Header Ads

ຍົກລະດັບເຕັກນິກການພັດທະນາ ຊັບພະຍາກອນແຮ່ທາດລາວ




ຄະນະກຳມະການຮ່ວມມືລາວ-ຈີນ ກະຊວງແຜນການ ແລະ ການລົງທຶນໄດ້ຈັດພິທີປິດຊຸດອົບຮົມເຕັກນິກພື້ນຖານກ່ຽວກັບການພັດທະນາຊັບ ພະຍາກອນແຮ່ທາດລາວ ປະ ຈຳປີ 2018 ຂຶ້ນໃນວັນທີ 27 ກັນຍາ ຜ່ານມາ ທີ່ສູນຝຶກອົບ ຮົມສູນກາງແນວລາວສ້າງຊາດ, ໂດຍການເປັນປະທານຂອງທ່ານ ແຄນທອງ ສີສຸວົງ ຮອງປະທານຄະນະກຳມະການຮ່ວມມືລາວ-ຈີນ, ທ່ານ ລີ ເໜີງ ບິງ (Mr. Li Nengbing)ຕາງໜ້າທີ່ປຶກສາດ້ານເສດຖະກິດ-ການຄ້າ ສະຖານທູດ ສປ ຈີນ ປະຈຳລາວ, ມີພາກສ່ວນກ່ຽວຂ້ອງເຂົ້າຮ່ວມ. 

ພາຍໃຕ້ຂອບການຮ່ວມ ມືສອງຝ່າຍລະຫວ່າງລັດຖະ ບານ ແຫ່ງ ສປປ ລາວ ແລະ ລັດຖະບານ ສປ ຈີນ ແມ່ນໄດ້ຖືເອົາການຮ່ວມມືດ້ານການພັດທະນາຊັບພະຍາກອນມະ ນຸດເປັນບຸລິມະສິດອັນດັບຕົ້ນໆ ແລະ ດ້ວຍການສະໜັບສະໜູນຊ່ວຍເຫຼືອເປັນຢ່າງດີຕະຫຼອດມາຈາກກະຊວງການຄ້າ ສປ ຈີນ, ຊຸດຝຶກອົບຮົມເຕັກນິກພື້ນຖານ ກ່ຽວກັບການພັດທະນາຊັບພະ ຍາກອນແຮ່ທາດ ຂອງລາວ ປະຈຳປີ 2018 ໄດ້ດຳເນີນມາແຕ່ວັນທີ 10 ກັນຍາເປັນຕົ້ນມາ ຊຶ່ງມີຜູ້ເຂົ້າຮ່ວມທັງໝົດ 50 ທ່ານທີ່ມາຈາກຂະ ແໜງພະລັງງານ ແລະ ບໍ່ແຮ່ລວມທັງສູນກາງ ແລະ ທ້ອງຖິ່ນ. ຊຸດອົບຮົມຄັ້ງນີ້ໄດ້ລົງ ເລິກກ່ຽວກັບການນຳໃຊ້ເຕັກ ນິກການສຳຫຼວດແຮ່ທາດ, ວິທີການນຳໃຊ້ເຄມີສາດ, ເຕັກນິກການຂຸດຄົ້ນແຮ່ທາດ, ເຕັກນິກການຄັດເລືອກແຮ່ທາດ ແລະ ອື່ນໆທີ່ກ່ຽວຂ້ອງອີກຈຳນວນໜຶ່ງ, ນອກຈາກນີ້ຍັງມີກິດຈະກຳເຄື່ອນໄຫວນອກຫ້ອງຮຽນຕື່ມອີກ, ຜົນສຳເລັດທີ່ໄດ້ຮັບຈາກການອົບຮົມຄັ້ງນີ້ແມ່ນໄດ້ຍົກລະດັບຄວາມຮູ້ຄວາມສາມາດຂອງພະນັກງານ-ລັດຖະກອນຂອງລາວທາງດ້ານວຽກງານຊັບພະຍາກອນແຮ່ທາດ, ທັງເປັນເວທີແລກປ່ຽນບົດຮຽນ ແລະ ຄວາມຮູ້ດ້ານວຽກງານດັ່ງ ກ່າວລະຫວ່າງວິຊາການລາວກັບຜູ້ຊ່ຽວຊານຂອງ ສປ ຈີນ ຊຶ່ງນອກຈາກຈະເປັນການຮ່ວມມືດ້ານເຕັກນິກແລ້ວຍັງເປັນການເພີ່ມພູນຄູນສ້າງສາຍພົວພັນມິດຕະພາບຂອງສອງຊາດ ລາວ-ຈີນ ຕື່ມອີກ.


ຂ່າວ : ສຸກສາຄອນ, ພາບ: ພູວຽງຄຳ (ນສພ ປະຊາຊົນ)
© ໂຕະນໍ້າຊາຂ່າວ |  www.tonamchanews.com

_____


No comments

Powered by Blogger.