Header Ads

ທ່ານຮອງນາຍົກລັດຖະມົນຕີ ຕິດຕາມຊຸກຍູ້ການແກ້ໄຂໄພພິບັດ ຢູ່ແຂວງຫຼວງນໍ້າທາ



ໃນວັນທີ 11-12 ກັນຍາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ສືບຕໍ່ຕິດຕາມແກ້ໄຂສະພາບໄພພິບັດ ແລະ ຊຸກຍູ້ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຢູ່ແຂວງຫຼວງນໍ້າທາ, ມີທ່ານ ເພັດຖາວອນ ພິລາວັນ ເຈົ້າແຂວງໆຫຼວງນໍ້າທາ, ອໍານາດການປົກຄອງແຂວງ ແລະ ປະຊາຊົນແຂວງຫຼວງນໍ້າທາ ໃຫ້ການຕ້ອນຮັບ.


ທ່ານ ເພັດຖາວອນ ພິລາວັນ ໄດ້ລາຍງານໃຫ້ຊາບວ່າ: ນັບແຕ່ທ້າຍເດືອນກໍລະກົດ ຈົນເຖິງກາງເດືອນສິງຫາ 2018 ຢູ່ແຂວງຫຼວງນໍ້າທາ ໄດ້ເກີດມີຝົນຕົກໜັກ ເຮັດໃຫ້ເກີດມີນໍ້າປ່າໄຫຼຊຸທັ່ງໃສ່ບ້ານເຮືອນ, ເຂດທໍາການຜະລິດຂອງປະຊາຊົນ ລວມທັງ ພື້ນຖານໂຄງລ່າງ ໄດ້ຮັບຄວາມເສຍຫາຍເປັນຈໍານວນຫຼວງຫຼາຍ ເປັນຕົ້ນ ເສັ້ນທາງ, ຂົວ, ຊົນລະປະທານ ແລະ ອື່ນໆ; ຜ່ານການປະເມີນຄວາມເສຍຫາຍເບື້ອງຕົ້ນ ເຫັນວ່າ: ທົ່ວແຂວງມີເນື້ອທີ່ນາປີ ຖືກນໍ້າຖ້ວມເສຍຫາຍຈໍານວນ 713 ເຮັກຕາ ໃນນັ້ນ ຢູ່ເມືອງລອງ ຈໍານວນ 302 ເຮັກຕາ, 334 ຄອບຄົວ; ເມືອງວຽງພູຄາ ປະຊາຊົນຖືກຜົນກະທົບ 34 ບ້ານ, ເນື້ອທີ່ນາເສຍຫາຍ 345,8 ເຮັກຕາ; ເນື້ອທີ່ປູກສາລີ, ອ້ອຍ, ກ້ວຍ ແລະ ພືດຊະນິດອື່ນໆ ເສຍຫາຍ 161 ເຮັກຕາ; ຊົນລະປະທານເສຍຫາຍ 60 ແຫ່ງ ມູນຄ່າເສຍຫາຍ ປະມານ 12,36 ຕື້ກີບ; ເສັ້ນທາງຫຼວງແຫ່ງຊາດ 13N, 17A, 17B ແລະ R3 ຖືກພູເຈື່ອນຕັນທາງ ຕ້ອງການງົບປະມານແກ້ໄຂສຸກເສີນ 5,39 ຕື້ ກີບ; ເສັ້ນທາງຫຼວງຂອງແຂວງ, ຂອງເມືອງ ແລະ ທາງຊົນນະບົດ ຖືກນໍ້າເຊາະເຈື່ອນ, ພູເຈື່ອນຕັນທາງຫຼາຍຈຸດ ຕ້ອງການງົບປະມານສ້ອມແປງຄືນ 24,13 ຕື້ ກີບ; ຂົວຂ້າມນໍ້າລອງ ແລະ ເສັ້ນທາງຫຼວງແຫ່ງຊາດ 17B (ເມືອງສີງ- ເມືອງລອງ ) ຖືກນໍ້າເຊາະໄຫຼ-ເປ່ເພ ເຮັດໃຫ້ການໄປມາ ພົບຄວາມຫຍຸ້ງຍາກ. ພ້ອມດຽວກັນນີ້, ເນື້ອທີ່ໄຮ່ປູກເຂົ້າຂອງປະຊາຊົນ ຖືກໜູຂີທໍາລາຍ ຈໍານວນ 2.187 ເຮັກຕາ; ຮ້າຍແຮງກວ່າໝູ່ ແມ່ນຢູ່ເມືອງລອງ ມີເນື້ອທີ່ຖືກທໍາລາຍໝົດ ຈໍານວນ 1.952 ເຮັກຕາ.​





ໂອກາດດຽວກັນນີ້, ທ່ານ ສອນໄຊ ສີພັນດອນ ກໍ່ໄດ້ໃຫ້ກຽດໂອ້ລົມ ແລະ ເນັ້ນໜັກ ໃຫ້ອໍານາດການປົກຄອງແຂວງຫຼວງນໍ້າທາ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ຄະນະແກ້ໄຂໄພພິບັດຂັ້ນແຂວງ, ເມືອງ ແລະ ບ້ານ ເອົາໃຈໃສ່ໃນການໂຄສະນາເຜີຍແຜ່ ເພື່ອເຮັດໃຫ້ປະຊາຊົນ ໄດ້ຮັບຮູ້, ເຂົ້າໃຈ ແລະ ມີສະຕິລະວັງຕົວ ເພື່ອກຽມພ້ອມຮັບມືກັບໄພພິບັດ ທີ່ອາດຈະເກີດຂຶ້ນ; ສ້າງແຜນເພື່ອປ້ອງກັນຮັບມືກັບໄພພິບັດ ໃນໄລຍະສັ້ນ, ໄລຍະກາງ ແລະ ໄລຍະຍາວ ຢ່າງເປັນລະບົບຄົບຊຸດ ໂດຍໃຫ້ສ້າງເປັນແຜນ ທີ່ຕິດພັນກັບແຜນພັດທະນາເສດຖະກິດ-ສັງຄົມຂອງແຂວງ ໃນແຕ່ລະປີ; ເອົາໃຈໃສ່ດູແລເບິ່ງແຍງລູກຫຼານໃຫ້ດີ ເພື່ອບໍ່ໃຫ້ຖືກຜົນກະທົບຈາກໄພພິບັດ; ພາຍຫຼັງນໍ້າແຫ້ງລົງ ໃຫ້ເອົາໃຈໃສ່ໃນການຕິດຕາມພະຍາດລະບາດ, ສະໜອງແນວພັນພືດໃຫ້ປະຊົນ ເພື່ອໃຫ້ທັນຕາມລະດູການ; ກວດກາຄືນຄວາມເສຍຫາຍທີ່ເກີດຂຶ້ນທັງໝົດ; ຈັດສັນບ່ອນຢູ່ອາໃສ ແລະ ເຂດທໍາມາຫາກິນຂອງປະຊົນຄືນໃໝ່ ໂດຍສະເພາະ ບ່ອນທີ່ມີຄວາມສ່ຽງຕໍ່ໄພພິບັດ; ເອົາໃຈໃສ່ແກ້ໄຂການແຜ່ລະບາດຂອງສັດຕູພືດ; ເອົາໃຈໃສ່ຈັດຕັ້ງປະຕິບັດ ຄໍາສັ່ງສະບັບເລກທີ 12/ນຍ ວ່າດ້ວຍການຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດຂອງລັດຖະບານ; ເອົາໃຈໃສ່ວຽກງານການບໍລິການຜ່ານປະຕູດຽວ ແລະ ອື່ນໆ.

ພ້ອມດຽວກັນນີ້, ທ່ານ ສອນໄຊ ສີພັນດອນ ໄດ້ມອບເງິນຈໍານວນ 50 ລ້ານກີບ ໃຫ້ແຂວງ, ມອບເງິນ ຈໍານວນ 10 ລ້ານກີບ ໃຫ້ອໍານາດການປົກຄອງເມືອງລອງ ເພື່ອປະກອບສ່ວນຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງປະຊາຊົນທີ່ຖືກຜົນກະທົບ.​


ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.