Header Ads

ນະຄອນຫຼວງວຽງຈັນ ຕ້ອງການງົບປະມານຟື້ນຟູຈາກໄພພິບັດ 67 ຕື້ກວ່າກີບ



ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ) ໄດ້​ລາຍ​ງານ​ຕໍ່​ທ່ານ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໂອ­ກາດ​ລົງ​ຊີ້​ນຳ​ວຽກ​ງານ​ການ​ຜະ­ລິດ​ຢູ່​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ວັນ​ທີ 12 ກັນ­ຍາ 2018 ວ່າ: ແຜນ­ການ​ຜະ­ລິດ​ປະ­ຈຳ​ປີ 2018 ຂອງ ນວ ຕົ້ນ­ຕໍ​ແມ່ນ​ການ​ຜະ­ລິດ​ເຂົ້າ­ນາ​ປີ​ໄດ້​ວາງ​ຄາດ­ໝາຍ​ເນື້ອ­ທີ່​ໄວ້ 52.373 ເຮັກ­ຕາ ຄາດ​ຄະ­ເນ​ຜົນ​ຜະ­ລິດ 236.733 ໂຕນ ຜ່ານ​ການ​ປະ­ຕິ­ບັດ​ຕົວ​ຈິງ​ສາ­ມາດ​ປັກ​ດຳ​ໄດ້ 52.259 ເຮັກ­ຕາ ທຽບ­ໃສ່​ແຜນ­ການ​ບັນ­ລຸ 99,78% ສ່ວນ​ພືດ​ທີ່​ເປັນ​ທ່າ­ແຮງ​ຫຼັກ​ຂອງ​ບັນ­ດາ​ເມືອງ​ມີ ພືດ​ຜັກ​ອິນ​ຊີ ສາ­ລີ ມັນ­ຕົ້ນ ກ້ວຍ ແລະ ໄມ້​ໃຫ້​ໝາກ ພ້ອມ​ນີ້​ຍັງ​ມີ​ສັດ­ລ້ຽງ​ເພື່ອ​ສະ­ໜອງ​ທາດ​ຊີ້ນ ເປັນ­ຕົ້ນ ງົວ ຄວາຍ ໝູ ໄກ່ ເປັດ​ພັນ​ຊີ້ນ ໄກ່​ພັນ​ຊີ້ນ ແລະ ປາ ປັດ­ຈຸ­ບັນ​ສະ­ພາບ​ດິນ​ຟ້າ​ອາ­ກາດ​ມີ​ການ​ປ່ຽນ­ແປງ ໂດຍ​ສະ­ເພາະ ຝົນ­ຕົກ​ແຮງ​ກວ່າ​ປົກ­ກະ­ຕິ ແລະ ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້ 6 ເມືອງ 346 ບ້ານ 4.188 ຄອບ­ຄົວ ຖືກ​ນ້ຳ​ຖ້ວມ​ຂັງ ໃນ​ນີ້​ເສຍ​ຫາຍ​ຫຼາຍ​ແມ່ນ​ເມືອງ​ໄຊ​ທາ­ນີ ນາ​ຊາຍ​ທອງ ປາກ​ງື່ມ ຫາດ​ຊາຍ​ຟອງ ສີ​ໂຄດ​ຕະ­ບອງ ແລະ ສັງ​ທອງ ເຮັດ​ໃຫ້­ການ​ຜະ­ລິດ​ລະ­ດູ­ຝົນ ໂດຍ​ສະ­ເພາະ ເຂົ້າ­ນາ​ປີ ພືດ​ຜັກ​ລະ­ດູ­ຝົນ ສັດ​ນ້ຳ ແລະ ລະ­ບົບ​ຊົນ­ລະ­ປະ­ທານ​ທີ່​ຖືກ​ກະ­ທົບ ແລະ ເສຍ​ຫາຍ​ເປັນ​ຈຳ­ນວນ​ຫຼາຍ ເຊິ່ງ​ມາ​ຮອດ​ວັນ​ທີ 6 ກັນ­ຍາ 2018 ສາ­ມາດ​ສັງ​ລວມ​ມູນ​ຄ່າ​ເສຍ​ຫາຍ​ເບື້ອງ​ຕົ້ນ 263,57 ຕື້​ກີບ ໃນ​ນີ້​ດ້ານ​ການ​ປູກ­ຝັງ 207,86 ຕື້​ກີບ ການ​ລ້ຽງ­ສັດ ແລະ ການ​ປະ­ມົງ 25,21 ຕື້​ກີບ ແລະ ດ້ານ​ຊົນ­ລະ­ປະ­ທານ 30,5 ຕື້​ກີບ.




ເພື່ອ​ແນ­ໃສ່​ຟື້ນ​ຟູ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ​ດັ່ງ­ກ່າວ ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໄດ້​ວາງ​ແຜນ­ການ​ແກ້​ໄຂ​ພາຍ­ຫຼັງ​ນ້ຳ​ຫຼຸດ​ລົງ ແລະ ກະ­ກຽມ​ໃສ່​ແຜນ­ການ​ຜະ­ລິດ​ລະ­ດູ­ແລ້ງ ສົກ​ປີ 2018-2019 ພ້ອມ​ທັງ​ແຜນ­ການ​ຮອງ​ຮັບ​ໄລ­ຍະ​ຍາວ​ແຕ່​ລະ​ດ້ານ ເປັນ­ຕົ້ນ ຈະ​ສູ້​ຊົນ​ຂະ­ຫຍາຍ​ເນື້ອ­ທີ່​ການ​ຜະ­ລິດ​ເຂົ້າ­ນາ­ແຊງ ປີ 2019 ໃນ​ເຂດ​ຊົນ­ລະ­ປະ­ທານ​ທົ່ວ ນວ ໃຫ້​ໄດ້ 15.800 ເຮັກ­ຕາ ໂດຍ​ໃຫ້​ເປັນ​ລັກ­ສະ­ນະ​ກະ­ເສດ​ສຸມ ສຸມ​ໃສ່​ຍົກ​ຜະ­ລິດ​ຕະ​ພາບ​ການ​ຜະ­ລິດ ໂດຍ​ແບ່ງ​ເປັນ 6 ເຂດ​ຄື: ເຂດ​ທົ່ວ​ໄປ 4,5 ໂຕນ​ຕໍ່​ເຮັກ­ຕາ ເຂດ​ກາງ 4,8 ໂຕນ​ຕໍ່​ເຮັກ­ຕາ ແລະ ເຂດ​ຈຸດ​ສຸມ 5 ໂຕນ​ຕໍ່​ເຮັກ­ຕາ ສ່ວນ​ເນື້ອ­ທີ່​ປູກ​ພືດ​ຈະ​ສູ້​ຊົນ​ໃຫ້​ໄດ້ 1.537 ເຮັກ­ຕາ ເພື່ອ​ໃຫ້​ບັນ­ລຸ​ຕາມ​ແຜນ​ດັ່ງ­ກ່າວ ພວກ​ເຮົາ​ມີ​ຄວາມ​ຕ້ອງ­ການ​ສະ­ໝອງ​ປັດ​ໄຈ​ນຳ​ເຂົ້າ​ສຳ­ລັບ​ການ​ຜະ­ລິດ 67,9 ຕື້​ກີບ ເຊັ່ນ: ແນວ​ພັນ​ເຂົ້າ 359.820 ໂຕນ ມູນ​ຄ່າ 2,19 ຕື້​ກີບ ແນວ​ພັນ​ພືດ​ຜັກ 4.350 ໂຕນ 130 ລ້ານ​ກີບ ສາ­ລີ​ອາ­ຫານ​ສັດ 7.150 ໂຕນ ມູນ​ຄ່າ 193 ລ້ານ​ກີບ ຝຸ່ນ-ປຸຍ 8.360 ໂຕນ ມູນ​ຄ່າ 16,16 ຕື້​ກີບ ລູກ​ປາ 1,3 ລ້ານ​ໂຕ ມູນ​ຄ່າ 520 ລ້ານ​ກີບ ລູກ​ກົບ 2.500 ໂຕ ມູນ​ຄ່າ 750.000 ກີບ ລູກ​ກຸ້ງ 75.000 ໂຕ ມູນ​ຄ່າ 22,5 ລ້ານ​ກີບ ແນວ​ພັນ​ຫຍ້າ​ເນ​ເປຍ 90 ໂຕນ ມູນ​ຄ່າ 72 ລ້ານ​ກີບ ຫຍ້າ​ສົດ 108 ໂຕນ ມູນ​ຄ່າ 54 ລ້ານ​ກີບ ເຟືອງ 108 ໂຕນ ມູນ​ຄ່າ 21,6 ລ້ານ​ກີບ ອາ­ຫານ​ໝູ 270 ໂຕນ ມູນ​ຄ່າ 1,35 ຕື້​ກີບ ເຂົ້າ­ປຽນ 640 ກິ​ໂລ ມູນ​ຄ່າ 1,6 ລ້ານ​ກີບ ຢາ​ວັກ​ຊິນ ແລະ ຢາ​ປິ່ນ­ປົວ 40.000 ກ໋ອງ ມູນ​ຄ່າ 1,3 ຕື້​ກີບ ສ້ອມ­ແປງ ແລະ ກໍ່­ສ້າງ​ລະ­ບົບ​ຊົນ­ລະ­ປະ­ທານ 45,9 ຕື້​ກີບ.


ສຳ­ລັບ​ວຽກ​ຮີບ​ດ່ວນ​ທີ່​ພວມ​ຈັດ​ຕັ້ງ​ປະ­ຕິ­ບັດ​ປັດ­ຈຸ­ບັນ ແມ່ນ​ເລັ່ງ​ສຳ​ຫຼວດ​ເນື້ອ­ທີ່​ການ​ຜະ­ລິດ​ທີ່​ຍັງ​ເຫຼືອ ແນະ­ນຳ ແລະ ເຝິກ­ອົບ­ຮົມ​ໃຫ້​ຊາວ​ກະ­ສິ­ກອນ ເອົາ­ໃຈ­ໃສ່​ບົວ­ລະ­ບັດ​ຮັກ­ສາ​ເຂົ້າ ພືດ​ຜັກ ພືດ​ອຸດ­ສາ­ຫະ­ກຳ ໄມ້​ໃຫ້​ໝາກ​ໃຫ້​ປອດ​ໄພ​ຈາກ​ສັດ­ຕູ​ພືດ​ທຳ­ລາຍ ແລະ ໃຫ້​ໄດ້​ຮັບ​ການ​ເກັບ​ກ່ຽວ​ຜົນ​ຜະ­ລິດ​ໃຫ້​ໄດ້​ຕາມ​ສະ­ມັດ­ຖະ­ພາບ​ທີ່​ວາງ​ໄວ້ ພ້ອມ​ທັງ​ສະ­ໜອງ​ແນວ​ພັນ​ໃຫ້​ຊາວ​ກະ­ສິ­ກອນ ສ່ວນ​ວຽກ​ການ​ປະ­ມົງ​ແມ່ນ​ແນະ­ນຳ​ໃຫ້​ຊາວ​ກະ­ສິ­ກອນ​ເຝົ້າ​ລະ­ວັງ ສັກ​ຢາ​ປ້ອງ​ກັນ​ພະ­ຍາດ​ໃຫ້​ສັດ ແລະ ສະ­ໜອງ​ຫຍ້າ ດ້ານ​ຊົນ­ລະ­ປະ­ທານ​ແມ່ນ​ໃຫ້​ໜ່ວຍ​ງານ​ກ່ຽວ­ຂ້ອງ ລົງ​ເກັບ​ກຳ​ຕົວ​ຈິງ ເພື່ອ​ຂຶ້ນ​ແຜນ​ຂໍ​ງົບ­ປະ­ມານ​ສ້ອມ­ແປງ ລວມ​ທັງ​ປຸກ­ລະ­ດົມ​ໃຫ້​ປະ­ຊາ­ຊົນ​ປະ­ກອບ­ສ່ວນ.

Add caption



ຂໍ້ມູນຈາກ: ນສພ ວຽງຈັນໃຫ່ມ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.