ໄດ້ເຮັດໃຫ້ປະຊາຊົນ ຈຳນວນ 639.000 ກ່ວາຄົນ, ຫຼື 131.000 ກ່ວາຄອບຄົວ ໃນ 2.409 ບ້ານ, ແລະ 115 ເມືອງໃນຂອບເຂດທົ່ວປະເທດ ໄດ້ຮັບຜົນກະທົບ, ໃນນີ້ມີຜູ້ເສຍຊີວິດທັງໝົດ 55 ຄົນ. ສະພາບນໍ້າຖ້ວມທີ່ເກີດຂຶ້ນຢ່າງຫນັກຫນ່ວງໃນປີນີ້ ໄດ້ສ້າງຄວາມເສຍຫາຍທາງດ້ານແຫຼ່ງທີ່ຢູ່ອາໃສຂອງປະຊາຊົນ ມູນຄ່າ 12 ຕື້ກ່ວາກີບ, ດ້ານໂຍທາທິການ ແລະ ຂົນສົ່ງ 631 ຕື້ກ່ວາກີບ, ກະສິກຳ ແລະ ປ່າໄມ້ 1.200 ຕື້ກ່ວາກີບ, ແລະ ດ້ານໄຟຟ້າ 25 ຕື້ກ່ວາກີບ. ສ່ວນດ້ານການສຶກສາ ແລະ ສາທາລະນະສຸກ ແມ່ນຍັງບໍ່ທັນສາມາດຄາດຄະເນມູນຄ່າເສຍຫາຍໄດ້ເທື່ອ. ນອກຈາກໄພພິບັດນໍ້າຖ້ວມແລ້ວ, ຍັງມີກໍລະນີ ສັດຕູພືດລະບາດຢູ່ 28 ເມືອງ ພາຍໃນ 5 ແຂວງ ຄື: ຜົ້ງສາລີ, ອຸດົມໄຊ, ຫລວງພະບາງ, ຫົວພັນ ແລະ ແຂວງ ຊຽງຂວາງຕື່ມອີກ. 


ໂດຍ: ບຸນຕຽງ ຈັນທະວົງ (ວສລ)
© ໂຕະນໍ້າຊາຂ່າວ |  www.tonamcha.com
_____



No comments

Powered by Blogger.