Header Ads

ລັດຖະມົນຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມອຳລາ ແລະ ປະດັບຫລຽນ ໃຫ້ແກ່ ທູດຝຣັ່ງ ປະຈຳ ລາວ


ໃນວັນທີ 3 ກັນຍາ 2018, ເວລາ 10:00, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າອຳລາ ຂອງ ທ່ານ ນາງ ໂກລດີນ ເລີດູ (Claudine LEDOUX), ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ຝຣັ່ງ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ, ໃນໂອກາດສິ້ນສຸດການປະຕິບັດໜ້າທີ່ການທູດ ຢູ່ ສປປ ລາວ. ໃນ​ໂອ​ກາດ​ດັ່ງ​ກ່າວ, ທ່ານລັດ​ຖະ​ມົນ​ຕີ​​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ ​ແລະ ຊົມ​ເຊີຍ ​ທ່ານ ເອກອັກຄະລັດຖະທູດ ທີ່​ໄດ້​ສຳເລັດໜ້າ​ທີ່​ການ​ທູດ ຢູ່ ສ​ປ​ປ​ ລາວ ​ແລະ ສະ​ແດງ​ຄວາມ​ຂອບ​ໃຈ​ຢ່າ​ງຈິງ​ໃຈ​ ຕໍ່​ການ​ສະໜັບ​ສະ​ໜຸນ ​ແລະ​ການ​ຊ່ວຍ​ເຫຼືອຂອງ​ຝຣັ່ງທີ່ມີ​ຕໍ່ ສ​ປ​ປ ລາວ ໃນ​​ໄລ​ຍະ​ຜ່ານ​ມາ, ອັນໄດ້​ປະ​ກອບ​ສ່ວນ​ຢ່າງສຳຄັນເຂົ້າ​ໃນ​ແຜນ​ພັດ​ທະ​ນາ​ ເສດຖະກິດ-ສັງຄົມ ຄັ້ງທີ 8 ຂອງ ສປປ ລາວ.





ພ້ອມ​ດຽວ​ກັນ, ​ທ່ານລັດຖະມົນຕີ ຍັງໄດ້ຕາງໜ້າລັດຖະບານ ແລະ ປະຊາຊົນລາວ ມອບຫຼຽນກາມິດຕະພາບໃຫ້ທ່ານທູດຝຣັ່ງ ເພື່ອສະແດງຄວາມຍ້ອງຍໍຊົມເຊີຍຜົນສຳເລັດອັນໃຫ່ຍຫຼວງ ຕໍ່ຜົນງານຂອງທ່ານເອກອັກຄະລັດຖະທູດ ໃນໄລຍະການປະຕິບັດໜ້າທີ່ທາງການທູດ ຢູ່ ສປປ ລາວ. ພ້ອມທັງເປັນການສົ່ງເສີມສາຍ​ພົວ​ພັນ​ມິດ​ຕະ​ພາບ ແລະ ການ​ພົວ​ພັນ​ຮ່ວມ​ມືອັນດີ ລະ​ຫວ່າງສອງປະເທດລາວ ແລະ ຝຣັ່ງ ໃຫ້ເຂັ້ມແຂງ​ ແລະ ຂະ​ຫຍາຍ​ຕົວ​ຢ່າງບໍ່ຢຸດຢັ້ງ.

ໃນໂອກາດດຽວກັນ, ທ່ານທູດຝຣັ່ງ ກໍ່ໄດ້ສະແດງຄວາມຂອບໃຈ ຕໍ່ ລັດຖະບານ ສປປ ລາວ ທີ່ໄດ້ອຳນວຍຄວາມສະດວກແກ່ການເຄື່ອນໄຫວ ການທູດຂອງຕົນ ພິເສດແມ່ນການມອບຫຼຽນກາມິດຕະພາບອັນສົມກຽດ ໃຫ້ແກ່ທ່ານ ແລະ ຢືນຢັນວ່າ ຈະສືບຕໍ່ເຮັດສຸດຄວາມສາມາດ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຝຣັ່ງ-ລາວ ທີ່ມີມາແຕ່ດົນນານນັ້ນ ໃຫ້ຈະເລີນງອກງາມຍິ່ງໆຂຶ້ນ.


ທີ່ມາ: ກະຊວງການຕ່າງປະເທດ
© ໂຕະນໍ້າຊາຂ່າວ |  www.tonamcha.com
_____


No comments

Powered by Blogger.