Header Ads

ຮອງປະທານປະເທດແຫ່ງ ສປປ ລາວ ເຄື່ອນໄຫວຢ້ຽມຢາມປະຊາຊົນຜູ້ປະສົບໄພນໍ້າຖ້ວມຢູ່ເມືອງສະໜາມໄຊ



ໃນວັນທີ 5 ກັນຍາ 2018 ຜ່ານມານີ້ ທ່ານ ພັນຄໍາ ວິພາວັນ ຮອງປະທານປະເທດ ພ້ອມຄະນະໄດ້ເຄື່ອນໄຫວຢ້ຽມຢາມປະຊາຊົນຜູ້ປະສົບໄພນໍ້າຖ້ວມທີ່ເມືອງສະໜາມໄຊ ໂດຍໄດ້ຮັບການຕ້ອນຮັບຈາກອໍານາດການປົກຄອງແຂວງ,ເມືອງ ກໍ່ຄືຄະນະກໍາມະການຟື້ນຟູ ແລະແກ້ໄຂຜົນກະທົບຈາກໄພນໍ້າຖ້ວມຂອງແຂວງອັດຕະປື.ໂດຍເບື້ອງຕົ້ນທ່ານພ້ອມຄະນະກໍ່ໄດ້ຮັບຟັງການລາຍງານຈາກທ່ານ ບຸນໂຮມ ພົມມະສານ ເຈົ້າເມືອງໆສະໜາມໄຊ ກ່ຽວກັບການຊ່ວຍເຫຼືອເບິ່ງແຍງຊີວິກການເປັນຢູ່ຂອງປະຊາຊົນຜູ້ປະສົບໄພນໍ້າຖ້ວມ.ເຊິ່ງຕາມການລາຍງານຂອງທ່ານເຈົ້າເມືອງສະໜາມໄຊແລ້ວກໍ່ເຫັນວ່າການຊ່ວຍເຫຼືອເບິ່ງແຍງຊີວິດການເປັນຢູ່ຂອງປະຊາຊົນຜູ້ປະສົບໄພແມ່ນໄດ້ຮັບການຈັດຕັ້ງປະຕິບັດໄດ້ເປັນດີ ແລະປະຈຸບັນຊີວິດການເປັນຢູ່ຂອງຜູ້ປະສົບໄພກໍ່ເຫັນວ່າມີຄວາມເປັນຢູ່ຄ່ອຍດີຂື້ນເທື່ອລະກ້າວ.



ໂອກາດດັ່ງກ່າວທ່ານຮອງປະທານປະເທດກໍ່ໄດ້ເນັ້ນໜັກໃຫ້ຄະນະກໍາມະການຟື້ນຟູ ແລະແກ້ໄຂຜົນກະທົບຈາກໄພນໍ້າຖ້ວມຂອງແຂວງອັດຕະປື ສືບຕໍ່ໃຫ້ການຊ່ວຍເຫຼືອປະຊາຊົນຜູ້ປະສົບໄພໃຫ້ມີຊີວິດການເປັນຢູ່ກັບຄືນສູ່ສະພາບປົກກະຕິ ແລະດີຂື້ນໂດຍໄວເທົ່າທີ່ຈະໄວໄດ້,ສືບຕໍ່ເລັ່ງມືການປຸກສ້າງທີ່ພັກຊົ່ວຄາວ ແລະຖາວອນໃຫ້ສໍາເລັດໂດຍໄວ,ພ້ອມນັ້ນກໍ່ຕ້ອງມີການໃຫ້ຈະແຈ້ງກ່ຽວກັບບ່ອນທີ່ຈະສ້າງບ່ອນຢູ່ຖາວອນ ໂດຍສະເພາະການກໍານົດກ່ຽວກັບເນື້ອດິນປຸກສ້າງ,ລວມທັງດ້ານພື້ນຖານໂຄງລ່າງຕ່າງໆພາຍໃນບ້ານຕ້ອງໄດ້ມີການຕົກລົງກັນຢ່າງຈະແຈ້ງກ່ອນທີ່ຈະສ້າງ ສິ່ງສໍາຄັນກໍ່ຕ້ອງໃຫ້ປະຊາຊົນຜູ້ປະສົບໄພໄດ້ເຂົ້າມາມີສ່ວນຮ່ວມໃນການກໍານົດບ່ອນສ້າງທີ່ຢູ່ອາໃສໃໝ່ຂອງເຂົາເຈົ້າ.


ຈາກນັ້ນທ່ານ ພັນຄໍາ ວິພາວັນ ຮອງປະທານປະເທດພ້ອມຄະນະຍັງໄດ້ເຄື່ອນໄຫວຢ້ຽມຢາມປະຊາຊົນຜູ້ປະສົບໄພຢູ່ສູນພັກຊົ່ວຄາວຈຸດໂຮງຮຽນປະຖົມບ້ານຫາດຍາວ,ຢ້ຽມຢາມອ້າຍນ້ອງນາຍ ແລະພົນທະຫານຢູ່ກອງບັນຊາການທະຫານເມືອງສະໜາມໄຊເຊິ່ງເປັນສູນບັນຊາການກອບກູ້ ແລະຊອກຄົ້ນຫາຜູ້ສູນຫາຍ,ຢ້ຽມຢາມສະຖານທີ່ກໍສ້າງສູນພັກຊົ່ວຄາວ ແລະຖາວອນຢູ່ຈຸດດົງບາກ ແລະເຄື່ອນໄຫວກວດກາເບິ່ງບ້ານທີ່ໄດ້ຮັບຄວາມເສຍເຫດຕື່ມອີກ.

ຂໍ້ມູນ: ຂປລ 
© ໂຕະນໍ້າຊາຂ່າວ |  www.tonamcha.com
_____

No comments

Powered by Blogger.