Header Ads

ຄາດຕະກຳແຟນສາວ ແລ້ວເອົາຕົວຫຼົບໜີໄດ້ປີກວ່າ ສຸດທ້າຍຖືກຈັບມາດຳເນີນຄະດີ



ອີງຕາມການລາຍງານຂອງ ໜັງສືພິມ ຄວາມສະຫງົບ  ວ່າ: ຄະດີຄາດຕະກຳຍິງສາວອາຍຸ 22 ປີ ຢູ່ແຄມປ່າຫຼັງໂຮງງານເຟີນິເຈີ້ ເຂດບ້ານອີ່ໄລເໜືອ ເມືອງນາຊາຍທອງ ນະຄອນຫຼວງວຽງຈັນ ໃນເດືອນກຸມພາ 2017. ເມື່ອບໍ່ດົນມານີ້ ເຈົ້າໜ໊າທີ່ຕຳຫຼວດ ສາມາດຕິດຕາມຈັບຕົວຄົນຮ້າຍໄດ້ແລ້ວຊື່ ທ້າວ ວົງໄຊ ອາຍຸ 25 ປີ ຢູ່ບ້ານດອນທາດ ເມືອງຕົ້ນເຜິ້ງ ແຂວງບໍ່ແກ້ວ ເຊິ່ງເປັນແຟນຂອງຜູ້ເສຍຊີວິດ. ພາຍຫຼັງໄປລີ້ຊ່ອນຢູ່ນຳພີ່ນ້ອງ ຢູ່ບ້ານເຄິງຫຼັກຄຳ ເມືອງຄອບ ແຂວງໄຊຍະບູລີໄດ້ປີກວ່າ.


ພັທ ເຂິງຄຳ ຈັນທະວີໄຊ ຮອງຫົວໜ້າພະແນກສືບສວນ-ສອບສວນ ປກສ ນະຄອນຫຼວງວຽງຈັນ ໄດ້ຖະແລງຕໍ່ໜັງສືພິມຄວາມສະຫງົບໃນວັນທີ 26 ກັນຍາ 2018 ວ່າ: ຄະດີດັ່ງກ່າວເກີດຂື້ນແຕ່ວັນທີ 16 ກຸມພາ 2017 ຜູ້ເສຍຊີວິດຊື່ ນາງ ຍົວ ອາຍຸ 22 ປີ ຢູ່ບ້ານໂນນຕ້ອງ ເມືອງໝື່ນ ແຂວງວຽງຈັນ ແລະຜູ້ລົງມືຊື່ ທ້າວ ວົງໄຊ ອາຍຸ 25 ປີ ເປັນພະນັກງານປະຈຳການຢູ່ເຂດເມືອງໝື່ນແຂວງວຽງຈັນ. ພາຍຫຼັງໄດ້ສືບຮູ້ວ່າຜູ້ກ່ຽວແມ່ນໄດ້ຫຼົບໜີຄວາມຜິດໄປລີ້ຊ່ອນຢູ່ນຳພີ່ນ້ອງ ຢູ່ບ້ານເຄິງຫຼັກຄຳ ເມືອງຄອບ ແຂວງໄຊຍະບູລີ.

ຈາກນັ້ນ ຈຶ່ງປະສານສົມທົບກັບເຈົ້າໜ້າທີ່ຕຳຫຼວດ ປກສ ແຂວງໄຊຍະບູລີ ແລະ ປກສ ເມືອງຄອບ ເພື່ອຕິດຕາມຈັບຕົວ. ມາຮອດວັນທີ 23 ສິງຫາ 2018 ຈຶ່ງສາມາດຈັບຕົວຜູ້ກ່ຽວໄດ້ແລ້ວນຳຕົວໄປເຮັດແຜນປະກອບຄຳສາລະພາບຢູ່ສະຖານທີ່ເກີດເຫດ ເພື່ອປະກອບໃສ່ສຳນວນຄະດີ ສົ່ງໃຫ້ໄອຍາການສານສັ່ງຟ້ອງສານຕັດສິນຕາມລະບຽບກົດໝາຍ.


ຜ່ານການສອບສວນຜູ້ກ່ຽວສາລະພາບວ່າ: ຜູ້ກ່ຽວແມ່ນໄດ້ຄາດຕະກຳນາງ ຍົວ ຍ້ອນຄວາມໂມໂຫແລະຫຶງຫວງ ເບື້ງຕົ້ນໃນວັນທີ 14 ກຸມພາ 2017 ໄດ້ໂທລະສັບຫານາງ ຍົວ (ແຟນ) ໃຫ້ໄປຫາຢູ່ນະຄອນຫຼວງວຽງຈັນ ເພື່ອຈະພາກັນໄປຊືຢາປົວພະຍາດ. ຈາກນັ້ນນາງ ຍົວກໍ່ໄດ້ຂີ່ລົດໂດຍສານໄປ ພໍໄປຮອດເວລາ 18:00 ໂມງແລ້ວທ້າວ ວົງໄຊ ຂີ່ລົດຈັກເວັບ 100 ບໍ່ມີປ້າຍທະບຽນໄປຮັບ ພາກັນໄປນອນຢູ່ເຮືອນພັກເຂດບ້ານໜອງບົວທອງເໜືອ. ຫຼັງຈາກນັ້ນເວລາປະມານ 4:20 ໂມງ ຂອງວັນທີ 16 ກຸມພາ 2017 ຈຶ່ງໄດ້ພາກັນອອກຈາກເຮືອນພັກ ເພື່ອຈະໄປຊື້ຢາປົວພະຍາດຢູ່ເມືອງໂພນໂຮງ ແຂວງວຽງຈັນ ໃນຂະນະຂີ່ລົດຈັກໄປຢູ່ນັ້ນທັງ 2 ຄົນໄດ້ຜິດຖຽງກັນສາເຫດຍ້ອນນາງ ຍົວ ເອົາຊິມໂທລະສັບອອກ ເຊິ່ງຜູ້ກ່ຽວຄິດວ່ານາງ ຍົວ ນັ້ນມີຜູ້ບ່າວໃໝ່.


ພໍຂີ່ລົດໄປຮອດເຂດບ້ານອີ່ໄລເໜືອ ເມືອງນາຊາຍທອງຈຶ່ງໄດ້ລ້ຽວລົດຈັກເຂົາຮ່ອມນ້ອຍ ຢູ່ຕໍ່ໜ້າໂຮງງານເຟີນິເຈີຮ້າງ ຈອດລົດຈັກແລ້ວຢືນລົມກັນເພື່ອປັບຄວາມເຂົ້າໃຈ ແຕ່ກົງກັນຂ້າມຍິ່ງຮ້າຍດ່າກັນແຮງກວ່າເກົ່າ ຜູ້ກ່ຽວໄດ້ຍ່າງກັບຄືນໄປຂື້ນລົດຈັກ ແຕ່ນາງ ຍົວ ດຶງຜູ້ກ່ຽວລົງລົດຈັກເຮັດໃຫ້ຜູ້ກ່ຽວລົມລົງກັບພື້ນ ແລະໃຈຮ້າຍ ຈຶ່ງໄດ້ລຸກຂື້ນ ແລ້ວໃຊ້ສອບເບື້ອງຂວາຟາດກັບລັງ 1 ບາດ ແລະໃຊ້ກຳປັ້ນຕີໃສ່ໜ້ານາງ ຍົວ 1 ບາດ ເຮັດໃຫ້ນາງ ຍົວ ລົ້ມລົງພື້ນ ຈາກນັ້ນກໍ່ຍ່າງໄປຈັບເອົາໄມ້ຍາວປະມານ 2 ແມັດ ໄປຕີໃສ່ຄິ້ວເບືອງຂວາອີກໜຶ່ງບາດ ຟາດໃສ່ໜ້າເອິກ 1 ບາດ ເຮັດໃຫ້ນາງ ຍົວເສຍຊີວິດ ແລ້ວຜູ້ກ່ຽວກໍ່ຂີ່ລົດຈັກເອົາຕົວຫຼົບໜີໄປອາໃສຢູ່ກັບພີ່ນ້ອງຢູ່ບ້ານເຄິງຫຼັກຄຳ ເມືອງຄອບ ແຂວງໄຊຍະບູລີ ມາຮອດວັນທີ 23 ສິງຫາ 2018 ເຈົ້າໜ້າທີ່ເມືອງຄອບ ຈຶ່ງໄດ້ຈັບຕົວແລ້ວມອບໃຫ້ພະແນກສືບສວນ-ສອບສວນ ປກສ ນະຄອນຫຼວງວຽງຈັນ ດຳເນີນຄະດີຕາມກົດໝາຍ.


ພາບ ແລະ ຂ່າວ: ໜັງສືພິມ ຄວາມສະຫງົບ
© ໂຕະນໍ້າຊາຂ່າວ |  www.tonamcha.com | www.tonamchanews.com
_____


No comments

Powered by Blogger.